ព័ត៌មានជាតិ

កសិករស្រុកឯកភ្នំ ប្រមូលផលស្រូវបានចន្លោះពី ៦ ទៅ ៧ តោន/ហិតា ក្រោយមានប្រព័ន្ធផ្លូវទឹកគ្រប់គ្រាន់

បានផុស

៣ ខែ មុន

នៅ

ថ្ងៃចន្ទ ៦ មករា ២០២៥

ដោយ

ក្នុងរយៈពេលចុងក្រោយនេះទិន្នផលស្រូវរបស់ប្រជាពលរដ្ឋនៅក្នុងស្រុកឯកភ្នំ ខេត្តបាត់ដំបង អាចទទួលបានទិន្នផលល្អគ្រាន់បើ ដោយក្នុងនោះកសិករអាចប្រមូលផលស្រូវបានចន្លោះពី ៦ ទៅ ៧ តោនក្នុងមួយហិតា ក្រោយប្រព័ន្ធផ្លូវទឹកជាច្រើនកន្លែងត្រូវបានស្តា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កសិករនៅស្រុកឯកភ្នំ បានឲ្យដឹងថា ក្រោយពីអាជ្ញាធរជំនាញគ្រប់ជាន់ថ្នាក់នៃខេត្តបាត់ដំបង បានគិតគូរខ្ពស់ សំដៅដល់ការលើកកម្ពស់ជីវភាពរបស់ពួកគេជាកសិករដែលពឹងផ្អែកលើវិស័យកសិកម្ម ឆ្នាំនេះដំណាំស្រូវរបស់ពួកគេមិនប្រឈមការខ្វះទឹកដូចគ្រាមុននោះទេ ហើយការដាំដុះស្រូវក្នុងរយៈពេលចុងក្រោយនេះ ពួកគេអាចទទួលបានទិន្នផលខ្ពស់ចន្លោះពី ៦ តោន រហូតដល់ ៧ តោន ក្នុងមួយហិតា។

កសិករ ឡុង សុគន្ធ បានឲ្យដឹងថា លោកបានធ្វើស្រែលើផ្ទៃដីប្រមាណ ១០ ហិតា ដោយក្នុងមួយឆ្នាំធ្វើបានពីររដូវ ប្រាំង និងវស្សា។ លោកថា ការធ្វើស្រូវទាំងពីររដូវនេះ លោកធ្វើបានរយៈពេល ២ ឆ្នាំហើយ គឺបន្ទាប់ពីបានស្តាព្រែកក្ដុល និងមានប្រឡាយខ្វាត់ខ្វែងមានទឹកគ្រប់គ្រាន់សម្រាប់ស្រោចស្រព ហើយទិន្នផលស្រូវលោកអាចប្រមូលបានចន្លោះពី ៦ តោន ដល់ ៧ តោន ក្នុងមួយហិតា។

លោកបន្តថា «ទីផ្សារស្រូវឆ្នាំនេះខ្ញុំលក់បាន ១ តោន ដោយឈ្មួញគិតជាប្រាក់ថៃ អាចលក់បានមួយតោន ១ ម៉ឺន ៧០ បាត (ស្រូវស្រង៉ែ) ហើយតម្លៃនេះបើធៀបនិងតម្លៃលក់កាលពីឆ្នាំមុន វាប្រហាក់ប្រហែលគ្នាដែរ អាចចំណេញសម្រាប់ផ្គត់ផ្គង់ជីវភាពបាន»។

លោក លួន ភក្រ្តា ចៅសង្កាត់រងទី១ សង្កាត់ក្តុលដូនទាវ បានឲ្យដឹងថា លោករីករាយ ក្រោយពីបានឃើញកសិករក្នុងសង្កាត់របស់លោកទទួលបានទិន្នផលស្រូវខ្ពស់ និងទទួលបានទឹកគ្រប់គ្រាន់ដើម្បីបង្កបង្កើនផលដំណាំស្រូវរបស់ពួកគេ ហើយអាចទទួលទិន្នផលស្រូវខ្ពស់ ចន្លោះពី ៦ តោន ដល់ ៧ តោន ក្នុងមួយហិតា ខណៈឆ្នាំនេះ កសិករនៅក្នុងសង្កាត់របស់លោកបានធ្វើការដាំដុះស្រូវប្រមាណ ១៥០ ហិតា អាចធ្វើបាន ២ រដូវ គឺប្រាំង និង វស្សា។

តាមរបាយការណ៍របស់មន្ទីរកសិកម្មខេត្ត បានបង្ហាញថា ស្រុកឯកភ្នំឆ្នាំនេះបានធ្វើការដាំដុះស្រូវប្រាំងបានចំនួន ១៤៨៨ ហិតា ស្មើជាង ៧៤% នៃផែនការ ២០០០ ហិតា។ របាយការណ៍ដដែលបង្ហាញទៀតថា ក្នុងឆ្នាំ២០២៤ ខេត្តបាត់ដំបង បាដាំដុះស្រូវវស្សា ដែលក្នុងនោះមានប្រភេទស្រូវស្រាលដើមរដូវ ស្រូវស្រាលបង្កើនរដូវ ស្រូវស្រាល ស្រូវធ្ងន់ ស្រូវឡើងទឹក មានសរុប ៤៥០ ១៦៥ ហិតា និងប្រមូលផលបាន ២៣២ ៦៥១ ហិតា ស្មើជាង ៥១% គិតត្រឹមថ្ងៃទី២១ ខែវិច្ឆកា ឆ្នាំ២០២៤ ចំណែកការដាំដុះស្រូវប្រាំងបានចំនួន ១៦៤៦៨ ហិតា ស្មើនិងជាង ៦៥% នៃផែនការដាំដុះ ២៥០០០ ហិតា៕

អត្ថបទ៖ សៅ សារិទ្ធ