ឈ្មួញ​ចុះទិញ​ស្ពៃ​ជើង​ទា​កសិករ​ដល់​ចម្ការ ឲ្យ​តម្លៃ​៣ ០០ ទៅ ៤ ០០ រៀលក្នុងមួយគីឡូក្រាម

កសិករនៅ​ក្នុង​ស្រុក​ភ្នំព្រឹក្ស​ខេត្ត​បាត់ដំបង បាន​ថ្ងួចថ្ងូរអំពីតម្លៃស្ពៃជើងទាធ្លាក់ថ្លៃ​ខ្លាំងនៅលើទីផ្សារ ខណៈ​ឈ្មួញ​ចុះ​ទិញ​ដល់​ចម្ការ​ឲ្យ​ថ្លៃ​ថោកស្ទើរតែទប់ថ្លៃដើមមិនបាន។

ក្នុងវ័យជាង ២០ ឆ្នាំ កសិករ​មួយរូបនៅក្នុងស្រុកភ្នំព្រឹក ខេត្ត​បាត់ដំបង​បានរៀបរាប់ថា មួយរយៈចុងក្រោយតម្លៃស្ពៃជើង​ទា​គឺថោកបំផុតស្ទើរតែទប់ថ្លៃដើមមិនបាន ព្រោះពេលឈ្មួញចុះមកទិញដល់ចម្ការ ឲ្យ​តម្លៃចាប់ពី ៣ ០០ ទៅ ៤ ០០ រៀលតែប៉ុណ្ណោះក្នុងមួយគីឡូក្រាម។

ដោយឡែកលោក ជា ដួង អាយុ ៦០ ឆ្នាំ កសិករ​មួយ​រូប​ទៀត​រស់នៅឃុំ អូររំដួល ស្រុកភ្នំព្រឹក ខេត្តបាត់ដំបង បាន​ប្រាប់​ថា សព្វថ្ងៃលោកបានដាំស្ពៃជើងទា ឬស្ពៃជ្រក់នៅលើផ្ទៃដី​ជាង ១០ រ៉ៃ ហើយនៅពីរខែចុងក្រោយនៃឆ្នាំ ២០២៤ ការដាំដុះដំណាំលូតលាស់ធំធាត់បាន​ល្អ ដោយសារតែអាកាសធាតុចុះត្រជាក់និងអំណោយផលរហូតដល់ដើមស្ពៃមួយគុម្ពមានទម្ងន់ជាងមួយគីឡូក្រាម។

បើទោះបីជាការបង្កបង្កើនផលនិងដាំដុះមានភាពងាយស្រួលក៏ដោយ កសិករ​រូបនេះ​មិន​សប្បាយ​ចិត្ត​ដោយសារប្រឈម​បញ្ហាតម្លៃនៅ​លើ​ទីផ្សារ ព្រោះក្រោយ​ប្រមូលផលបានហើយឈ្មួញ​ចុះមកទិញដល់ចំការម្តងៗ លក់បានតម្លៃត្រឹមតែ ៣០០ ទៅ ៤០០ រៀលប៉ុណ្ណោះក្នុងមួយគីឡូក្រាម។

«បើកាច់កិនជាមួយជី និងថ្លៃកម្លាំងពលកម្ម គឺស្ទើរតែមិនរួចខ្លួនទាល់តែសោះ»។ នេះ​បើតាមលោក ជាង ដួង។

លោក​បាន​អះអាង​ថា ឈ្មួញដែលចុះ​ទិញពីកសិករ​រួច​​យកទៅលក់​បន្ត​នៅលើទីផ្សារ អាច​បានតម្លៃចាប់ពី ១ ៥០០ ដល់ ២ ០០០ រៀលឯណោះ​ក្នុងមួយគីឡូក្រាម។

ស្ពៃជើងទាគឺជាប្រភេទស្ពៃម្យ៉ាងដែលប្រជាពលរដ្ឋភាគច្រើននិយមយកទៅធ្វើស្ពៃជ្រក់ ដោយសារតែប្រភេទស្ពៃនេះស្រួយល្អ ហើយងាយស្រួលក្នុងការដាំដុះ និងមានរយៈពេលខ្លីថែមទៀតផង។

បច្ចុប្បន្នដំណាំស្ពៃជើងទាឬអ្នកខ្លះហៅថាស្ពៃជ្រក់ ភាគច្រើនកសិករបានដាំដុះនៅក្នុងស្រុកភ្នំព្រឹកជាប់ព្រំដែនថៃ។ ការ​ដាំដុះប្រើពេលចន្លោះពី ៣០ ថ្ងៃ ទៅ ៤០ ថ្ងៃ ដោយ​មិនប្រកាន់​ដី ហើយ​កសិករ​នៅ​ស្រុក​ភ្នំព្រឹក​បាន​ដាំដុះ​រហូតក្លាយជាទម្លាប់​​ក្រៅពីបង្កបង្កើនផលធ្វើស្រែចម្ការ ដោយ​ឆ្លៀតដាំស្ពៃជើងទានេះបន្ថែមទៀតទៅលើផ្ទៃដីដែលនៅសល់។

ទាក់ទង​តម្លៃ​ស្ពៃ​ជើងទា​ចុះថោក​នេះ កសិករ​បានសំណូមពរដល់ឈ្មួញទាំងឡាយ មេត្តាកុំទម្លាក់តម្លៃខ្លាំងពេក ហើយក៏សូមឱ្យប្រជាពលរដ្ឋខ្មែរ ចេះគាំទ្រកសិផលរបស់ខ្មែរផង ដើម្បីឲ្យតម្លៃបានសមរម្យ និង​អាចទទួលយកបានសម្រាប់ការដាំដុះបន្តទៅមុខទៀត៕

អត្ថបទ៖ សោ និយមរ័ត្ន