កម្ពុជារំពឹងថា នឹងអាចលុបបំបាត់ជំងឺគ្រុនចាញ់ឲ្យអស់ទាំងស្រុងនៅឆ្នាំ២០២៥នេះ

មន្ត្រីជាន់ខ្ពស់នៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានដាក់ក្តីរំពឹងថាប្រសិនបើមិនមានវិបត្តិ ឬឧបសគ្គអ្វីមួយមករារាំងទេ កម្ពុជានឹងអាចលុបបំបាត់ជំងឺគ្រុនចាញ់ឲ្យអស់ទាំងស្រុងនៅឆ្នាំ២០២៥នេះ ដោយសារពីមួយឆ្នាំទៅមួយឆ្នាំបានកាត់បន្ថយករណីជំងឺគ្រុនចាញ់ថយចុះស្ទើរមួយរយភាគរយ និងមិនមានអ្នកស្លាប់ដោយសារជំងឺនេះរយៈពេល៧ឆ្នាំជាប់គ្នាមកហើយ។

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ និងបាណកសាស្ត្របានមានប្រសាសន៍នៅព្រឹកថ្ងៃទី១១មករានេះថា ប្រទេសកម្ពុជាបានបញ្ចប់លែងមានករណីស្លាប់ដោយសារជំងឺគ្រុនចាញ់តាំងពីឆ្នាំ២០១៨ ហើយយុទ្ធសាស្រ្តជាតិលុបបំបាត់ជំងឺគ្រុនចាញ់ឆ្នាំ២០១១-២០២៥ ដែលកំពុងប្រតិបត្តិនេះ គឺជាត្រីវិស័យ​ដ៏ត្រឹមត្រូវ ដែលសមស្របតាមយុទ្ធសាស្រ្តតំបន់ និងសកលលោក។

លោកវេជ្ជបណ្ឌិតបានបន្តថា ការយកចិត្តទុកដាក់ និងគាំទ្រខ្ពស់ពីក្រសួងសុខាភិបាល ពិសេសពីលោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងមានកិច្ចសហការពេញលេញពីគ្រប់ដៃគូពាក់ព័ន្ធក្រោមយន្តការសម្របសម្រួលអភិបាលកិច្ចតម្រង់ទិសបច្ចេកទេសផ្ទាល់ជាប្រចាំរបស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ប៉ារ៉ាស៊ីតសាស្ត្រ
និងបាណកសាស្ត្រ គឺជំងឺគ្រុនចាញ់កំពុងឆ្ពោះទៅសូន្យករណីនៃការចម្លងក្នុងតំបន់ និងក៏កំពុងបន្តឈានទៅសូន្យករណីក្នុងគ្រប់ភូមិសាស្រ្តទូទាំងប្រទេសនាដំណាច់ឆ្នាំ២០២៥ ដែលជាគោលដៅចុងក្រោយ។

លោកវេជ្ជបណ្ឌិតរំលឹកថា មុនពេលមានយុទ្ធសាស្រ្តជាតិលុបបំបាត់ជំងឺគ្រុនចាញ់ឆ្នាំ២០១១-២០២៥ ដែលបានផ្តួចផ្តើមផ្ទាល់ដោយសម្តេចតេជោ ត្រូវបានចាប់ផ្តើមអនុវត្តន៍នោះ គឺករណីជំងឺគ្រុនចាញ់រាយការណ៍មានជិត២០ម៉ឺនករណីក្នុងមួយឆ្នាំ (ជាមធ្យមមាន១៣ម៉ឺនករណីក្នុងមួយឆ្នាំៗ) និងស្លាប់ ៧០០ទៅ៨០០ នាក់ក្នុងមួយឆ្នាំ។

លោកវេជ្ជបណ្ឌិត ហ៊ុយ រ៉េកុល ពន្យល់ថា មូលហេតុដែលបណ្តាលឱ្យករណីជំងឺគ្រុនចាញ់មានការចុះនេះ គឺដោយសារយើងបានបន្ថែមវិធីសាស្ត្រ និងបង្កើនការផ្សព្វផ្សាយដល់ប្រជាពលរដ្ឋដែលរស់នៅក្នុងសំបុកចម្លងជំងឺគ្រុនចាញ់ឱ្យបានយល់ដឹងកាន់តែច្បាស់ពីវិធីការពារជំងឺគ្រុនចាញ់ ផ្តល់ថ្នាំបង្ការការពារដល់ប្រជាពលរដ្ឋរស់នៅតំបន់ប្រឈមខ្ពស់ជាងគេទៅនឹងជំងឺគ្រុនចាញ់ដូចជា នៅស្រុកប្រតិបត្តិសែនមនោរម្យ នៅខេត្តមណ្ឌលគីរី និងស្រុកប្រតិបត្តិភ្នំក្រវ៉ាញខេត្តពោធិ៍
សាត់ ក៏ដូចជាផ្តល់មុងជ្រលក់ថ្នាំដល់ប្រជាពលរដ្ឋមានមុខរបរចូលព្រៃប្រចាំថ្ងៃផងដែរ។ ក្រៅពីនេះយើងមានសម្ភារគ្រប់គ្រាន់ដូចជាឧបករណ៍ធ្វើតេស្តរកមេរោគគ្រុនចាញ់ មុងជ្រលក់ថ្នាំការពារជំងឺគ្រុនចាញ់ និងឱសថព្យាបាលជំងឺគ្រុនចាញ់ប្រកបដោយប្រសិទ្ធភាពខ្ពស់។

លោកវេជ្ជបណ្ឌិត បានបន្ថែមទៀតថា ជាងនេះទៅទៀតមានការចូលរួមគាំទ្រពីថ្នាក់ដឹកនាំគ្រប់ជាន់ថ្នាក់ មន្ទីរសុខាភិបាល
រាជធានីខេត្ត អាជ្ញាធរមូលដ្ឋានអង្គការដៃគូពិសេសប្រមុខរាជរដ្ឋាភិបាលកម្ពុជាបានដាក់ចេញយុទ្ធសាស្ត្រជាតិលុបបំបាត់ជំងឺគ្រុនចាញ់ក្រោមការចង្អុលបង្ហាញទិសដ៏ត្រឹមត្រូវរបស់លោកសាស្ត្រាចារ្យ ម៉ម ប៊ុនហេង អតីតរដ្ឋមន្ត្រីក្រសួងសុខាភិបាលទើបបានធ្វើឲ្យការងារប្រយុទ្ធនឹងជំងឺគ្រុនចាញ់ទទួលបានលទ្ធផលល្អប្រសើរ។

គួរបញ្ជាក់ថា ឆ្នាំ២០២៤ កម្ពុជាមានអ្នកឆ្លងជំងឺគ្រុនចាញ់ចំនួន៣១២ករណី និងគ្មានស្លាប់ បើធៀបនឹងឆ្នាំ២០២៣
មានការថយចុះ៧៦%ស្មើនឹង៣១២ករណីលើ១ ៣៨៤ករណី៕

អត្ថបទ៖ សំអឿន