យុវជនខេត្តស្វាយរៀង នឹងរៀបចំកម្មវិធី«៧មករា ថ្ងៃនៃក្តីសង្ឃឹម» ដើម្បីអបអរសាទរខួបទី៤៦ នៃថ្ងៃជ័យជម្នះ ៧មករា

យុវជនខេត្តស្វាយរៀង នឹងរៀបចំកម្មវិធី«៧មករា ថ្ងៃនៃក្តីសង្ឃឹម» នៅថ្ងៃទី៤ ខែមករា ឆ្នាំ២០២៥ ខាងមុខនេះ នៅទីតាំង ទំនប់តាណេង ច្រាំងតាបុល សួនច្បារមាត់ទន្លេវ៉ៃគោ ក្រុងស្វាយរៀង ចាប់ពីម៉ោង ០៨៖៣០នាទីព្រឹក រហូតដល់ម៉ោង ២១៖០០នាទីយប់។ កម្មវិធី«៧មករា ថ្ងៃនៃក្តីសង្ឃឹម»នេះធ្វើឡើងក្នុងគោលបំណង ដើម្បីអបសាទរខួបលើកទី៤៦ នៃទិវាជ័យជម្នះ ៧ មករា។

កម្មវិធី«៧មករា ថ្ងៃនៃក្តីសង្ឃឹម» កើតចេញពីគំនិតផ្តួចផ្តើមដោយឯកឧត្តម ឌី វិជ្ជា ដើម្បីរំលឹកខួបលើកទី៤៦ ថ្ងៃជ័យជម្នះ៧ មករា ១៩៧៩-២០២៥។ កម្មវិធីនេះ ក៏ធ្វើឡើងដើម្បីជាការរំលឹកខួបខេត្តស្វាយរៀង គឺជាខេត្តដំបូងគេបង្អស់ដែលត្រូវបានរំដោះចេញពីរបបប្រល័យពូជសាសន៍ខ្មែរក្រហមដោយរណសិរ្យសាមគ្គីសង្រ្គោះជាតិកម្ពុជាដែលកើតចេញពីការរួមកម្លាំងគ្នារបស់យុទ្ធជនស្នេហាជាតិខ្មែរនៅថ្ងៃសៅរ៍ ទី៤ ខែមករា ឆ្នាំ១៩៧៩។

កម្មវិធី«៧មករា ថ្ងៃនៃក្តីសង្ឃឹម» ក៏ជាការបង្ហាញអំពីការចូលរួមពីសហគមន៍ និងឆ្លុះបញ្ចាំងពីសកម្មភាពរបស់ប្រជាពលរដ្ឋបែបលក្ខណៈសហកមន៍នៅក្នុងខេត្តស្វាយរៀងផងដែរ។ កម្មវិធីនេះ មានដូចជា ស្តង់គូរគំនូរលើផ្ទៃមុខ ស្តង់ពិព័រណ៍ចំណីអាហារ ការលេងល្បែងកម្សាន្តសម្រាប់កុមារ យុវជន និងជាពិសេស មាននូវកម្មវិធីសម្តែងសិល្បៈរបាំព្រាបស ចាប៉ីដងវែង របាំគោះត្រឡោក របាំឆៃយ៉ាំ ប្រពៃណីចម្រុះ ការច្រៀងរាំលេង ចង្វាក់ប្រពៃណី និងសម័យ ក៏ដូចជា ការលេងល្បែងកម្សាន្តសប្បាយៗជាច្រើនទៀត។

យុវជនខេត្តស្វាយរៀង បានអំពាវនាវ និងសូមអញ្ជើញលោកតា លោកយាយ អ៊ំពូមីង ប្រជាពលរដ្ឋ យុវជន សិស្សនិស្សិត កម្មករ កម្មការិនី ចូលរួមទស្សនានូវផ្ទាំងទស្សនីយភាពនានានៅក្នុងកម្មវិធី«៧មករា ថ្ងៃនៃក្តីសង្ឃឹម» នេះឱ្យបានច្រើនកុះករទាំងអស់គ្នា នៅសួនច្បារមាត់ទន្លេវ៉ៃគោ ក្រុងស្វាយរៀង ខេត្តស្វាយរៀង៕