នាយខណ្ឌរដ្ឋបាលព្រៃឈើតាកែវ អំពាវនាវឲ្យពលរដ្ឋចូលរួមថែរក្សា និងដាំដើមឈើនៅតាមផ្ទះឲ្យបានច្រើន

លោក ស៊ឹម ឡាប៉័ង នាយខណ្ឌរដ្ឋបាលព្រៃឈើតាកែវ បានអំពាវនាវឲ្យប្រជាពលរដ្ឋនៅតាមមូលដ្ឋានជួយថែរក្សា និងចូលរួមដាំដើមឈើនៅតាមផ្ទះរាងៗឲ្យបានច្រើនដើម្បីជាផលប្រយោជន៍បរិស្ថានស្អាត។

ការអំពាវនាវនេះ បានធ្វើឡើងនៅពេលដែលលោកដឹកនាំមន្រ្តីរាជការរដ្ឋបាលព្រៃឈើ ចុះដាំកូនឈើទាលបន្ថែមទៀតនៅសួនច្បារសម្ដេចវិបុលបញ្ញា សុខ អាន ក្បែរវិមានឯករាជ្យខេត្ត ក្រុងដូនកែវ នាព្រឹកថ្ងៃទី៣ ខែមករា ឆ្នាំ២០២៥នេះ។

លោក ស៊ឹម ឡាប៉័ង បានលើកឡើងថា ដើមឈើមានសារៈសំខាន់ណាស់ ចំពោះជីវិតមនុស្សសត្វ និងជីវៈចម្រុះគ្រប់ប្រភេទ ពិសេសវាជារបាំងខ្យល់ របាំងទឹកជំនន់ និងនាំមកនូវទឹកភ្លៀង សម្រាប់បង្កបង្កើនផលចិញ្ចឹមជីវិតមនុស្សលោកថែមទៀត។

បន្ថែមពីនោះ លោកនាយខណ្ឌរដ្ឋបាលព្រៃឈើ ក៏អំពាវនាវឱ្យប្រជាពលរដ្ឋថែរក្សា និងដាំដើមឈើនៅតាមផ្ទះរាងៗខ្លួន ដើម្បីជាផលប្រយោជន៍សម្រាប់បរិស្ថានស្អាតទាំងអស់គ្នា ព្រមទាំងសម្រាប់កូនចៅជំនាន់ក្រោយ បានស្គាល់ពីប្រភេទ​ឈើកម្រ ជាពិសេសដើមឈើអាចជួយបង្កើតអុកស៊ីសែនក្នុងបរិយាកាស និងស្រូបយកឧស្ម័នកាបូនិច ដែលជួយ​សម្រួលដល់ការរស់នៅប្រចាំថ្ងៃ។

គួររលឹកថា នៅសួនច្បារសម្ដេចវិបុលបញ្ញា សុខ អាន កាលពីពេលកន្លងទៅ ដើមឈើចំនួន៣៤៦ដើមត្រូវបានដាំជាបន្តបន្ទាប់នៅក្នុងសួនច្បារនេះ ដើម្បីលម្អសោភ័ណភាព និងបរិស្ថាន៕

​អត្ថបទ៖ វីរៈ