ព័ត៌មានជាតិ

ប្រៀបធៀបតម្លៃស្រូវសែនក្រអូប និង អូអឹមនៅខេត្តពោធិ៍សាត់ខុសគ្នាជិត ៥០០ រៀល

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ៩ មករា ២០២៥

ដោយ

មន្រ្តីក្រសួងកសិកម្ម រុក្ខាប្រមាញ់ និងនេសាទបានបង្ហាញពីតម្លៃស្រូវពីរប្រភេទដែលប្រមូលទិញពីកសិករនៅខេត្តពោធិ៍សាត់ ដែលលក់តម្លៃខុសគ្នាជិត ៥០០ រៀល។

លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម បានលើកពីតម្លៃនិងប្រៀបធៀបតម្លៃស្រូវសែនក្រអូប និងស្រូវអូអឹម (OM) នៅខេត្តពោធិ៍សាត់ ដែលស្រូវសែនក្រអូបអាចលក់បានតម្លៃ ១២១០ រៀល ស្របពេលដែលស្រូវ OM បានត្រឹមតែ ៧៥០ រៀល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធតម្លៃស្រូវខុសគ្នានេះ លោក ឃឹម ហ្វីណង់ បានគូសបញ្ជាក់ថា ពូជស្រូវយុទ្ធសាស្ត្ររបស់កម្ពុជានៅតែបង្ហាញភាពស៊ាំទៅនឹងហានិភ័យទីផ្សារស្រូវមកពីប្រទេសដទៃ ទោះបីជាទីផ្សារអង្ករនៅលើទីផ្សារអន្តរជាតិកំពុងមានភាពមិនច្បាស់លាស់ក៏ដោយ។

លោកបានលើកយកចំណុចពិសេសនៃអង្ករក្រអូបខ្មែរ មានស្ថេរភាពថ្លៃ មានការធានាទិញពីទីផ្សារក្នុងស្រុក មានបណ្តាញពូជសុទ្ធ អាចបង្កើនតម្លៃបន្ថែមដល់សេដ្ឋកិច្ចជាតិ ជាពិសេសអង្ករក្រអូបខ្មែរ មានគោលនយោបាយគាំទ្រដែលរដ្ឋអាចជួយអន្តរាគមន៍បានក្នុងករណីចាំបាច់។

ពលរដ្ឋម្នាក់បានចោទសួរថា «តើយើងមានដំណោះស្រាយជាបណ្តោះអាសន្នលើតម្លៃស្រូវ OM ដែលកំពុងធ្លាក់ចុះយ៉ាងគំហុកនេះដែរឬទេ ព្រោះតម្លៃស្រូវភាគច្រើនធ្លាក់ចុះចំពេលកសិករប្រមូលផល?

លោក ឃឹម ហ្វីណង់ បានឆ្លើយតបថា «គ្មានអ្វីដែលមិនប្រែប្រួលនោះទេ ថ្លៃកសិផលគោរពតាមគោលការណ៍នៃសេដ្ឋកិច្ចទីផ្សារ គឺសមតុល្យនៃទំហំផ្គត់ផ្គង់និងតម្រូវការ។ តែអ្វីដែលយើងដឹងនៅពេលនេះគឺបើវៀតណាមមិនទិញអូអឹមទេ ការផ្គត់ផ្គង់នឹងលើស ហើយអ្នកក្នុងស្រុកមិនអាចជួយទិញបានទេ ព្រោះយើងមិនហូបអូអឹម ហើយយើងក៏មិនអាចកិនអង្ករអូអឹមនាំចេញបានដែរ គេអាចប្តឹងយើងបាន។ ផ្ទុយទៅវិញ យើងនៅត្រូវការសែនក្រអូបច្រើនទៀត ហើយបើទោះពេលមានបញ្ហា ក៏យើងមានគោលនយោបាយអាចគាំទ្រជួយទិញបានដែរ ដូចជាបញ្ចេញលុយឱ្យរោងម៉ាសុីនជួយទិញជាដើម»។

កសិករមួយរូបបានប្រៀបធៀបពូជស្រូវសែនក្រអូបរបស់ខ្មែរ និងអូអឺមនាំចូលថា ស្រូវសែនក្រអូបអាយុ ១០៥ ថ្ងៃ ធ្វើបានផលតែ ៤ តោន ខណៈដែល ស្រូវ OM 5451 អាយុ ៩០ ថ្ងៃ ធ្វើបានផល ៧ តោន។

ប្រិយមិត្តម្នាក់បានចូលខមមិនឆ្លើយតបថា «បងអាចថ្លឹងថ្លែងបាន រវាងទិន្នផលទាបជាង មានស្ថេរភាពតម្លៃ និងទិន្នផលខ្ពស់ជាង តែតម្លៃប្រែប្រួលចុះឡើងខ្លាំង។ បើតម្លៃ OM បានតម្លៃលើស 800 រៀល ច្បាស់ណាស់សែនក្រអូបមិនអាចឈ្នះ OM បានទេ តែបើ OM តម្លៃទាបជាង 800រៀល ច្បាស់ណាស់ថា សែនក្រអូបនៅតែប្រសើរជាង ខណៈសែនក្រអូបតម្លៃបានចន្លោះ 1200រៀល-1400រៀល/គក មិនប្រែប្រួល។ នេះគិតតែចំណូលដុល មិនទាន់ប្រៀបធៀបចំណាយ»។

ជាមួយគ្នានេះលោក ឃឹម ហ្វីណង់ ក៏បានឆ្លើយតបបន្ថែមថា «មិនខុសទេ តែសម្រាប់អ្នកធ្វើក្នុងពេលបច្ចុប្បន្ន បើដាំអូអឹមគឺខាត តែបើដាំសែនក្រអូបនៅតែចំណេញ។ បើពេញចិត្តដាំអូអឹម នៅបន្តដាំទៀតបាន តែយើងមិនអាចគាំទ្រពូជគេបាននោះទេ ព្រោះអីផ្សារនៅលើគេ»។