ក្រុងដូនកែវ ទទួលបានភ្ញៀវទេសចរជាង១២ម៉ឺននាក់ក្នុងឱកាសបុណ្យឆ្លងឆ្នាំសកលរយៈពេល៣ថ្ងៃ

រយៈពេល៣ថ្ងៃនៃការរៀបចំពិធីបុណ្យចូលឆ្នាំសកល នៅខេត្តតាកែវ មានភ្ញៀវទេសចរជាតិ និងអន្តរជាតិបានមកចូលរួមលេងកម្សាន្តជាង១២ម៉ឺននាក់។

តាមការបញ្ជាក់​ពី​លោក ឈូក ប៊ុនថន ប្រធានមន្ទីរទេសចរណ៍ខេត្តតាកែវបានប្រាប់ឲ្យដឹងថា ក្នុងរយៈពេល៣ថ្ងៃ នៃពិធីបុណ្យឆ្លងឆ្នាំសកល ២០២៤​ ចូល​ ២០២៥ ដែលអាជ្ញាធរខេត្តតាកែវបានរៀបចំធ្វើឡើងនៅសួនច្បារមាត់បឹងតាកែវមានភ្ញៀវទេសចរជាតិ និងអន្តរជាតិ បានចូលមកកម្សាន្តនៅសួនច្បារមាត់បឹងតាកែវ ក្រុងដូនកែវ សរុបចំនួន ១២៦៧២៩នាក់ ក្នុងនោះភ្ញៀវទេសចរបរទេស មានចំនួន ១៧១នាក់។​

ដោយឡែក​ លោក កង អាណាន់ អភិបាលក្រុងដូនកែវ បានថ្លែងឱ្យដឹងដែរថា​ នៅក្នុងពិធីបុណ្យឆ្លងឆ្នាំសកលរយៈពេល៣ថ្ងៃ​ ដែលអាជ្ញាធរក្រុងដូនកែវបានរៀបចំធ្វើឡើងនៅសួនច្បារមាត់បឹងតាកែវនេះ​ មានប្រជាពលរដ្ឋមកលេងកម្សាន្តយ៉ាងច្រើនកុះករ ដោយក្នុងនោះមានការប្រគុំតន្ត្រី ការបាញ់កាំជ្រួចជាដើម។ បើតាមលោកអភិបាលក្រុងដូនកែវ​ ចំពោះបញ្ហាសន្តិសុខវិញមិនមានបញ្ហាអ្វីកើតឡើងនោះទេ​ ដោយអាជ្ញាធរបានរក្សាការពារសណ្ដាប់ធ្នាប់សន្តិសុខបានយ៉ាងល្អប្រសើរ៕

​អត្ថបទ៖ វីរ: