ព័ត៌មានជាតិ

ក្រុមហ៊ុនអ៊ែតវូដ បង្ហាញពីគម្រោងវិនិយោគធំៗ ចាយទុនរយលានដុល្លារនៅខេត្តព្រះសីហនុ

បានផុស

៥ ម៉ោង មុន

នៅ

ថ្ងៃសុក្រ ៣ មករា ២០២៥

ដោយ

Dy Bunnara

ក្រុមហ៊ុនអ៊ែតវូដ អ៊ីនវេសមីន បានបង្ហាញពីគម្រោងវិនិយោគធំៗនៅខេត្តព្រះសីហនុ ដែលចាយទុនរយលានដុល្លារអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ ណាទី នាយកគ្រប់គ្រងទូទៅរបស់ក្រុមហ៊ុនអ៊ែតវូដ អ៊ីនវេសមីន បានគូសបញ្ជាក់ថា គម្រោងវិនិយោគដែលក្រុមហ៊ុនបានវិនិយោគក្នុងខេត្តព្រះសីហនុមានដូចជា កំពង់ផែអន្តរជាតិស្ទឹងហាវ រួមទាំងការអភិវឌ្ឍតំបន់សេដ្ឋកិច្ចពិសេសចំនួន ២ កន្លែង។

លោកបន្តថា ខេត្តព្រះសីហនុមានសម្តានុពលទាក់ទាញការវិនិយោគ ដោយសារខេត្តជាប់សមុទ្រនេះមានកំពង់ផែទឹកជ្រៅងាយស្រួលដល់ការដឹកជញ្ជូនទំនិញ និងការធ្វើពាណិជ្ចកម្មទៅក្រៅប្រទេស មានទាំងផ្លូវគមនាគមន៍តភ្ជាប់យ៉ាងប្រទាក់ក្រឡា មានផ្លូវដែក ផ្លូវអាកាស រួមទាំងផ្លូវល្បឿនលឿន ខណៈរដ្ឋាភិបាលក៏បានរៀបចំផែនការអភិវឌ្ឍខេត្តនេះជាទីក្រុងស្នូលនៃប៉ូលអភិវឌ្ឍជាតិ។

រដ្ឋាភិបាលកម្ពុជាបានដាក់ផែនការប្រែក្លាយខេត្តព្រះសីហនុជាតំបន់សេដ្ឋកិច្ចពហុបំណង។ ផែនការមេអភិវឌ្ឍខេត្តព្រះសីហនុជាតំបន់សេដ្ឋកិច្ចពិសេសពហុបំណង គឺជាគម្រោងវិនិយោគដ៏ធំមួយរបស់រាជរដ្ឋាភិបាល ដើម្បីរៀបចំខេត្តព្រះសីហនុ ដោយមានការសិក្សាវិភាគ និងបែងចែកតំបន់អភិវឌ្ឍសេដ្ឋកិច្ចទៅតាមតំបន់សក្តានុពលនីមួយៗ។

ប្រធានលេខាធិការដ្ឋានផែនការមេអភិវឌ្ឍខេត្តព្រះសីហនុ លោក ជា កុកហុង បានគូសបញ្ជាក់ថា ផែនការមេក្នុងការប្រែក្លាយខេត្តសីហនុជាតំបន់សេដ្ឋកិច្ចពហុបំណងគឺជាគម្រោងវិនិយោគដ៏ធំមួយរបស់រដ្ឋាភិបាល សម្រាប់រយៈពេល ១៥ ឆ្នាំទៅមុខ ដោយរួមបញ្ចូលទាំងការកសាងហេដ្ឋារចនាសម្ព័ន្ធ និងការរៀបចំបែងចែកតំបន់ស្នូលសម្រាប់ការអភិវឌ្ឍដូចជាតំបន់កម្មន្តសាល ឡូជីស្ទិក តំបន់កសិឧស្សាហកម្ម និងតំបន់អេកូទេសចរណ៍ពិសិដ្ឋ។

ដើម្បីសម្រេចផែនការមេនេះត្រូវការកៀគរទុនវិនិយោគប្រមាណ ២០ ពាន់លានដុល្លារអាមេរិក។ បើតាមលោក ជា កុកហុង គោលដៅធំគឺអភិវឌ្ឍខេត្តព្រះសីហនុ ឲ្យក្លាយជាមជ្ឍមណ្ឌលឡូជីស្ទិក និងជាទីក្រុងទេសចរណ៍និងឧស្សាហកម្មដ៏ល្បីល្បាញមួយនៅអាស៊ាន៕