តើករណីបែបណាខ្លះដែលក្រសួងមហាផ្ទៃអាចធ្វើមោឃភាពលិខិតឆ្លងដែនធម្មតា?  

លិខិតឆ្លងដែនធម្មតាកម្ពុជា ជាឯកសារបញ្ជាក់ថា ជនដែលកាន់លិខិតឆ្លងដែននេះ ជាពលរដ្ឋកម្ពុជា ដែលមានសិទ្ធិសុំទិដ្ឋាការឆ្លងដែនបាន និងជាឯកសារច្បាប់តែមួយគត់ ដែលអនុញ្ញាតឱ្យពលរដ្ឋកម្ពុជាអាចប្រើប្រាស់សម្រាប់ធ្វើដំណើរឆ្លងដែនទៅក្រៅប្រទេស។ ប៉ុន្តែ​លិខិតឆ្លងដែននេះ ក៏ត្រូវបានស្ថាប័នមានសមត្ថកិច្ចអាចដកហូតមកវិញបានគ្រប់ពេលវេលា។

តួយ៉ាង ពេលថ្មីៗនេះ ក្រសួងមហាផ្ទៃ បានសម្រេចធ្វើមោឃភាពលើលិខិតឆ្លងដែនធម្មតារបស់ឈ្មោះ ហេង សិទ្ធី ដែលគេស្គាល់ថា ជាអតីតអ្នកឧកញ៉ាកម្ពុជាកំពុងរត់ទៅក្រៅប្រទេស ហើយបន្ទាប់ពីមោឃភាពលិខិតឆ្លងដែន អតីតអ្នកឧកញ៉ារូបនេះ ក៏ត្រូវបានកម្លាំងសមត្ថកិច្ចអន្តរជាតិ ចាប់ឃាត់ខ្លួននៅក្នុងប្រទេសរុស្ស៊ី និងត្រៀមបញ្ជូនមកកម្ពុជាវិញថែមទៀត។ ជុំវិញករណីនេះ ក៏មានចម្ងល់ខ្លះលើកឡើងថា តើមូលហេតុអ្វីបានជាអាជ្ញាធរកម្ពុជាធ្វើមោឃភាពលើលិខិតឆ្លងដែនរបស់លោក ហេង សិទ្ធី រហូតឈានដល់ការចាប់ខ្លួនបែបនេះ?

តាមអនុក្រឹត្យរបស់រាជរដ្ឋាភិបាល គឺក្រសួងមហាផ្ទៃ គឺជាអ្នកទទួលខុសត្រូវក្នុងការចេញលិខិតឆ្លងដែនធម្មតាសម្រាប់ប្រជាពលរដ្ឋកម្ពុជាទូទៅ ដែលមាននាយកដ្ឋានលិខិតឆ្លងដែន នៃអគ្គនាយកដ្ឋានអត្តសញ្ញាណកម្ម គឺជាសេនាធិការលើការងារនេះ ហើយដើម្បីធានាដល់ការផ្ដល់លិខិតឆ្លងដែនធម្មតានេះ ក្រសួងមហាផ្ទៃ ក៏បានចេញប្រកាសមួយស្ដីពីបែបបទនៃការផ្តល់លិខិតឆ្លងដែនធម្មតា តាំងពីឆ្នាំ២០១៤។ ប្រកាសលេខ១៤៦១ប្រ.ក ស្តីពីបែបបទនៃការផ្តល់លិខិតឆ្លងដែនធម្មតា របស់ក្រសួងមហាផ្ទៃ បានកំណត់ទាំងលក្ខខណ្ឌ នីតិវិធី បទបែបនៃការផ្ដល់លិខិតឆ្លងដែន សុពលភាព និងការមោឃភាពលិខិតឆ្លងដែន ជាដើម។

ប្រកាស៤​ នៃប្រកាសនេះ បានបញ្ជាក់យ៉ាងច្បាស់ថា ស្ថាប័នមានភារកិច្ចផ្តល់លិខិតឆ្លងដែនធម្មតា គឺមានសិទ្ធិបដិសេធមិនផ្តល់លិខិតឆ្លងដែន ឃាត់លិខិតឆ្លងដែនទុក ឬបដិសេធលិខិតឆ្លងដែន ដែលបានផ្តល់រួចហើយ ក្នុងករណីមួយចំនួន ដូចជា៖ ១) ជនដែលមានសំណើពីស្ថាប័នមានសមត្ថកិច្ចសុំមិនឱ្យផ្តល់លិខិតឆ្លងដែន ២) ជនដែលមានការសម្រេចពីតុលាការហាមឃាត់ការចាកចេញពីព្រះរាជាណាចក្រកម្ពុជា ៣) ពិរុទ្ធជន ទណ្ឌិត ឬជនកំពុងមានដីកាបង្គាប់ឱ្យចាប់ខ្លួន និង៤) លិខិតឆ្លងដែនដែលក្លែង ឬលិខិតឆ្លងដែនដែលបាត់។

ដូច្នេះ ផ្អែកលើប្រកាសនេះ ការដែលក្រសួងមហាផ្ទៃ ធ្វើមោឃភាពលិខិតឆ្លងដែនធម្មតារបស់លោក ហេង សិទ្ធី គឺបានស្របគតិយុត្តដែលបានកំណត់ ពោលគឺក្រសួមហាផ្ទៃ បានប្រកាសធ្វើមោឃភាព​លិខិតឆ្លងដែនរបស់លោក ហេង សិទ្ធី កាលពីថ្ងៃទី៣១ ខែធ្នូ ឆ្នាំ២០២៤ ក្រោយពី​សាលាដំបូងរាជធានីភ្នំពេញ បានចេញដីកាបង្គាប់ឱ្យចាប់ខ្លួនអតីតអ្នកឧកញ៉ារូបនេះ នៅថ្ងៃទី០៣ ខែធ្នូ ឆ្នាំ២០២៤។ សាលាដំបូងរាជធានីភ្នំពេញ បានចោទប្រកាន់​អតីតអ្នកឧកញ៉ា ហេង សិទ្ធី ពីបទគំរាមកំហែងហែកកេរ្តិ៍មានស្ថានទម្ងន់ទោស ដែលប្រព្រឹត្តនៅកម្ពុជា ខែវិច្ឆិកា ឆ្នាំ២០២៤។ នេះបើតាមលិខិតជូនដំណឹងរបស់ក្រសួងការបរទេសកម្ពុជា។

លិខិតរបស់ក្រសួងការបរទេសកម្ពុជា ចុះហត្ថលេខាដោយលោក ស៊ា កុសល រដ្ឋលេខាធិការប្រចាំក្រសួងការបរទេស បានប្រកាសប្រាប់ស្ថានទូតកម្ពុជាប្រចាំនៅបរទេសទាំងអស់ពីការធ្វើមោឃភាពលិខិតឆ្លងដែនរបស់អតីតអ្នកឧកញ៉ារូបនេះ ហើយឱ្យជូនដំណឹងពីការមោឃភាពលិខិតឆ្លងដែននេះទៅកាន់រដ្ឋដែលជា​ម្ចាស់ផ្ទះទាំងអស់។ ហេតុដូច្នេះហើយ ទើបឈានទៅដល់ការចាប់ខ្លួនលោក ហេង សិទ្ធី កាលពីថ្ងៃទី​១៣​ ខែ​មករា​ ឆ្នាំ​២០២៥​ នៅ​ចំណតស្ថានីយ៍រថភ្លើង​ក្នុងប្រទេស​រុស្សី​៕

អត្ថបទ៖ ធឿន វ៉ាន់សុង