ព័ត៌មានជាតិ
រដ្ឋមន្ត្រីការពារជាតិ ព្រមានមិនឱ្យកងទ័ពពាក់ព័ន្ធ ឬនៅពីក្រោយការកាប់ទន្ទ្រានដីធ្លីជុំវិញបឹងទន្លេសាប
អ្នកនាំពាក្យក្រសួងការពារជាតិ បានឱ្យដឹងថា ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ បានព្រមាន មិនឱ្យកងទ័ពទៅពាក់ព័ន្ធ ឬនៅពីក្រោយ សកម្មភាពនៃការកាប់ទន្ទ្រានដីធ្លីនៅជុំវិញបឹងទន្លេសាបឡើយ។ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ លោក ទៀ សីហា ព្រមានដូច្នេះ នៅក្នុងកិច្ចប្រជុំបូកសរុបរបាយការណ៍ការងារឆ្នាំ២០២៤ និងលើកទិសដៅអនុវត្តឆ្នាំ២០២៥ របស់ក្រសួងការពារជាតិ នាព្រឹកថ្ងៃទី០៣ ខែមករា ឆ្នាំ២០២៥នេះ ។

លោក ឈុំ សុជាត ក៏បានឱ្យដឹងថា នៅក្នុងកិច្ចប្រជុំ រដ្ឋមន្រ្តីក្រសួងការពារជាតិ បានណែនាំឱ្យបណ្តាកងអង្គភាពក្រោមចំណុះ យកចិត្តទុកដាក់ពង្រឹងស្មារតី និងសតិអារម្មណ៍កងទ័ព ហើយត្រូវការពារសន្តិសុខ សណ្តាប់ធ្នាប់ ទប់ស្កាត់បដិវត្តន៍ពណ៌កុំឱ្យកើតមាននៅក្នុងព្រះរាជាណាចក្រកម្ពុជា។ នាយឧត្តមសេនីយ៍ ឧបនាយករដ្ឋមន្រ្តី បានជំរុញឱ្យយកចិត្តទុកដាក់បន្ថែមចំពោះអតីតយុទ្ធជន យុទ្ធជនមានពិការភាព និងគ្រួសារកងទ័ព។ បន្ថែមពីនេះ នាយឧត្តមសេនីយ៍បានណែនាំ ឲ្យកងទ័ពយកចិត្តទុកដាក់ ក្នុងការថែទាំគ្រឿងសព្វាវុធ និងយុទ្ធោបករណ៍ឱ្យបានល្អ ដើម្បីទុកសម្រាប់ប្រើប្រាស់ក្នុងពេលហ្វឹកហ្វឺន នាពេលខាងមុខ។

នាយឧត្តមសេនីយ៍ បានជំរុញឱ្យកងទ័ពបន្តកិច្ចសហប្រតិបត្តិការល្អជាមួយប្រទេសជិតខាង ដើម្បីកែប្រែព្រំដែនកម្ពុជា និងប្រទេសជិតខាងជាព្រំដែនសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ។ លោកឧបនាយករដ្ឋមន្រ្តី ក៏បានជំរុញឱ្យកងទ័ពចូលរួមទប់ស្កាត់ព័ត៌មានក្លែងក្លាយ និងឆ្លើយតបឱ្យទាន់ពេលវេលាចំពោះព័ត៌មានក្លែងក្លាយដែលពាក់ព័ន្ធនឹងកងទ័ព។

រដ្ឋលេខាធិការ និងជាអ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាត ក៏បានឱ្យដឹងថា ក្នុងឆ្នាំ២០២៤ កងយោធពលខេមរភូមិន្ទ បានយកចិត្តទុកដាក់ពុះពារអនុវត្តភារកិច្ចរបស់ខ្លួនតាមកម្មវិធីនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ និងភារកិច្ចជាក់ស្តែងចំពោះមុខដោយសម្រេចបាននូវសមិទ្ធផលការងារយ៉ាងល្អប្រសើរជាបន្តបន្ទាប់ ក្នុងនោះ មានការងារល្បាត, ការបង្ការទប់ស្កាត់និងបង្ក្រាបបទល្មើស និងភាពអនាធិបតេយ្យផ្សេងៗ, ការធ្វើកំណែទម្រង់កងយោធពលខេមរភូមិន្ទ, ការចូលរួមការពារសន្តិសុខសុវត្ថិភាពថ្វាយ ព្រះមហាក្សត្រ ជូនប្រមុខរាជរដ្ឋាភិបាល ថ្នាក់ដឹកនាំ, ការចូលរួមក្នុងបេសកកម្មរក្សាសន្តិភាព, ការងារហ្វឹកហ្វឺននិងបំប៉នជំនាញផ្សេងៗ ជាពិសេសបានរៀបចំលំហាត់ហ្វឹកហ្វឺន «នាគមាសឆ្នាំ២០២៤» និងលំហាត់ហ្វឹកហ្វឺនរួមគ្នា «LAND EXTHACAM-2024» ដោយជោគជ័យ និងរលូន។

