ឆ្នាំ២០២៤ អ្នកដំណើរចេញចូលតាមច្រកទ្វារព្រំដែន​អន្តរជាតិ​​ត្រពាំងស្រែ កើនឡើងជិត ៣ ម៉ឺននាក់

ភ្ញៀវជាតិនិងអន្តរជាតិ ចេញចូលប្រទេសកម្ពុជាតាមច្រកទ្វារអន្តរជាតិត្រពាំងស្រែ​ក្នុង​ខេត្ត​ក្រចេះ​​នៅ​ឆ្នាំ ២០២៤ មានការកើនឡើងបើធៀបឆ្នាំ ២០២៣។ នេះបើតាម​មន្រ្តី​ប្រចាំការ​ទីស្នាក់ការត្រួតពិនិត្យច្រកទ្វារព្រំដែនអន្តរជាតិត្រពាំងស្រែ​ក្នុង​ខេត្ត​ក្រចេះ​បានឲ្យដឹង។

ភ្ញៀវចេញចូលប្រទេសកម្ពុជា​តាមច្រកទ្វារអន្តរជាតិត្រពាំងស្រែ​ក្នុងឆ្នាំ២០២៤ មានចំនួនសរុប ៨៩,៦៧៨ នាក់ បើធៀបនឹងប្រចាំឆ្នាំ២០២៣ ​មាន​ចំនួន ៦១,៦៤០នាក់ កើនឡើងចំនួន ២៨,០៣៨នាក់។ ដោយឡែក ភ្ញៀវបរទេសមានចំនួនសរុប ៧៩,៣១៤ នាក់ បើធៀបឆ្នាំ២០២៣ ​មាន​ចំនួន ៥២,៧២៨នាក់កើនឡើងចំនួន ២៦,៥៨៦នាក់ ក្នុងនោះភាគច្រើនជាជនជាតិវៀតណាម។

ជាមួយគ្នានោះ ទីស្នាក់ការត្រួតពិនិត្យច្រកទ្វារព្រំដែនអន្តរជាតិត្រពាំងស្រែ បានធ្វើទិដ្ឋាការ ចេញ-ចូលជូនភ្ញៀវកើនឡើង ចំនួន ៧០៦ នាក់ បើធៀបឆ្នាំ២០២៣។ ក្នុងនោះទិដ្ឋាការទេសចរណ៍ T (Tourist) ចំនួន ៦៧០ នាក់ និង​ទិដ្ឋាការ ធម្មតាចំនួន ១,៥៩៩នាក់ សរុប ២ ២៦៩ នាក់៕

អត្ថបទ៖ ប្រុញ វិធិន