ទស្សនកិច្ច៣ថ្ងៃ ប្រធានសភាម៉ាឡេស៊ី នឹងជួបជជែកជាមួយថ្នាក់ដឹកនាំកម្ពុជាលើការពង្រឹងទំនាក់ទំនងប្រទេសទាំងពីរ

ប្រធានរដ្ឋសភាម៉ាឡេស៊ី នឹងអញ្ជើញធ្វើទស្សនកិច្ចជាផ្លូវការនៅកម្ពុជារយៈពេល៣ថ្ងៃ ដោយលោក គ្រោងនឹងជួបពិភាក្សាការងារជាមួយថ្នាក់ដឹកនាំកម្ពុជាទៅលើការពង្រឹងពង្រីកទំនាក់ទំនងជាមិត្តភាពរវាងប្រទេសទាំងពីរ​ ពិសេសពាក់ព័ន្ធនឹងកិច្ចសហប្រតិបត្តិការសភា។

ដំណើរទស្សនកិច្ចជាផ្លូវការរបស់ប្រធានរដ្ឋសភាម៉ាឡេស៊ី នឹងចាប់ពីថ្ងៃទី១៦ ដល់ថ្ងៃទី១៨ ខែមករា ឆ្នាំ២០២៥ ដែលតបតាមការអញ្ជើញរបស់សម្តេចធិការធិបតី ឃួន សុដារី ប្រធានរដ្ឋសភានៃកម្ពុជា។ នេះយោងតាមសេចក្ដីជូនដំណឹងរបស់អគ្គលេខាធិការដ្ឋានរដ្ឋសភា។

ដំណើរទស្សនកិច្ចរបស់គណៈប្រតិភូជាន់ខ្ពស់រដ្ឋសភាម៉ាឡេស៊ី ដឹកនាំលោក តាន់ស៊ី ដាតូ ហ្សូហារីប៊ីន អាប់ឌុល (H.E. Tan Sri Dato (Dr.) Johari Bin Abdul) នាពេលនេះ ធ្វើឡើងក្នុងគោលបំណង ដើម្បីពង្រឹងនិងពង្រីកកិច្ចសហប្រតិបត្តិការសភានៃប្រទេសទាំងពីរឱ្យកាន់តែមានភាពរឹងមាំ និងស៊ីជម្រៅបន្ថែមទៀត ទាំងក្នុងក្របខ័ណ្ឌទ្វេភាគី និងពហុភាគី ដោយតម្កល់ផលប្រយោជន៍របស់ប្រជាជន និងប្រទេសជាតិជាស្នូល។

នៅក្នុងដំណើរទស្សនកិច្ចនេះ លោក តាន់ស្រី ជាតូ ហ្សូហារី ប៊ីន អាប់ឌុល និងគណៈប្រតិភូ មានគម្រោងអញ្ជើញជួបសម្តែងការគួរសមជាមួយសម្តេចតេជោ ហ៊ុន សែន ប្រធានព្រឹទ្ធសភា ជំនួបចរចាទ្វេភាគីជាមួយសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងអញ្ជើញជួបសម្តែងការគួរសម និងពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ផងដែរ៕