តាមអ្នកនាំពាក្យ អង្គប្រជុំបានកត់សម្គាល់អំពីភាពជោគជ័យរបស់ កងយោធពលខេមរភូមិន្ទ ក្នុងការចូលរួមបង្ការ បង្ក្រាប និងបន្សាបការញុះញង់របស់ក្រុមអគតិជ្រុលនិយមនៅក្រៅប្រទេស ដែលប៉ុនប៉ងបង្កចលាចលផ្តួលរំលំរាជរដ្ឋាភិបាលស្របច្បាប់ អូសទាញប្រទេសឱ្យធ្លាក់ក្នុងភាពវឹកវរហិង្សា បង្ហូរឈាម និងឈានទៅរកសង្គ្រាមស៊ីវិលសាជាថ្មី តាមរយៈការបង្កើតព្រឹត្តិការណ៍ថ្ងៃទី១៨ ខែសីហា ឆ្នាំ២០២៤។

ទន្ទឹមនឹងលទ្ធផលដែលសម្រេចបានខាងលើ ក្រសួងការពារជាតិ ក៏បានដាក់ចេញនូវទិសដៅអនុវត្តសម្រាប់ឆ្នាំ២០២៥ ដោយបន្តចូលរួមអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល នីតិកាលទី៧, ការបន្តកសាងពង្រឹងកិច្ចការពារជាតិគ្រប់វិស័យ និងភារកិច្ចចំពោះមុខផ្សេងៗទៀត៕


-
ព័ត៌មានអន្ដរជាតិ៥ ថ្ងៃ ago
រថយន្តដឹកសិស្សចុះកម្មសិក្សានៅថៃ ក្រឡាប់ពេលចុះភ្នំ ស្លាប់១៧នាក់ របួសជាង៤០នាក់
-
ព័ត៌មានអន្ដរជាតិ១ សប្តាហ៍ ago
ចិន រកឃើញមេរោគស៊ីសួតថ្មី បង្កក្តីបារម្ភផ្ទុះជំងឺរាតត្បាត ដូច កូវីដ-១៩
-
ព័ត៌មានជាតិ៥ ថ្ងៃ ago
កូនប្រុសអភិបាលខណ្ឌ៧មករា ស្លាប់ទាំងវ័យក្មេង ដោយសារគាំងបេះដូង
-
សន្តិសុខសង្គម៦ ថ្ងៃ ago
បង្ក្រាបហាងផឹកស៊ីបង្កប់សេវាកម្មផ្លូវភេទមួយកន្លែងក្នុងមូលដ្ឋានខណ្ឌសែនសុខ ឃាត់ខ្លួននារីជាង២០នាក់
-
ព័ត៌មានអន្ដរជាតិ៧ ថ្ងៃ ago
ហ្សេលេនស្គី ផ្តាំទៅ ត្រាំ ថា អ៊ុយក្រែន មិនសងអាមេរិក ដាច់ខាត
-
សន្តិសុខសង្គម២ ថ្ងៃ ago
Update៖ អគ្គិភ័យឆេះនៅជិតស្ពានជ្រោយចង្វារ មានទារកពីរនាក់បាត់បង់ជីវិត
-
ព័ត៌មានជាតិ៦ ថ្ងៃ ago
ឯកឧត្តម ឌី វិជ្ជា ប្រាប់ទៅលោក សម រង្ស៊ី ថា ល្មមៗបានហើយ កម្ពុជា មានច្បាប់ត្រឹមត្រូវ មិនមែនធ្វើអ្វីស្រេចលើការនឹកឃើញទេ
-
ជីវិតកម្សាន្ដ១ សប្តាហ៍ ago
គ្រឿងអលង្ការរបស់កញ្ញា លីនដា បង្ហាញខ្លួននៅ Bvlgari ថ្ងៃមុន តម្លៃសរុបចូលដល់ខ្ទង់លានដុល្លារ