កម្ពុជា-ឥណ្ឌូនេស៊ី ចង់បង្កើនពាណិជ្ជកម្មអង្ករ និងអាហារហាឡាល់

កម្ពុជា និងឥណ្ឌូនេស៊ីស្វាគមន៍កិច្ចខិតខំប្រឹងប្រែងក្នុងការបង្កើនពាណិជ្ជកម្មអង្ករ និងជំរុញកិច្ចសហប្រតិបត្តិការក្នុងឧស្សាហកម្មអាហារហាឡាល់ បន្ទាប់ពីមើលឃើញថាទំនាក់ទំនងពាណិជ្ជកម្មរវាងប្រទេសទាំងពីរកើនឡើងលើស១ពាន់លានដុល្លារ។

ក្នុងសេចក្ដីប្រកាសព័ត៌មានចុះថ្ងៃទី៧ ខែមករា ឆ្នាំ២០២៤ ក្រសួងការបរទេសឱ្យដឹងថាការជំរុញនេះធ្វើឡើងក្នុងជំនួបរវាងឧបនាយករដ្ឋមន្ត្រី រដ្ឋមន្ត្រីការបរទេសលោក ប្រាក់ សុខុន និងឯកអគ្គរដ្ឋទូតឥណ្ឌូណេស៊ីប្រចាំកម្ពុជាលោក Santo Darmosumarto នៅទីស្ដីការក្រសួងការបរទេសកាលពីថ្ងៃទី៦ ខែមករា កន្លងទៅ។

ក្នុងជំនួបនោះឧបនាយករដ្ឋមន្ត្រី បា្រក់ សុខុន បាន​រម្លឹក​ពីការគាំទ្រ​របស់ប្រទេសឥណ្ឌូណេស៊ីចំពោះដំណើរការសន្ដិភាពនៅកម្ពុជា និងបានកោតសរសើរចំពោះទំនាក់ទំនងទ្វេភាគីរវាងប្រទេសទាំងពីរលើវិស័យនយោបាយ សេដ្ឋកិច្ច​ និងកិច្ចសហប្រតិបត្តិការលើវិស័យការពារជាតិ។ ក្នុងពេលដែលទំនាក់ទំនងពាណិជ្ជកម្មក្នុងឆ្នាំ២០២៣ កើនដល់លើស១ពាន់លានដុល្លារអាមេរិករួចមកភាគីទាំងពីរក៏ចង់ឱ្យមានការបង្កើតពាណិជ្ជកម្មអង្ករ និងអាហារហាឡាល់បន្ថែមផងដែរ។

ក្នុងសេចក្ដីប្រកាសនោះបានបញ្ជាក់ថា៖ «ឯកឧត្តមឧបនាយករដ្ឋមន្ត្រី និងឯកឧត្តមឯកអគ្គរដ្ឋទូត មានទស្សនៈរួមគា្នថា ប្រទេសទាំងពីរមានឱកាសច្រើនថែមទៀតក្នុងការពង្រីកពាណិជ្ជកម្មទ្វេភាគី»។

គួរឱ្យដឹងដែរថា ប្រទេសកម្ពុជានាំចេញអង្ករលើកដំបូងទៅប្រទេសឥណ្ឌូណេស៊ី កាលពីចុងឆ្នាំ២០២៣កន្លងទៅតាមកិច្ចព្រមព្រៀងខែសីហា ដែលប្រទេសនេះទិញអង្ករចំនួន ១២៥ ០០០តោនពីកម្ពុជា៕  

អត្ថបទដោយ ហ៊ុន សិរីវឌ្ឍន៍