ទោះថ្ងៃអាទិត្យ ក៏ ACU ទទួលឯកសារប្រកាសទ្រព្យសម្បត្តិ និងបំណុលបាន ១៦៧ច្បាប់

ទោះថ្ងៃឈប់សម្រាក ក៏ក្រុមការងាររបស់អង្គភាពប្រឆាំងអំពើពុករលួយ (ACU) ចាំទទួលយកឯកសារប្រកាសទ្រព្យសម្បត្តិ និងបំណុល ដែលតួយ៉ាង គ្រាន់នៅថ្ងៃអាទិត្យ ទី០៥ ខែមករា ក្រុមការងារ ACU បានទទួលឯកសារប្រកាសទ្រព្យសម្បត្តិ និងបំណុលសរុបចំនួន១៦៧ច្បាប់។

អង្គភាពប្រឆាំងអំពើពុករលួយ បានបើកទ្វារស្វាគមន៍ចំពោះការមកប្រកាសទ្រព្យសម្បត្តិ និងបំណុល តាមរបប២ឆ្នាំម្ដង ឆ្នាំ២០២៥ រយៈពេលពេញមួយខែ គឺចាប់ពីថ្ងៃទី១ ដល់ថ្ងៃទី៣១ ខែមករា ឆ្នាំ២០២៥។ បើតាមការឱ្យដឹងដោយប្រធាននាយកដ្ឋានប្រកាសទ្រព្យសម្បត្តិ និងបំណុល លោក ញីវ បញ្ញារិទ្ធ គឺគិតចាប់ពីថ្ងៃទី០១ មកដល់ថ្ងៃទី០៥ ខែមករា ក្រុមការងារបានទទួលឯកសារប្រកាសទ្រព្យសម្បត្តិ និងបំណុលចំនួន​ ១៣ ៣២៨ច្បាប់ នៃចំនួនត្រូវប្រកាសសរុប ២២ ៧៧៦រូប។

ដោយឡែក ខេត្តចំនួន៧ មាន ខេត្តប៉ៃលិន កំពង់ចាម ព្រៃវែង កំពង់ស្ពឺ មណ្ឌលគិរី កំពង់ឆ្នាំង និងខេត្តបន្ទាយមានជ័យ ព្រមទាំងគណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ចប់ការប្រកាសទ្រព្យសម្បត្តិ និងបំណុលរបស់ខ្លួន ១០០%។ លោក ញីវ បញ្ញារិទ្ធ ថា នេះជាពិតជាមានលឿនជាងការគ្រោងទុក ហើយលោក លើកទឹកចិត្តដល់ក្រសួង-ស្ថាប័ន និងរាជធានី-ខេត្តផ្សេងទៀត ចូលរួមបំពេញកាតព្វកិច្ចប្រកាសទ្រព្យសម្បត្តិ និបំណុល ឱ្យបានរួសរាន់ តាមកម្មវិធីដែលបានកំណត់។

ក្រុមការងារ នៃនាយកដ្ឋានប្រកាសទ្រព្យសម្បត្តិ និងបំណុល នឹងរង់ចាំទទួលឯកសារប្រកាស ៧ថ្ងៃក្នុងមួយសប្តាហ៍ ដោយមិនឈប់សម្រាកថ្ងៃសៅរ៍ ថ្ងៃអាទិត្យ និងថ្ងៃបុណ្យឡើយ៕