ព័ត៌មានជាតិ

អាជ្ញាធរខណ្ឌទួលគោក ចាត់វិធានការក្ដៅចំពោះអាជីវករយកចំណីផ្លូវធ្វើជាអាជីវកម្ម

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ៩ មករា ២០២៥

ដោយ

កម្លាំងគណៈបញ្ជាការឯកភាពខណ្ឌទួលគោក បានចាត់វិធានការក្ដៅចំពោះអាជីវករដែលយកចំណីផ្លូវធ្វើជាអាជីវកម្មដោយដាក់តាំងលក់ទំនិញ និងចតរថយន្ត ដើម្បីផ្ទេរទំនិញ ធ្វើឲ្យមានការកកស្ទះចរាចរណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីរសៀលថ្ងៃទី ៨ ខែមករា ឆ្នាំ ២០២៥ លោក ជា ពិសី អភិបាល នៃគណៈអភិបាលខណ្ឌទួលគោក បានប្រគល់ភារកិច្ចជូន លោក ស៊ឹប សុផង់ អភិបាលរងខណ្ឌ ទទួលបន្ទុកសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ បានដឹកនាំកម្លាំងគណៈបញ្ជាការឯកភាពចុះរៀបចំសណ្ដាប់ធ្នាប់របៀបរៀបរយ អនាម័យ បរិស្ថាន និងអនុវត្តវិធានការរដ្ឋបាល ចំពោះអាជីវករលក់ដូរផ្លែឈើ ការចតយានយន្តគ្រប់ប្រភេទ និងការចតយានយន្តលើកដាក់ ឬ ផ្ទេរទំនិញនៅលើចិញ្ចើមផ្លូវ។

លោក ស៊ឹប សុផង់ អភិបាលរង បានដឹកនាំកម្លាំងគណៈបញ្ជាការឯកភាពខណ្ឌទួលគោក បន្តចុះរៀបចំសណ្ដាប់ធ្នាប់ និងបាញ់ថ្នាំកំណាត់ព្រំ នៅកំណាត់ផ្លូវលេខ ២៣១ ជាប់ផ្សារនាគមាស ចាប់ពីចំណុចផ្លូវលេខ ២៣០ ដល់មហាវិថីមុន្នីរ៉េត(២១៧) ចំពោះរថយន្តដែលយកផ្លូវសាធារណៈជាកន្លែងផ្ទេរទំនិញ និងក្រុមអាជីវករតាំងលក់បន្លែ ផ្លែឈើ លើផ្លូវ ២៣៤ បង្កការកកស្ទះចរាចរណ៍ដល់អ្នកធ្វើដំណើរមិនអាចឆ្លងកាត់បាន អាជ្ញាធរនឹងចាត់វិធានការរដ្ឋបាលចំពោះអ្នករំលោភយកចិញ្ចើមផ្លូវ ដាក់តាំងលក់ទំនិញលើផ្លូវសាធារណៈ។

លោកបានលើកឡើងថា លោកបានដឹកនាំកម្លាំងសណ្ដាប់ធ្នាប់ធ្វើការរៀបចំនៅលើកំណាត់ផ្លូវលេខ ២៣៩ បន្តទៀត ដោយសារតែតំបន់នោះមានសភាពស្មុគស្មាញ ដោយអាជីវករយកចំណីផ្លូវធ្វើជាអាជីវកម្ម មិនអាចធ្វើដំណើរបាន បង្កការកកស្ទះ។ ក្នុងនោះ អាជ្ញាធរបានយកផ្លែឈើមួយចំនួនដែលតាំងលក់នៅលើចំណីផ្លូវយកទៅសាលាខណ្ឌ ដើម្បីឲ្យម្ចាស់មកធ្វើការណែនាំ និងធ្វើកិច្ចសន្យាបញ្ឈប់សកម្មភាពដាក់តាំងលក់បន្តទៀត។

គួរបញ្ជាក់ថា កន្លងទៅកម្លាំងគណៈបញ្ជាការឯកភាពខណ្ឌទួលគោកបានអនុញ្ញាតឲ្យក្រុមអាជីវករដែលលក់ដូរនៅកំណាត់ផ្លូវលេខ ២៣០ លក់នាពេលយប់ជាបណ្ដោះអាសន្ន ហើយនៅវេលាម៉ោង ៦ ព្រឹក បរិស្ថានអនាម័យត្រូវតែស្អាត។ ប៉ុន្តែក្រុមអាជីវករលែងស្ដាប់ជាមួយអាជ្ញាធរ មិនមែនលក់តែពេលយប់តែប៉ុណ្ណោះទេ ក្រុមអាជីវករបានតាំងលក់ទាំងយប់ទាំងថ្ងៃ បិទផ្លូវស្ទើរទាំងស្រុងតែម្ដង៕

អត្ថបទ ៖ ម៉េង