អភិបាលខេត្តស្ទឹងត្រែង ប្រាប់ពលរដ្ឋកុំចាញ់បោកមេខ្យល់ដែលញុះញង់ឱ្យទន្ទា្រនកាន់កាប់ដីដោយខុសច្បាប់

លោក សរ សុពុត្រា អភិបាលខេត្តស្ទឹងត្រែង បានស្នើប្រជាពលរដ្ឋ បញ្ឈប់ការជឿលើ (ចាញ់បោក) មេខ្យល់ ដែលញុះញង់ឱ្យទន្ទា្រនកាន់កាប់ដីដោយខុសច្បាប់ ក្នុងភូមិសាស្ត្រខេត្តស្ទឹងត្រែង។ ការណែនាំនេះ ធ្វើឡើងក្នុងឱកាសលោកដឹកនាំពិធីសំណេះសំណាលជាមួយបងប្អូនខ្មែរឥស្លាមនៅតំបន់អូរចំបក់ និងអូរសេវ នៃឃុំភ្លុក ឃុំសាមឃួយ និងឃុំស្តៅ ស្រុកសេសាន ខេត្តស្ទឹងត្រែង នៅព្រឹកថ្ងៃទី២ ខែមករា ឆ្នាំ២០២៥ នេះ។

ក្នុងឱកាសនោះ លោកអភិបាលខេត្ត បានមានប្រសាសន៍ថា «ការជឿលើពួកមេខ្យល់ ដែលញុះញង់ឱ្យបងប្អូនប្រជាពលរដ្ឋធ្វើសកម្មភាពកាន់កាប់ដីខុសច្បាប់ នឹងនាំឱ្យបងប្អូនខាតពេលវេលា ខាតបង់លុយកាក់ និងអាចត្រូវទទួលខុសត្រូវចំពោះច្បាប់។ សូមបញ្ឈប់ការជឿលើ (ចាញ់បោក) ពួកមេខ្យល់ ដែលញុះញង់នាំបងប្អូនមកទន្ទា្រនកាន់កាប់ដីដោយខុសច្បាប់ ក្នុងភូមិសាស្ត្រខេត្តស្ទឹងត្រែង»។

លោក សរ សុពុត្រា បានបញ្ជាក់បន្ថែមថា មានតែគោលការណ៍ “ឈ្នះ-ឈ្នះ”  ដែលជាគន្លឹះសំខាន់ ក្នុងការផ្លាស់ប្តូរការរស់នៅលើដីខុសច្បាប់ឱ្យមកស្របច្បាប់វិញ។ លើសពីនេះ ការរស់នៅស្របច្បាប់មិនត្រឹមតែជាការការពារសិទ្ធិរបស់បងប្អូនទេ ប៉ុន្តែជាការចូលរួមក្នុងការកសាងសង្គមប្រកបដោយសន្តិភាព និងកិច្ចសហប្រតិបត្តិការជាធរមានក្នុងសហគមន៍៕