ព័ត៌មានជាតិ

ផ្លូវបេតុង ១ ខ្សែ នៅភូមិត្រពាំងថ្លាន់ រងការទ្រុឌទ្រោមដោយសារឡានដឹកដី ពលរដ្ឋស្នើអាជ្ញាធរមានវិធានការ និងជួសជុលឡើងវិញ

បានផុស

១ ខែ មុន

នៅ

ថ្ងៃសុក្រ ១០ មករា ២០២៥

ដោយ

ក្រុមឈ្មួញឡានដឹកដី ដឹកថ្ម ខ្សាច់ លើសទម្ងន់ បាននិងកំពុងបើកកាត់លើផ្លូវបេតុង ១ ខ្សែ នៅភូមិត្រពាំងថ្លាន់ បណ្ដាលឲ្យទ្រុឌទ្រោម រងការខូចខាតយ៉ាងធ្ងន់ធ្ងរ ស្ទើរក្លាយទៅជាផ្លូវលំបាត់ទៅហើយ ដោយប្រជាពលរដ្ឋស្នើអាជ្ញាធរមានវិធានការ និងជួសជុលឡើងវិញផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងផ្លូវខូចខាតនេះ ស្ថិតនៅភូមិត្រពាំងថ្លាន់ សង្កាត់ពន្សាំង ខណ្ឌព្រែកព្នៅ ចាប់ពីកែងផ្លូវ ៤២ រហូតទល់នឹងកែងវត្តឈូកក្រពុំ ស្រុកអង្គស្នួល។

ប្រជាពលរដ្ឋរស់នៅតាមបណ្ដោយផ្លូវបេតុងខាងលើ បានរអ៊ូរទាំប្រាប់ កម្ពុជាថ្មី ដូចៗ គ្នា ថា ១ ថ្ងៃៗ មានឡានដឹកដីថ្មធំ-តូច ខ្លះ ដឹកតទ្រុងខ្ពស់រាប់រយគ្រឿង បើកលើផ្លូវបេតុង ១ ខ្សែនេះ បង្កឲ្យហុយដីទៀតផង ពិបាកក្នុងការរស់នៅ។ ផ្លូវបេតុងនេះ ស្ទើរក្លាយទៅជាផ្លូវលំដីទៅហើយ ដោយខូចទំហំធំៗ សឹងទាំងអស់ ទោះបីជាដាក់លូអមសងខាងដើម្បីរារាំងឡានធំទាំងនោះ ក៏គ្មានប្រសិទ្ធភាពដែរ។

ដោយឡែកចំពោះស្ថានភាពផ្លូវ និងសកម្មភាពចរាចរណ៍របស់ក្រុមឡានដឹកដី យុវសិស្សឈ្មោះ ផានិត បានប្រាប់ឲ្យ កម្ពុជាថ្មី ដឹងថា រាល់ថ្ងៃពេលគាត់ជិះម៉ូតូទៅមកសាលារៀនគឺពិបាករឿងផ្លូវមួយហើយ ចំណែកអ្វីសំខាន់នោះ ភ័យខ្លាចជួបគ្រោះថ្នាក់ចរាចរណ៍ថែមទៀត ព្រោះថា ១ ថ្ងៃៗ ឡានដឹកដី ថ្ម ខ្សាច់ មានតូច មានធំ កង់ ៦ កង់ ១០ ដឹកធ្ងន់ៗ បើកកៀកៗ នឹងម៉ូតូ រហូតពេលខ្លះសុខចិត្តគេចដល់ចិញ្ចើមផ្លូវទៀតផង។

ជុំវិញការលើកឡើងរបស់ពលរដ្ឋខាងលើ ក្នុងគោលបំណងសំណូមពរដល់អាជ្ញាធរ ជំនាញពាក់ព័ន្ធ ជាពិសេស លោក ធឹម សំអាន អភិបាល នៃគណៈអភិបាលខណ្ឌព្រែកព្នៅ សូមមេត្តាចុះមកពិនិត្យមើលផ្លូវនេះផង និងមានវិធានការរដ្ឋបាលទៅលើក្រុមឡានដឹកដីទាំងនោះ។ ផ្លូវ ១ ខ្សែនេះ មានប្រវែងប្រហែលជាង ២ គីឡូម៉ែត្រ ស្ថិតក្នុងភូមិសាស្ត្រមូលដ្ឋានចំនួន ២ គឺ ខណ្ឌព្រែកព្នៅ និងស្រុកអង្គស្នួល។

ទាក់ទិនករណីផ្លូវបេតុង ១ ខ្សែនេះ កម្ពុជាថ្មី បានទាក់ទងសាកសួរព័ត៌មានទៅ លោក ធឹម សំអាន អភិបាលខណ្ឌព្រែកព្នៅ តាមរយៈតេឡេក្រាម រយៈពេល ២ ថ្ងៃ មកហើយ លោកបានចូលពិនិត្យមើល ប៉ុន្តែមិនឆ្លើយតបអ្វីទាំងអស់៕

អត្ថបទ ៖ សំណាង