អ្នកនាំពាក្យ៖ សាធារណជនជាង ១៤ លាននាក់ បាននិងកំពុងចូលរួមប្រយុទ្ធនឹងសំរាម សំណល់ប្លាស្ទិក តាមមូលដ្ឋាន

លោក ខ្វៃ អាទិត្យា អ្នកនាំ​ពាក្យ​ក្រសួងបរិស្ថាន បាន​គូស​បញ្ជាក់​​ឱ្យ​ដឹង​ថា គិត​មក​ដល់​ពេល​បច្ចុប្បន្ន​នេះសាធារណជន​សរុប​ជាង ១៤ លាននាក់​នៅទូទាំងប្រទេសកម្ពុជាបាន​និង​កំពុង​ចូល​រួម​យុទ្ធនាការ​ប្រយុទ្ធនឹងសំរាមនិង​សំណល់​ប្លាស្ទិក នៅ​តាម​មូលដ្ឋាន តាម​រយៈ​ការ​ដាក់​ចេញ​យុទ្ធនាការ​​ជា​បន្ត​បន្ទាប់​របស់​ក្រសួង​បរិស្ថាន​។

លោក ខ្វៃ អាទិត្យា បានមានប្រសាសន៍ថា ក្រសួងបរិស្ថានបានដាក់​ចេញនូវយុទ្ធនាការ​កាត់បន្ថយ​ការប្រើប្រាស់​ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើ ថង់ប្លាស្ទិកទេ» កាលថ្ងៃទី០១ ខែកញ្ញា ឆ្នាំ២០២៣ កន្លងទៅ ហើយរហូតមកដល់ពេលនេះ មានអ្នកចូលរួម ៩,៧០៦,២៦៨ អង្គ/នាក់។ ​យុទ្ធនាការនេះ បានចាប់ផ្តើមពី​សាលារៀន ដែលជាថ្នាលបណ្តុះកោសិកាសង្គម និងបានចូលរួម កាត់បន្ថយការប្រើប្រាស់ថង់ប្លាស្ទិកក្នុង ១ថ្ងៃ ប្រមាណជាង ៣០លានថង់។

បន្ថែមពីនេះ ក្រសួងបរិស្ថានបានដាក់ចេញនូវយុទ្ធនាការទី២ បន្ថែមទៀតគឺយុទ្ធនាការ «កម្ពុជាស្អាត ខ្មែរធ្វើបាន» នៅថ្ងៃទី១៥ ខែឧសភា ឆ្នាំ២០២៤ រហូតមកដល់ពេលនេះ មានអ្នកចូលរួមក្នុងយុទ្ធនាការ ចំនួន៥,០៦០,៣៦៩អង្គ/នាក់។ យុទ្ធនាការ «កម្ពុជាស្អាត ខ្មែរធ្វើបាន» បាននាំឱ្យសិស្សានុសិស្ស លោកគ្រូអ្នកគ្រូ ព្រះសង្ឃ អាជ្ញាធរមូលដ្ឋានគ្រប់ថ្នាក់ រួមជាមួយប្រជាពលរដ្ឋ នៅតាមមូលដ្ឋានភូមិ ឃុំ នៅតាមស្រុក ក្រុង ស្រុក ខណ្ឌ នានាទូទាំងប្រទេស ចេញមកព្រមគ្នារើសសំរាមជុំវិញបរិវេណផ្ទះ សាលារៀន វត្តអារាម តាមទីសាធារណៈ និងនៅតាមដងផ្លូវក្នុងមូលដ្ឋាន រៀងរាល់ ១ថ្ងៃក្នុង ១សប្តាហ៍ យ៉ាងតិច ដោយធ្វើការប្រមូល និងទុកដាក់សំរាមឱ្យបានត្រឹមត្រូវ។

អ្នកនាំពាក្យ រូប​នេះ បានអះអាងថា «តាមរយៈយុទ្ធនាការទាំងពីររបស់ក្រសួងបរិស្ថានខាងលើ បានទទួលការគាំទ្រពីសាធារណជនសរុបជាង ១៤ លាននាក់ ក្នុងការប្តេជ្ញាចិត្ត និងចូលរួមសកម្មភាពកាត់បន្ថយការប្រើប្រាស់ប្លាស្ទិក រើសសំរាម ប្រមូលទុកដាក់សំរាម សំណល់ប្លាស្ទិក យ៉ាងផុសផុល ដែលជាជោគជ័យ លើស ពីការរំពឹងទុក ដែលធ្វើឱ្យប្រទេសកម្ពុជា​អាចកាត់​បន្ថយថង់ប្លាស្ទិក​បាន​យ៉ាងច្រើនសន្ធឹកសន្ធាប់ និងការទុកដាក់សំរាម តាមរយៈការចូលរួមសាមគ្គីគញនាពីសំណាក់ប្រជាពលរដ្ឋ​គ្រប់​ស្រទាប់ និង​សិស្សានុសិស្ស​ជា​ដើម»។

អ្នកនាំពាក្យក្រសួអបរិស្ថានរូបនេះ បានបន្ថែមថា បច្ចុប្បន្ននេះ នៅ​តែ​មាន​សាលារៀន វត្តអារាមនានា នៅតាមរោងចក្រ សហគ្រាស គ្រឹះស្ថានរដ្ឋនិងឯកជន នៅតាមមូលដ្ឋាន បានកំពុងចូល​រួមនៅក្នុង​យុទ្ធនាការនេះ​ជាបន្តបន្ទាប់​​ជា​រៀងរាល់ថ្ងៃ។

លើស​ពីនេះទៀយ តាមរយៈការដាក់ចេញយុទ្ធនការជាជំហានៗរបស់ក្រសួអបរិស្ថាន ដែលឆ្លើយតប​នឹងសរសរ​ស្តម្ភ «ភាពស្អាត» នៃ​យុទ្ធសាស្រ្តចក្រាវិស័យបរិស្ថាន ក្នុង​គោលបំណងដើម្បីឱ្យកម្ពុជា មានភាពស្អាត មិនមានសំរាម និងសំណល់ប្លាស្ទិក រាយប៉ាយ ប្រយុទ្ធទប់ស្កាត់សំរាមនៅលើដងផ្លូវ កាត់បន្ថយការប្រើប្រាស់ថង់ប្លាស្ទិក និងការបំពុលដោយសំរាម និង​សំណល់ប្លាស្ទិក​ទៅលើសុខភាព និង​លើកកម្ពស់សោភ័ណភាពទីក្រុង ទីប្រជុំជន ព្រមទាំងក្នុងមូលដ្ឋាន ជុំវិញផ្ទះ កន្លែង​ធ្វើការ គ្រឹះស្ថាន​សាធារណៈនិងឯកជន ជាពិសេសនៅតាមដងផ្លូវនានា ដែលនឹងបន្តក្លាយទៅជាវប្បធម៌ និងទម្លាប់ល្អ របស់ប្រជាជនកម្ពុជាក្នុងការរក្សាភាពស្អាត៕

​​​