អភិបាលក្រុងខេមរភូមិន្ទ ជំរុញដល់ពលរដ្ឋយកចិត្តទុកដាក់ថែរក្សាសុខភាព ខណៈអាកាសធាតុចុះត្រជាក់

លោកអភិបាលក្រុងខេមរភូមិន្ទ បានជំរុញដល់ប្រជាពលរដ្ឋរស់នៅក្នុងសង្កាត់ទាំង៣ ត្រូវយកចិត្តទុកដាក់ខ្ពស់ពីការថែរក្សាសុខភាព ខណៈប៉ុន្មានថ្ងៃនេះមានអាកាសធាតុធ្លាក់ត្រជាក់ ករណីមានជំងឺសូមប្រញាប់ទៅមន្ទីរពេទ្យ។

លោក ភូថង សេរីវុឌ្ឍី អភិបាលក្រុងខេមរភូមិន្ទ បានជួបសំណេះសំណាលជាមួយប្រជាពលរដ្ឋក្រីក្រចំនួន៣៣គ្រួសារមកពីសង្កាត់ស្មាច់មានជ័យ សង្កាត់ដងទង់ និងសង្កាត់ស្ទឹងវែង ដោយនាំយកគ្រឿងឧបភោគបរិភោគ និងថវិកាមួយចំនួនផ្តល់ជូន។

លោកអភិបាលក្រុងខេមរភូមិន្ទ ក៏ផ្តាំផ្ញើដល់ប្រជាពលរដ្ឋបន្ថែមអំពីការថែទាំសុខភាពអំឡុងអាកាសធាតុចុះត្រជាក់នាពេលប៉ុន្មានចុងក្រោយនេះដែលងាយបង្កជាជំងឺផ្សេងៗ ពិសេសមនុស្សវ័យចំណាស់ និងកុមារ។ ហើយការផ្តល់គ្រឿងឧបភោគបរិភោគ និងថវិកាមួយចំនួនផ្តល់ជូនពលរដ្ឋនៅពេលនេះ គ្រាន់តែជួយសម្រួលការលំបាកមួយគ្រាប៉ុណ្ណោះ។

លោក ភូថង សេរីវុឌ្ឍី ស្នើសុំដល់ពលរដ្ឋជួយអប់រំកូនចៅ ដោយធ្វើយ៉ាងណាឱ្យចៀសឆ្ងាយពីការសេពគ្រឿងញៀន ឬចូលក្រុមក្មេងទំនើងដែលសង្គមមិនផ្តល់តម្លៃអោយនោះទេ និងប្រឈមនឹងទោសទណ្ឌតាមច្បាប់ទៀត ព្រោះថា បច្ចុប្បន្ន រាជរដ្ឋាភិបាលកំពុងយកចិត្តទុកដាក់ ក៏ដូចជាដាក់បទបញ្ជាជាច្រើនដល់កងកម្លាំងប្រដាប់ និងអាជ្ញាធរមូលដ្ឋាន តាមដានទប់ស្កាត់ពីបញ្ហាក្មេងទំនើង បញ្ហាគ្រឿងញៀន អំពើហិង្សាក្នុងគ្រួសារ ព្រមទាំងផ្តល់សេវាសាធារណៈនានាជូនពលរដ្ឋ៕

អត្ថបទ៖សិរីវឌ្ឍនៈ