សហជីព កម្មករ និងពលរដ្ឋ ៖ បើគ្មានថ្ងៃជ័យជម្នះ៧មករា ពួក​គាត់​គ្មាន​ឱកាស​ទទួល​បាន​ការងារ​សមរម្យ​ឡើយ

ភ្នំពេញ ៖ សហជីព កម្មករ និងប្រជាពលរដ្ឋកម្ពុជា បានអះអាង​ថា ប្រសិនបើគ្មានថ្ងៃជ័យជម្នះ ៧មករា ឆ្នាំ១៩៧៩ទេ ពួក​គាត់​នឹងគ្មានឱកាសទទួលបានការងារសមរម្យ គ្មានពេលវេលាជួបជុំគ្រួសារ និងគ្មាន​សិទ្ធិ​សេរីភាព​គ្រប់​បែប​យ៉ាង​ដូចសព្វថ្ងៃនេះទេ ខណៈពួកគាត់បានប្ដេជ្ញាការពារសន្ដិភាពជាមួយរាជរដ្ឋាភិបាលឱ្យបានគង់វង្សយូអង្វែងថែមទៀត។

លោក សំ សឿន ប្រធានសហភាពពលកម្មជាតិកម្ពុជាបានថ្លែងថា «ក្នុងនាមជាសហជីព ខ្ញុំសូមអំពាវនាវដល់ប្រជាពលរដ្ឋ និងកម្មករសូមបន្តថែរក្សាសន្តិភាព និងបន្តការចងចាំមរតកជ័យជម្នះ៧មករា ដើម្បី​ថែ​រក្សាសន្តិភាព បង្ករកង្កើតការងារ និងចូលរួមអភិវឌ្ឍន៍ប្រទេសជាតិយើងឳ្យរីកចម្រើនថែមទៀត»។

លោកបានថ្លែងថា បើគិតត្រឹមឆ្នាំ១៩៩០មក កម្ពុជា​បាន​ចាប់​ផ្ដើម​មាន​រោងចក្រសហគ្រាសបណ្ដើៗ ព្រមទាំងបានយកសេដ្ឋកិច្ចទីផ្សារសេរី តាម​រយៈការលើកទឹកចិត្តវិនិយោគរវាងវិស័យឯកជន និងការនាំចេញ។ ចាប់ពីនោះមកសហគ្រាស រោងចក្រ ទាំងសហគ្រាសខ្នាតតូច និងមធ្យមបានរីកចម្រើនជាបន្តបន្ទាប់ដែលកំពុងធ្វើអាជីវកម្មនៅប្រទេសកម្ពុជា។

លោកបានបន្ថែមថា សហគ្រាសទាំងនោះ បានបង្កើតការងារដោយផ្ទាល់ និងដោយប្រយោល សម្រាប់ប្រជាពលរដ្ឋកម្ពុជា និងចូលរួមដល់កំណើនសេដ្ឋកិច្ចជាតិ ដែលតាមការប៉ាន់ស្មាន ការងារដែលបង្កើតដោយវិស័យឯកជន មានប្រមាណជិត ៣លានកន្លែង នេះបើយោងតាមការសិក្សារបស់ធនាគារពិភពលោកប្រចាំកម្ពុជា។

លោក អ៊ុន ដារ៉ា ប្រធានសហភាព​សហជីពកម្ពុជាពន្លឺកម្មករបានថ្លែងថា «ដោយសារមានសន្តិភាពយើងអាចមានឱកាសទៅធ្វើការនៅក្រៅប្រទេស មានវិនិយោគ មានរោងចក្ររាប់ពាន់កន្លែង ហើយយើងមានការងារធ្វើលានកន្លែងដូច្នេះសូមបងប្អូនកុំភ្លេច ៧មករា ឆ្នាំ១៩៧៩ជាកំណើតទីពីររបស់យើង»។

