អាជ្ញាធរ និងមន្ត្រីជំនាញខេត្តកែប បន្តចុះពិនិត្យ​ឱសថស្ថាន៥ទីតាំងក្នុងក្រុងកែប ដើម្បីបញ្ជាក់គុណភាព និងលុបបំបាត់ឱសថក្លែងក្លាយ

កាលពីរសៀលថ្ងៃទី៨ ខែមករា ឆ្នាំ២០២៥ លោក ប៊ុន យោង អភិបាលរងខេត្តកែប បានដឹកនាំអាជ្ញាធរពាក់ព័ន្ធ និងមន្ដ្រីជំនាញ ចុះត្រួតពិនិត្យតាមទីតាំងលក់ ឱសថស្ថាន ចំនួន ៥កន្លែងក្នុងភូមិសាស្ត្រក្រុងកែប ដើម្បីត្រួតពិនិត្យគុណភាពថ្នាំ និងលុបបំបាត់កុំឱ្យមានឱសថក្លែងក្លាយ។

លោក ប៊ុន យោង បានបញ្ជាក់ឲ្យដឹងថា ក្នុងការចុះត្រួតពិនិត្យលើកនេះ យ៉ាងហោចណាស់ឱសថចំនួន ១៤មុខ ត្រូវបានរកឃើញមិនមានការចុះបញ្ជី និងហួសសុពលភាពត្រូវបានមន្ត្រីជំនាញធ្វើកាដកហូត ហើយអាជ្ញាធរបានឲ្យម្ចាស់ឱសថស្ថានទាំងនោះធ្វើកិច្ចសន្យាកុំឱ្យមានបន្តទៀត។

លោកអភិបាលបាលរងខេត្តកែប បានប្រាប់ឱ្យដឹងទៀតថា ការបន្តចុះត្រួតពិនិត្យនេះ គឺដើម្បីពង្រឹងគុណភាពសេវាសុខាភិបាល នៅក្នុងមូលដ្ឋានឱ្យកាន់តែមានប្រសិទ្ធភាពល្អប្រសើរបន្ថែមទៀត នៅក្នុងនោះរដ្ឋបាលខេត្តកែប ក្រោមការដឹកនាំរបស់ លោក សោម ពិសិដ្ឋ អភិបាលខេត្តកែប បានយកចិត្តទុកដាក់ខ្ពស់ដើម្បីពង្រឹង ក្នុងការផ្តល់ឱសថនៅតាមឱសថស្ថានឯកជន និងរដ្ឋ ដោយទប់ស្កាត់នូវការលក់ឱសថក្លែងក្លាយ ឱសថគ្មានចុះការបញ្ជីដែលធ្វើឱ្យប៉ះពាល់ដល់សុខភាពរបស់ប្រជាពលរដ្ឋដែលទិញយកទៅប្រើប្រាស់។

លោកក៏បានណែនាំដល់ម្ចាស់លក់ឱសថស្ថានទាំង ៥ទីតាំង ត្រូវតែប្រកាន់ខ្ជាប់នូវក្រមសីលធម៌ និងវិជ្ជាជីវៈជូនដល់គ្រួសារប្រជាពលរដ្ឋ ព្រមទាំងអនុវត្តឱ្យបានត្រឹមត្រូវតាមការណែនាំរបស់ក្រសួងសុខាភិបាលដែលបាន និងកំណត់ច្បាប់ផងដែរ៕

អត្ថបទ៖ សឹង រ៉ាត់