សមត្ថកិច្ចជំនាញនៃខេត្តសៀមរាប បន្តចុះបង្ក្រាបទីតាំងផ្ទុកឈើល្មើសច្បាប់១កន្លែង នៅកណ្តាលក្រុង

កម្លាំងនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តសៀមរាប សហការជាមួយកម្លាំងរដ្ឋបាលព្រៃឈើខេត្តសៀមរាប បន្តចុះបង្ក្រាបទីតាំងដេប៉ូឈើ១កន្លែងទៀត ហើយបានរកឃើញឈើល្មើសច្បាប់ចំនួន ៨,២៣៩ម៉ែត្រគីប។ ប្រតិបត្តិការនេះធ្វើឡើងនៅវេលាម៉ោង១៤ និង៣០នាទី ថ្ងៃទី០៥ ខែមករា ឆ្នាំ២០២៥ ស្ថិតនៅភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប។

លោក នួន សារ៉ុន ស្នងការរងដឹកនាំការងារការិយាល័យនគរបាលប្រឆាំងបទល្មើសសេដ្ឋកិច្ចខេត្តសៀមរាប បានឲ្យដឹងថា ដោយមានការចង្អុលបង្ហាញរបស់ លោក ហួត សុធី ស្នងការនគរបាលខេត្តសៀមរាប និងក្រោមការសម្របសម្រួលនីតិវិធីដោយ លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តសៀមរាប បានបន្តចុះបង្រ្កាបដេប៉ូឈើ១កន្លែងទៀតក្នុងក្រុងសៀមរាប។ លោកបន្តថា ម្ចាស់ទីតាំងឈ្មោះ ហ៊ឹម យឿន ភេទប្រុស អាយុ ៤៣ឆ្នាំ  សញ្ជាតិ ខ្មែរ នៅភូមិវិហារចិន សង្កាត់ស្វាយដង្គំ ក្រុងសៀមរាប។ តាមការពិនិត្យ និងវាស់វែងជាក់ស្តែងរួមមាន៖ឈើចំរុះសរុប០៣PC ស្មើនឹង ៦៦,៨៦៧ម៉ែត្រគីប (PC គិតចាប់ពីឆ្នាំ២០២៤)⁃ វាស់វែងជាក់ស្ដែង មានចំនួន ៤៥,៤៧០ ម៉ែត្រគីប។វិក័យបត្រលក់ឈើចេញចំនួន ១៦សន្លឹក ស្មើនឹង ២៨,៨៦៩ ម៉ែត្រគីប។ សរុបឈើដែរលសមត្ថកិច្ចដកហូតទាំងអស់ ៨,២៣៩ ម៉ែត្រគីប។

បច្ចុប្បន្នវត្ថុតាងខាងលើ ត្រូវបានកម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តសៀមរាប បានប្រគល់ឲ្យខណ្ឌរដ្ឋបាលព្រៃឈើខេត្តសៀមរាប ដើម្បីអនុវត្តន៍តាមនីតិវិធីផ្លូវច្បាប់។ ប្រភពព័ត៌មានបានឲ្យដឹងថា ការណ៍ដែលកម្លាំងសមត្ថកចិ្ចចុះបង្ក្រាបនេះ គឺបន្ទាប់ពីមានសេចក្តីរាយការណ៍យ៉ាងល្អិតល្អន់ ពីលោកតាន់ គឹមសួរ អ្នកការពារព្រៃឈើនៅកម្ពុជា។

ទោះជាយ៉ាងនេះក្តីគេនៅមិនទាន់ដឹងថា សមត្ថកិច្ចខេត្តសៀមរាប នឹងបន្តចុះពិនិត្យដេប៉ូឈើស្របច្បាប់ក្នុងខេត្តសៀមរាប ដែលលួចលក់ឈើល្មើសច្បាប់បានដល់ឫសគល់ដែរឬទេ ព្រោះសព្វថ្ងៃគេសង្គេតឃើញមានក្រុមឈ្មួញដឹកជញ្ជូនជាហូរហែចេញពីខេត្តព្រះវិហារ ចូលមកខេត្តសៀមរាប យ៉ាងច្រើន។ មហាជនមានសង្ឃឹមយ៉ាងមុតមាំថា កម្លាំងសមត្ថកិច្ចជំនាញនៃខេត្តសៀមរាប និងសហការគ្នាបង្ក្រាបបទល្មើសធនធានធម្មជាតិឲ្យដល់ឫសគល់ដើម្បីឲ្យកូនខ្មែរជំនាន់ក្រោយបានស្គាល់ដើមឈើទាំងនោះផង៕

ដោយ៖ជុន កុសល