លោកបន្តថា ដោយសារកត្តាសន្ដិភាពទាំងអស់នេះ បានធ្វើឱ្យកម្ពុជា​មានឱកាសពង្រីកវិសាលភាព​វិស័យការងារកាន់​តែធំទូលាយតាមរយៈ​ការទាក់ទាញ​វិនិយោគិនបរទេសមកបណ្ដាក់ទុនរកស៊ីនៅក្នុងប្រទេស និងការលើកទឹកចិត្តដល់សហគ្រាស រោងចក្រនៅក្នុងស្រុកផងដែរ។

លោកថា ក្រសួងការងារ និងបណ្តុះបណ្តាលវិជ្ជាជីវៈ ដែលជាសេនាធិការឱ្យរាជរដ្ឋាភិបាល បាននិងកំពុងធ្វើការយ៉ាងសកម្មភាពក្នុងការបង្កើតបាននូវបរិយាកាសទំនាក់ទំនងវិជ្ជាជីវៈឱ្យកាន់តែប្រសើរនៅតាមរោងចក្រ សហគ្រាស និងបានបណ្តុះបណ្តាលជំនាញដល់យុវជន និងកម្លាំងពលកម្មជាច្រើនម៉ឺននាក់ក្នុងរយៈពេលមួយឆ្នាំៗដែលជាសក្តានុពលមួយសម្រាប់អ្នកវិនិយោគិនបរទេស។

លោក អ៊ុន គិនសេរីដ្ឋា អាយុ ៥៤ឆ្នាំ ជាប្រជាពលរដ្ឋរស់នៅខណ្ឌសែនសុខ​បានប្ដេជ្ញាចូលរួម​សន្ដិភាព និងដឹងគុណចំពោះថ្ងៃជ័យជម្នះ៧មករា ឆ្នាំ១៩៧៩ ដែលលោកចាត់ទុកថា ជាថ្ងៃកំណើតទី២របស់លោក និងក្រុមគ្រួសារ។

លោក​ថា «ថ្ងៃ៧មករា ជាថ្ងៃរស់រានមានជីវិតរបស់ប្រជាជនទូទាំងប្រទេស ដោយសារមានការលះបង់របស់ថ្នាក់ដឹកនាំមួយចំនួន ដើម្បីរំដោះ​ប្រទេសជាតិ​ធ្វើ​ឱ្យ​ប្រទេសជាតិមានសន្តិភាពមានការរីកចម្រើនលើគ្រប់វិស័យ និង​មាន​រោងចក្រ​សហគ្រាស​ទូទាំងប្រទេស ខ្ញុំសូមអរគុណសន្ដិភាព»។

ចំណែកពលរដ្ឋម្នាក់ទៀតលោក សាត សុគន្ធ អាយុ ៥៣ឆ្នាំ រស់​នៅ​ខេត្ត​កណ្តាល​បាន​និយាយ​ថា «ខ្ញុំ​សូម​អរគុណសន្តិភាពបានធ្វើឳ្យពួកខ្ញុំបានរស់រានមានជីវិតដល់សព្វថ្ងៃនេះ និងរស់នៅបានសុខស្រួល យើងមានសន្តិភាពដោយសារមានសម្ដេចតេជោ ហ៊ុន សែន ជាអតីតនាយកមន្ត្រីដែលបានរំដោះប្រជាជនខ្មែរពីពួកខ្មែរក្រហមនៅថ្ងៃទី៧មករាមក»។

បើគ្មានថ្ងៃ៧មករា និងគ្មានសន្ដិភាព លោក ម៉ាត់ សាលី ជា​កម្មក​រោងចក្រ​នៅ​ខេត្តតាកែវបាននិយាយថា លោក​ក៏​គ្មានឱកាសរស់នៅជួបជុំគ្រួសារនោះទេ។ ជាពិសេសលោកនឹងមិនមានឱកាសក្នុងការទទួលបានការងារសមរម្យនៅជិតផ្ទះ ហើយក៏មិនមានប្រាក់ចំណូលសម្រាប់ផ្គត់ផ្គង់គ្រួសារដែរ។

