ថ្ងៃនេះ កាលពី៤០ឆ្នាំមុន សម្តេចតេជោ ហ៊ុន សែន ត្រូវបានសភាបោះឆ្នោតឱ្យធ្វើជានាយករដ្ឋមន្រ្តីដឹកនាំកម្ពុជា

ថ្ងៃទី១៤ ខែមករា ឆ្នាំ១៩៨៥-ថ្ងៃទី១៤ ខែមករា ឆ្នាំ២០២៥នេះ គឺជាខួបលើកទី៤០ឆ្នាំដែលសភាបានបោះឆ្នោតឱ្យសម្តេចតេជោ ហ៊ុន សែន កាន់តំណែងជាប្រធានក្រុមប្រឹក្សារដ្ឋមន្ត្រី ដែលពេលនេះហៅថា នាយករដ្ឋមន្ត្រីណបន្ទាប់ពីបំពេញតួនាទីជាប្រធានក្រុមប្រឹក្សារដ្ឋមន្ត្រីស្តីទីពីខែកញ្ញាឆ្នាំ១៩៨៤ ពេលអតីតនាយករដ្ឋមន្រ្តី ចាន់ ស៊ី ទៅព្យាបាលជំងឺនៅទីក្រុងមូស្គូ និងទទួលមរណភាពនាខែធ្នូ ឆ្នាំ១៩៨៤។ គ្រានោះ គឺជាពេលវេលាដែលប្រទេសកម្ពុជាស្ថិតនៅក្នុងភាពលំបាក ដោយសារតែងើបចេញពីភ្នក់ភ្លើងសង្រ្គាមស៊ីវិល។

នៅបណ្តាញសង្គមហ្វេសប៊ុក និងតេឡេក្រាមនៅព្រឹកព្រលឹមថ្ងៃអង្គាសរនេះ សម្តេចតេជោ ហ៊ុន សែន បានរំលឹកឡើងវិញថា មុនកាន់តំណែងជានាយករដ្ឋមន្ត្រី សម្តេចបានកាន់តំណែងជារដ្ឋមន្ត្រីក្រសួងការបរទេសពីខែមករា ឆ្នាំ១៩៧៩ ដល់ ខែមិថុនា ឆ្នាំ១៩៨១ក្នុងវ័យ២៧ឆ្នាំ។ ខែមីនា១៩៨១ ក្នុងវ័យ២៩ឆ្នាំ សម្តេចតេជោ ក៏បានកាន់តំណែងជាអនុប្រធានក្រុមប្រឹក្សារដ្ឋមន្ត្រី និងជារដ្ឋមន្ត្រីក្រសួងការបរទេស និងកាន់តំណែងជាប្រធានក្រុមប្រឹក្សារដ្ឋមន្រ្តីក្នុងវ័យ៣២ឆ្នាំ ដែលអាចចាត់ទុកជារដ្ឋមន្ត្រី ជាឧបនាយករដ្ឋមន្ត្រី និងជានាយករដ្ឋមន្ត្រីដែលក្មេងជាងគេនាពេលនោះ។

សរុបនៃការកាន់តំណែងដឹកនាំរដ្ឋ ទាំងរដ្ឋាភិបាលរហូតមកដល់ព្រឹទ្ធសភានាពេលនេះ គឺសម្តេចតេជោ បានដឹកនាំប្រទេសមានរយៈពេល៤៦ឆ្នាំហើយ និងប្រសិនបើគិតទាំងការតស៊ូប្រឆាំងការឈ្លានពានរបស់បរទេស និងប្រឆាំងរបបប្រល័យពូជសាសន៍ប៉ុល ពត គឺមានរយៈពេល៥៥ឆ្នាំ(១៩៧០-២០២៥)។

សម្តេចតេជោ បានសរសេរបញ្ជាក់ថា៖ «ជាងពាក់កណ្តាលសតវត្សរ៍នៃដំណើរជីវិត ការលំបាកបានគ្របដណ្តប់មិនតិចជាង៩០ភាគរយនោះឡើយ។ ខ្ញុំនៅចងចាំពាក្យដែលខ្ញុំថ្លែងក្នុងសភាក្រោយជាប់ឆ្នោតជាប្រធានក្រុមប្រឹក្សារដ្ឋមន្រ្តីថា មិនត្រូវទុកឱ្យប្រជាជនណាម្នាក់ស្លាប់ដោយអត់បាយដែលយើងមិនបានដឹង និងមិនបានដោះស្រាយនោះឡើយ។ មូលហេតុដែលខ្ញុំលើកឡើងបែបនេះ ដោយសាររដូវវស្សាឆ្នាំ១៩៨៤ មានទឹកជំនន់ផង និងរាំងស្ងួតផង ដែលធ្វើឲ្យប្រជាជនខ្វះស្បៀងយ៉ាងធ្ងន់ធ្ងរ»។ សម្រាប់សម្តេចតេជោ អាទិភាពនៃការងារដំបូងរបស់សម្តេច គឺដោះស្រាយស្បៀងជូនប្រជាជនដែលនេះ គឺជាមូលហេតុមួយដែលជំរុញឱ្យសម្តេចធ្វើការកែទម្រង់សេដ្ឋកិច្ចដោយចាប់ផ្តើមពីការកែទម្រង់ដីធ្លីគឺផ្តល់កម្មសិទ្ធិដីជូនប្រជាជន៕