ឆ្នាំ ២០២៤ មន្ទីរពេទ្យគន្ធបុប្ផា បានពិគ្រោះព្យាបាលកុមារនិងស្រ្តីមានផ្ទៃពោះជាង១លាន ករណី

ក្នុងរយៈពេលពេញមួយឆ្នាំ ២០២៤ មន្ទីរពេទ្យគន្ធបុប្ផាភ្នំពេញ និងមន្ទីរពេទ្យជ័យវរ្ម័នទី៧ (គន្ធបុប្ផាទី៣) នៅខេត្តសៀមរាប បានទទួលពិគ្រោះព្យាបាលអ្នកជំងឺកុមារ និងស្ត្រីមានផ្ទៃពោះសរុបចំនួន ១ ២៥៣ ៧៧៤ ករណី។

យោងតាមរ​បាយការណ៍របស់មន្ទីរពេទ្យគន្ធបុប្ផា ដែលត្រូវបានផ្សព្វផ្សាយនៅថ្ងៃទី ០៣ ខែ មករា ឆ្នាំ ២០២៥ បានឱ្យដឹងថា ក្នុងចំណោមតួរលេខខាងលើនេះ មន្ទីរពេទ្យបានពិនិត្យព្យាបាលកុមារ នៅផ្នែកពិគ្រោះជំងឺក្រៅ បានចំនួន ៩៤១ ១៦៥ ករណី និងកុមារសម្រាកព្យាបាលក្នុងមន្ទីរពេទ្យ មានចំនួន ១៨៥ ៧៣៥នាក់។

ចំណែកស្ត្រីមានផ្ទៃពោះ បានពិនិត្យតាមដានផ្ទៃពោះ ចំនួន ១០៥ ៣៩៦ករណី, សម្រាលកូន បានចំនួន ២១ ១៣៩នាក់ , ការវះកាត់ទូទៅ ចំនួន ៣១ ២៤៧នាក់ និងវះកាត់ជំងឺបេះដូងពីកំណើត បានចំនួន ១ ០២៩នាក់។ បច្ចុប្បន្ននេះ បុគ្គលិកដែលកំពុងបម្រើការងារនៅមន្ទីរពេទ្យគន្ធបុប្ផា សរុប ២៦៨១នាក់ ។

ឆ្លៀតក្នុងឱកាសនេះ លោកស្រីវេជ្ជបណ្ឌិត អ៊ីវ ម៉ាឡែន អនុប្រធានមន្ទីរពេទ្យគន្ធបុប្ផាភ្នំពេញ តាងនាមឱ្យគណៈគ្រប់គ្រង ក៏ដូចជាបុគ្គលិកនៃមន្ទីរពេទ្យគន្ធបុប្ផាទាំងភ្នំពេញ និងសៀមរាប សូមថ្លែងអំណរគុណយ៉ាងជ្រាលជ្រៅចំពោះរាជ​រដ្ឋា​ភិបាល ក្រសួងសុខាភិបាល មូលនិធិគន្ធបុប្ផាកម្ពុជា មូលនិធិគន្ធបុប្ផាស្វីស ព្រមទាំងសប្បុរសជនទាំងក្នុង និងក្រៅប្រទេស ដែលតែងតែចូលរួមគាំទ្រដល់មន្ទីរពេទ្យដើម្បីជួយបន្តនិរន្តភាពក្នុងការផ្តល់សេវាព្យាបាលដល់កុមារ និងស្រ្តីមានផ្ទៃពោះដោយឥតគិតថ្លៃ។

លោកស្រីបញ្ជាក់ថា ការផ្តល់ជំនួយពីសប្បុរជនគឺជាការជួយសង្គ្រោះជីវិតកុមារ និងផ្តល់អនាគតដល់ទំពាំងស្នងឬស្សីរបស់កម្ពុជា។ លោកស្រីបានថ្លែងយ៉ាងដូច្នេះថា ៖«ជំនួយពីសប្បុរជន ដើម្បីបន្តនូវនិរន្តភាពរបស់មន្ទីរពេទ្យ ក្នុងទិសដៅមនុស្សធម៌ដើម្បីជួយសង្គ្រោះអាយុវជីវិតកុមារកម្ពុជាទូទាំងប្រទេសឱ្យបានជាសះស្បើយ និងផ្តល់នូវពន្លឺនៃក្តីសង្ឃឹមសម្រាប់អនាគតកុមារដែលជាទំពាំងស្នងឬស្សីសម្រាប់ប្រទេសជាតិ៕