ព័ត៌មានជាតិ

អាជ្ញាធរខណ្ឌពោធិ៍សែនជ័យ ឈូសឆាយបេតុងដែលចាក់រំលោភផ្លូវសាធារណៈ កាត់សំយាប និងពង្រីកផ្លូវ សម្រួលការធ្វើដំណើរ

បានផុស

៣ ខែ មុន

នៅ

ថ្ងៃព្រហស្បតិ៍ ១៦ មករា ២០២៥

ដោយ

អាជ្ញាធរខណ្ឌពោធិ៍សែនជ័យ ប្រើប្រាស់គ្រឿងចក្រឈូសឆាយបេតុងចាក់រំលោភផ្លូវសាធារណៈ និងកាត់សំយាបសង់រំលោភលើផ្លូវ ព្រមទាំងពង្រីកផ្លូវ ដើម្បីងាយស្រួលដល់ការធ្វើដំណើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីថ្ងៃទី ១៥ ខែមករា ឆ្នាំ ២០២៥ ម្សិលមិញនេះ លោក ប៉ាង លីដា បានដឹកនាំក្រុមការងាររដ្ឋបាលខណ្ឌ ចុះពិនិត្យការឈូសឆាយពង្រាបបេតុងចាក់លើទ្រូងផ្លូវ និងកាត់សំយាប ស្ថិតនៅផ្សារទួលពង្រ ភូមិទួលពង្រ និងផ្លូវបេតុង ភូមិត្រពាំងរំចេក សង្កាត់ចោមចៅទី ១ ខណ្ឌពោធិ៍សែនជ័យ រាជធានីភ្នំពេញ។

លោក ប៉ាង លីដា អភិបាលរងខណ្ឌពោធិ៍សែនជ័យ បានប្រាប់ឲ្យ កម្ពុជាថ្មី ដឹងថា ការចុះពិនិត្យនេះ ដោយសារតែប្រជាពលរដ្ឋមួយចំនួនចាក់បេតុងនៅលើផ្លូវសាធារណៈ ទើបទឹកមិនអាចហូរ មានទឹកដក់លើផ្លូវ ពិបាកក្នុងការធ្វើដំណើរ និងផ្ទះមួយចំនួនបានតសំយាបមកលើផ្លូវ ធ្វើឲ្យទំហំផ្លូវកាន់តែតូចទៅៗ បង្កឲ្យមានការកកស្ទះចរាចរណ៍។

លោកបន្តថា ការចាក់បេតុងលើផ្លូវបែបនេះ ធ្វើឲ្យប៉ះពាល់ដល់ការធ្វើដំណើរ មានទឹកដក់លើផ្លូវ និង បាត់បង់សោភ័ណភាពតាមដងផ្លូវ។

ជាមួយនោះ អាជ្ញាធរ បានសំណូមពរទៅដល់ប្រជាពលរដ្ឋទាំងអស់ សូមមេត្តាឈប់ចាក់បេតុងរំលោភលើផ្លូវសាធារណៈបន្តទៀត ព្រោះអាចបង្កឲ្យមានទឹកដក់ និងធ្វើឲ្យផ្លូវបេតុងឆាប់ខូចមុនអាយុកាល៕

អត្ថបទ ៖ ម៉េង