ឆ្លងឆ្នាំ ៣ ថ្ងៃ នៅខេត្តបាត់ដំបង ទទួល​បាន​ភ្ញៀវទេសចរ​សរុបជាង ៣៦ ម៉ឺននាក់

នៅក្នុងរយៈពេល ៣ ថ្ងៃ បើគិតពីថ្ងៃទី ២៩ ដល់ថ្ងៃទី ៣១ ខែធ្នូ ឆ្នាំ២០២៤ ក្នុងពិធីអបអរសាទរបុណ្យចូលឆ្នាំថ្មីឆ្នាំ​សកល​ឆ្នាំ ២០២៤-២០២៥ ខេត្ត​បាត់ដំបងទទួល​បាន​ភ្ញៀវទេសចរ​មក​កម្សាន្ត​មាន​ចំនួនរហូតដល់ជាង ៣៦ មុឺននាក់។

បើយោងតាមរបាយការណ៍របស់មន្ទីរទេសចរណ៍ខេត្តបាត់ដំបង នៅក្នុងរយៈពេល ៣ ថ្ងៃ នៃពិធីឆ្លងឆ្នាំសកលនេះ គឺមានភ្ញៀវទេសចរណ៍ជាតិ និងអន្តរជាតិ ចូលមកកំសាន្តក្នុងខេត្តបាត់ដំបងយ៉ាងច្រើនកុះករ ដោយរដ្ឋបាលខេត្តសហការជាមួយមន្ទីរទេសចរណ៍ខេត្តបាន​រៀបចំឲ្យមានឆាកតន្ត្រី ស្តង់លក់ចំណីអាហារ និងមានមុខម្ហូបខ្មែរប្រចាំខេត្តបាត់ដំបង និងទីតាំងកម្សាន្តផ្សេងៗទៀត ដែលទាំងនេះហើយជាកត្តាឲ្យមានការអូសទាញភ្ញៀវចូលមកកំសាន្តយ៉ាងច្រើនបែបនេះ។

បើ​តាមប្រធានមន្ទីរទេសចរណ៍​ខេត្ត​បាត់ដំបង​បាន​លម្អិត​ស្ថិតិ និងសេចក្តីរាយការណ៍​តួលេខ​ភ្ញៀវទេសចរ​មក​កម្សាន្តខេត្ត​បាត់ដំបង​រយៈពេល ៣ ថ្ងៃ ដោយ​នៅថ្ងៃទី ២៩ ខែធ្នូ មានភ្ញៀវទេសចរជាតិចំនួន ៣៨.៩៧៥ នាក់ និងភ្ញៀវទេសចរអន្តរជាតិមានចំនួន ៣២០ នាក់។ នៅថ្ងៃទី ៣០ ខែធ្នូ មានភ្ញៀវទេសចរជាតិចំនួន ៥៣.៧៨៦ នាក់ និងភ្ញៀវទេសចរអន្តរជាតិចំនួន ៣៣៨ នាក់។

ដោយឡែកសម្រាប់ថ្ងៃទី ៣១ ខែធ្នូ មានភ្ញៀវទេសចរជាតិចំនួន ២៧០.២៦៧ នាក់ និងភ្ញៀវទេសចរអន្តរជាតិចំនួន ៣៦៩ នាក់។ សរុបស្ថិតិភ្ញៀវទេសចរគិតចាប់ពីថ្ងៃទី២៩ ដល់ ថ្ងៃ៣១ ខែធ្នូ ឆ្នាំ២០២៤ មាន៖ ភ្ញៀវជាតិមានចំនួន ៣៦៣,០២៨ នាក់ កើនឡើង ២.៩០% បើធៀបឆ្នាំ២០២៣ មានចំនួន ៣៥២,៧៩០ នាក់។ ភ្ញៀវអន្តរជាតិមានចំនួន ១,០២៧ នាក់ កើនឡើង  ១១.៨៧% បើធៀបឆ្នាំ២០២៣ មានចំនួន ៩១៨  នាក់។

ភ្ញៀវទេសចរសរុបមានចំនួន ៣៦៤,០៥៥ នាក់ មានការកើនឡើង ២,៩៣ % បើធៀបឆ្នាំ២០២៣ មានចំនួន ៣៥៣,៧០៨ នាក់៕

អត្ថបទ៖ សោ និយមរ័ត្ន