តាមរយៈតំណាង, សម្ដេចធិបតីផ្ដល់ផ្លូវបេតុងមួយខ្សែដល់ប្រជាពលរដ្ឋក្នុងឃុំជីផុច ស្រុកមេសាង

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានផ្តល់ផ្លូវបេតុង ១ខ្សែ មានប្រវែង ១ ១៥០ម៉ែត្រ ដល់ប្រជាពលរដ្ឋនៅភូមិយាងតូច ឃុំជីផុច ស្រុកមេសាង ខេត្តព្រៃវែង។

ក្រៅពីផ្លូវបេតុង សម្ដេចធិបតី និងលោកជំទាវបណ្ឌិត ក៏បានប្រគេនដីទំហំ ២៦.០៧០ម៉ែត្រក្រទ្បា ដល់វត្តពោធិសាលា ហៅវត្តយាង ផងដែរ។ ពិធីវេរប្រគេនដី ដែលជាការបរិចាគទានដ៏ថ្លៃថ្លាពីសម្តេចធិបតី និងលោកជំទាវបណ្ឌិត បានរៀបចំឡើងនាព្រឹកថ្ងៃទី៤ ខែមករា ឆ្នាំ២០២៥ ក្រោមវត្តមាននិមន្តរបស់សម្តេចព្រះមហាសុមេធាធិបតី អំ លីមហេង សម្តេចព្រះសង្ឃនាយក គណៈមហានិកាយ។

ក្នុងពិធីនេះ ក៏មានការចូលរួមពីសំណាក់លោក មែ ស៊ីថន ជំនួយការផ្ទាល់សម្តេចធិបតី ហ៊ុន ម៉ាណែត និងលោក សួន សុម៉ាលីន អភិបាលខេត្តព្រៃវែង។

សម្តេចព្រះសង្ឃនាយក មានថេរដីកាថា វត្តអារាមមានតួនាទីយ៉ាងសំខាន់ក្នុងសង្គមជាតិ ដោយបានផ្តល់ម្លប់ដល់​​ពុទ្ធសាសនិក និងជាថ្នាលបណ្ដុះបណ្ដាលចំណេះដឹង ប្រពៃណី ទំនៀមទម្លាប់ វប្បធម៌ អរិយធម៌ របស់បុព្វបុរសខ្មែរគ្រប់សម័យកាល។ ជាក់ស្ដែង​ ទីអារាមនេះមានអាយុកាលជាងមួយសតវត្សរ៍មកហើយ និងបានជាថ្នាលបណ្តុះបណ្តាលចំណេះដឹង​ និងបន្ត​ពង្រឹង​សមត្ថភា​ព​ដល់សមណសិស្ស សិស្ស​ក្នុងវិស័យ​ពុទ្ធិក​សិក្សា ដើម្បី​ឆ្លើយតប​ទៅនឹង​តម្រូវការរបស់ប្រទេសជាតិ ដែលកំពុងត្រូវការធនធានមនុស្សជា​ចាំបាច់សម្រាប់​ពង្រឹងដល់វិស័យពុទ្ធចក្រ និង​អាណា​ចក្រ​។

លោក មែ ស៊ីថន បានលើកឡើងអំពីសារៈសំខាន់ និងឧត្តមប្រយោជន៍នៃការចូលរួមកសាងសមិទ្ធផលក្នុងវត្តអារាម និងតម្លៃនៃការការពារសុខសន្តិភាព ដើម្បីអនាគតរបស់កូនចៅយើងច្រើនជំនាន់ទៅទៀត៕