នៅខេត្តរតនគិរី អង្គការភ្លែនកម្ពុជា ប្រកាសជ្រើសរើសយុវជនឱ្យចូលរួមធ្វើការងារសង្គម និងអភិវឌ្ឍសហមគន៍

ជាឱកាសមួយសម្រាប់យុវជននៅក្នុងខេត្តរតនគិរី ដើម្បីចូលរួមធ្វើការងារសង្គម អង្គការភ្លែនអន្តរជាតិកម្ពុជា កំពុងប្រកាសជ្រើសរើសយុវជនដែលមានអាយុ១៨ ដល់២៤ឆ្នាំ ដើម្បីត្រៀមខ្លួនក្នុងការចូលរួមកម្មវិធីដែលនឹងត្រូវរៀបចំដោយអង្គការភ្លែន ដៃគូអភិវឌ្ឍន៍ អង្គការសហប្រជាជាតិ ស្ថាប័នឯកជន និងរដ្ឋាភិបាលនា ពេលខាងមុខនេះ។

លក្ខខណ្ឌក្នុងការចូលរួម គឺយុវជនមកពីតំបន់គោលដៅរបស់អង្គការភ្លែនអរន្តរជាតិកម្ពុជា រួមមាន ភ្នំពេញ សៀមរាប ស្ទឹងត្រែង និងខេត្តរតនគិរី។ យុវជន ត្រូវមានការប្តេជ្ញា និងចំណាប់អារម្មណ៍ក្នុងការងារស្ម័គ្រចិត្ត ការងារសង្គម និងការអភិវឌ្ឍសហមគន៍។ មួយវិញទៀត យុវជន និងយុវតី ដែលមាននិន្នាការភេទ និងអត្តសញ្ញាណយេនឌ័រផ្សេងៗ ជនជាតិដើមភាគតិច យុវជន ដែលមានពិការភាព យុវជនដែលមកពីគ្រួសារមានស្ថានភាព ក្រីក្រ ត្រូវបានលើកទឹកចិត្តក្នុងការចូលរួម។ អត្ថប្រយោជន៍ក្នុងការចូលរួម​ គឺយុវជនដែលបានចូលរួមអាចពង្រឹងទាំងភាពជាអ្នកដឹកនាំ ជំនាញទន់ និងគោលដៅអាជីពនា ពេលអនាគត។ 

អ្នកស្រី ភានី ប្រធានអង្គការភ្លែន ខេត្តរតនគិរី បានមានប្រសាសន៍ថា គោលបំណង គឺដើម្បីផ្តល់ឱកាសដល់យុវជន ជាពិសេសយុវតីក្នុងការចូលរួមផ្តល់យោបល់ និងធ្វើសេចក្តីសម្រេចចិត្តជាមួយភាគីពាក់ព័ន្ឋនៅថ្នាក់អន្តរជាតិ (ថ្នាក់តំបន់) ថ្នាក់ជាតិ និងថ្នាក់ក្រោមជាតិ ដើម្បីលើកកម្ពស់ការចូលរួម សមភាពយេនឌ័រ និងសិទ្ធិក្មេងស្រី។ ពង្រឹងសមត្ថភាពរបស់យុវជនទាក់ទងនឹងគម្រោងនិងប្រធានបទដែលពាក់ព័ន្ធនានា រួមទាំងគោលនយោបាយផ្សេងៗ ជាពិសេស យុវតី ក្នុងការដឹកនាំ និងរៀបចំសកម្មភាពជាមួយអង្គការភ្លែន អង្គការដៃគូ អ្នកពាក់ព័ន្ធ និងដៃគូអភិវឌ្ឍន៍នានា។

យុវជន នឹងទទួលបានឱកាសសម្រាប់គោលដៅអាជីពរបស់ពួកគេ ដោយផ្អែកលើការចូលរួមជាមួយដៃគូ និងបណ្តាញជាមួយនឹងការណែនាំពីអង្គការភ្លែនអន្តរជាតិ កម្ពុជា ហើយយុវជននឹងកើននូវចំណេះដឹង សមត្ថភាព ទទួលបាននូវបទពិសោធន៍ការងារសង្គម និងភាពជាអ្នកដឹកនាំចេញពីការចូលរួមខាងលើ និងក្លាយជាពលរដ្ឋសកម្មក្នុងសង្គម។ កាលបរិច្ឆេទឈប់ទទួលពាក្យនៅថ្ងៃទី ៣១ ខែធ្នូ ២០២៤នេះ៕