ដូច្នេះកម្មកររូបនេះ​បាន​ចង​ចាំ​គុណបំណាច់ថ្ងៃ៧មករា «ខ្ញុំអរគុណសម្រាប់ថ្ងៃទី៧មករា ដែលជាថ្ងៃយើងមានសុខសន្តិភាពឡើងវិញ នៅ​ពេល​មាន​សន្តិភាពយើងអាចប្រកបមុខរបរ ដើរកម្សាន្តនៅតាមបណ្ដាខេត្តនិងកន្លែងកម្សាន្តនានា ដោយសេរី គ្មាន​ការ​ផិតភ័យ យើងមានសិទ្ធិសេរីភាព និងមានការងារធ្វើគ្រប់គ្រាន់សម្រាប់ប្រជាពលរដ្ឋ»។

បើនិយាយលើការបង្កើតការងារសរុបវិញ បច្ចុប្បន្ន​សេដ្ឋកិច្ច​កម្ពុជា​បានបង្កើតការងារប្រមាណ ១០លានកន្លែងនៅទូទាំងប្រទេស ដែល​បាន​មក​ពី​វិស័យកសិកម្ម ឧស្សាហកម្ម និងសេវាកម្ម ក្នុងនោះវិស័យកសិកម្មបង្កើតការងារ មានចំណែករហូតដល់៥០% នៃការងារសរុប។ ហើយក្រុមហ៊ុនបរទេសវិញ ក៏បានបង្កើតការងារប្រមាណ ១លានកន្លែងនៅប្រទេសកម្ពុជា។ ភស្ដុតាងទាំងអស់នេះហើយ បានជារដ្ឋាភិបាលកម្ពុជា ចាត់ទុកយន្តការសេដ្ឋកិច្ច គាំទ្រដល់ការវិនិយោគជាកត្តាសំខាន់បង្កើតការងារសម្រាប់ប្រជាពលរដ្ឋកម្ពុជា។

សេដ្ឋកិច្ចកម្ពុជាបង្កើតការងារ ស្ថាប័នអភិវឌ្ឍនានានៅកម្ពុជា ធ្លាប់លើកឡើងថា បើកំណើនសេដ្ឋកិច្ចកម្ពុជាសម្រេចបាន ៧%ប្រចាំឆ្នាំ នោះសេដ្ឋកិច្ចនឹងបង្កើតការងារបានជាមធ្យមចំនួន ១៦ម៉ឺននាក់។ បច្ចុប្បន្ន បើគិតត្រឹមរយៈពេល ៥ខែដើមឆ្នាំ ២០២៣ គម្រោងវិនិយោគបរទេសទាំងអស់បង្កើតការងារប្រមាណ ៧ម៉ឺនកន្លែងនៅទូទាំងប្រទេស ដែលភាគច្រើននៅវិស័យកាត់ដេរសំលៀកបំពាក់។ បើគ្មានអ្វីប្រែប្រួល និងស្ថិរភាពនយោបាយ សេដ្ឋកិច្ចសេដ្ឋកិច្ចកម្ពុជានឹងបង្កើតការងារតាមការគ្រោងទុក តាមរយៈនយោបាយសេដ្ឋកិច្ច ជំរុញការវិនិយោគក្នុងស្រុក និងបរទេស។

កត្តាសន្ដិភាព​នេះ​ហើយ ​ដែលរដ្ឋាភិបាលកម្ពុជា​មានឱកាសខិតខំប្រឹងប្រែង​អនុវត្តន៍​គោលនយោបាយ ទាក់ទាញវិនិយោគបរទេស និងការលើកទឹកចិត្តសហគ្រាសក្នុងស្រុក ដើម្បីបង្កើតការងារក្នុងនោះតាមរយៈនយោបាយសេដ្ឋកិច្ចកន្លងមក ក្រុមហ៊ុនក្នុងស្រុកបង្កើតការងារបាន ២លាន៨សែនកន្លែង និងក្រុមបរទេសបង្កើតការងារបាន ១លានកន្លែងនៅទូទាំងប្រទេសកម្ពុជា៕