អភិបាលរាជធានី​​ចុះ​ពិនិត្យ​ប្រឡាយ​ រំដោះទឹកកុំឱ្យលិចលង់នៅរដូវវស្សា

អភិបាលនៃគណៈអភិបាលរាជធានីភ្នំពេញ លោកឃួង ស្រេង នៅព្រឹកថ្ងៃទី០៨ មករា បានដឹកនាំមន្ទីរជំពាញនិងអាជ្ញាធរដែនដីចុះពិនិត្យមើលស្ថានភាពប្រឡាយជាច្រើននៅក្នុងមូលដ្ឋានខណ្ឌសែនសុខ និងខណ្ឌឬស្សីកែវ ដើម្បីរិះរកគ្រប់មធ្យោបាយ​ ធ្វើយ៉ាងណាដោះស្រាយឱ្យបាននូវការលិចលង់ដោយជំនន់ទឹកភ្លៀងនារដូវវស្សាខាងមុខនេះ។

លោកឃួង ស្រេង បានដឹកនាំមន្ទីរជំនាញ ពិសេសមន្ទីរសាធារណការ និងដឹកជញ្ជូនរាជធានីភ្នំពេញនិងអាជ្ញាធរខណ្ឌចុះពិនិត្យនៅទីតាំងប្រឡាយអូរអាគុជ ក្នុងមូលដ្ឋានខណ្ឌសែនសុខ ហើយបន្តរហូតដល់ស្ថានីយបូមទឹកគីឡូម៉ែត្រលេខ៩ ក្នុងភូមិសាស្ត្រខណ្ឌឬស្សីកែវ ខណៈដែលស្ថានីយបូមទឹកគីឡូម៉ែត្រលេខ៩ បានកំពុងសាងសង់ជិតរួចរាល់។

ក្នុងឱកាសនៃការចុះពិនិត្យប្រឡាយនោះដែរ លោកឃួង ស្រេង បានធ្វើការណែនាំឱ្យពង្រីកនិងស្តារប្រឡាយអូរអាគុជ រហូតដល់ប្រឡាយមេខាងជើង ការដាក់លូជ្រុងទំហំ ៤ ម៉ែត្រ កាត់ផ្លូវ ១០០៧ ដើម្បីរំដោះទឹកភ្លៀងនៅផ្លូវ ១៩៨៦ និងតំបន់មួយចំនួនក្នុងសង្កាត់ភ្នំពេញថ្មី ដោយសារតំបន់នេះឧស្សាហ៍ទទួលរងការលិចលង់នៅពេលភ្លៀងខ្លាំងម្តងៗ។

ជាមួយគ្នានោះ លោកឃួង ស្រេង បានណែនាំឱ្យមន្ទីរសាធារណការ និងដឹកជញ្ជូនរាជធានីភ្នំពេញ ស្តារប្រឡាយពោងពាយ ប្រឡាយអូរវែង ដល់ប្រឡាយមេខាងជើង។ ដាក់លូទំហំ ១ ម៉ែត្រកន្លះ កាត់ផ្លូវលេខ ១០០៣ ដាក់លូជ្រុងនៅផ្លូវ K2 ដើម្បីដោះស្រាយការលិចលង់នៅលើផ្លូវហាណូយ ធ្វើយ៉ាងណាអាចនាំទឹកហូរចូលទៅប្រឡាយពោងពាយ បន្តទៅ​ស្ថានីយបូមទឹកកប់ស្រូវ និងស្ថានីយបូមទឹកគីឡូម៉ែត្រលេខ៩ ក្នុងភូមិសាស្ត្រខណ្ឌឬស្សីកែវ។

បន្ថែមពីនេះទៀត លោកឃួង ស្រេង បានណែនាំ​ឲ្យ​មន្ទីរសាធារណការ និងដឹកជញ្ជូនរាជធានីភ្នំពេញសិក្សាឱ្យបានលំអិត​បន្ថែមទៀត ដើម្បីរំដោះទឹកភ្លៀងចេញពីផ្លូវ ៥៩២ នៅតំបន់សាលារៀនបឋមសិក្សាទួលគោក ក្នុងភូមិសាស្ត្រខណ្ឌទួលគោក និងបានជម្រុញ​ឲ្យ​អាជ្ញាធរខណ្ឌធ្វើការណែនាំឱ្យប្រជាពលរដ្ឋ កុំបោះសំរាម ចូលក្នុងឡាយទឹក ដើម្បីកាត់បន្ថយបាននូវការលិចលង់ដោយជំនន់ទឹកភ្លៀង៕

អត្ថបទ៖ ស្រីរ័ត្ន