សម្តេចតេជោ ហ៊ុន សែន៖ សម្តេចក្រឡាហោម​ ស ខេង ជាឥស្សរជនស្នេហាជាតិ ស្នេហាប្រជាជនដ៏ស្មោះស្ម័គ្រ

«សម្តេចក្រឡាហោម ស ខេង ជាឥស្សរជនស្នេហាជាតិ ស្នេហាប្រជាជនដ៏ស្មោះស្ម័គ្រ»។ នេះ គឺជាការពោលលើកឡើងរបស់សម្តេចតេជោ ហ៊ុន សែន ទៅកាន់សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រនៃព្រះរាជា​ណាចក្រកម្ពុជានៅក្នុង​ឱកាសខួបចម្រើនជន្មាយុឈានចូល៧៥ឆ្នាំ​នៅថ្ងៃទី១៥ ខែមករា ឆ្នាំ២០២៥។ បើតាមសម្តេចតេជោ ហ៊ុន​ សែន គឺសម្តេចក្រឡាហោម ស ខេង បានចូលរួមកសាងសមិទ្ធផលជាតិជាច្រើនជាមួយសម្តេច រហូតកម្ពុជាទទួលបានសុខ សន្តិភាព ការអភិវឌ្ឍ រីកចម្រើនដូចសព្វថ្ងៃនេះ។

នៅក្នុងសារលិខិតជូនពរសម្តេចក្រឡាហោម ស ខេង សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា បានគូសបញ្ជាក់បែបនេះថា៖«សម្តេច ជាឥស្សរជនស្នេហាជាតិ ស្នេហាប្រជាជនដ៏ស្មោះស្ម័គ្រ ដែលបានខិតខំប្រឹងប្រែងតស៊ូព្យាយាមអស់ពីកម្លាំងកាយចិត្ត ប្រាជ្ញាស្មារតី ជម្នះរាល់ឧបសគ្គ និងការលំបាកជាច្រើនក្នុងការអនុវត្តគោលនយោបាយ ឈ្នះឈ្នះ នាំមកនូវការបង្រួបបង្រួមជាតិ ឯកភាពទឹកដី សន្តិភាព សន្តិសុខ និងសុវត្ថិភាពជូនជាតិ និងប្រជាជន និងបានកសាងសមិទ្ធផលសង្គមជាច្រើន ធ្វើឱ្យប្រទេសជាតិមានការអភិវឌ្ឍ រីកចម្រើនឥតឈប់ឈរលើគ្រប់វិស័យ»។

ជាមួយនឹងការលើកឡើងបែបនេះ សម្តេចតេជោ ហ៊ុន សែន ក៏បានជូនពរជ័យសម្តេចក្រឡាហោម ស ខេង ក្នុងខួបចម្រើនជន្មាយុចូល៧៥ឆ្នាំ និងជូនពរសម្តេចនៅក្នុងឆ្នាំថ្មីនេះ សូមបានប្រកបដោយសុខភាពល្អបរិបូរណ៍ កាយពលមាំមួន និងជន្មាយុយឺនយូរ។ ចំណែក សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាវិញ ក៏បានផ្ញើសារជូនពរសម្តេចក្រឡាហោម ស ខេង ក្នុងខួបកំណើតគម្រប់ចូល៧៥ឆ្នាំនេះផងដែរ ដោយសម្តេចធិបតី នាយករដ្ឋមន្រ្តី បួងសួងរំលឹកដល់គុណបុណ្យព្រះរតនត្រ័យកែវទាំងបី វត្ថុស័ក្តិសិទ្ធិក្នុងលោក និងទេវតាថែរក្សាទឹកដីនៃព្រះរាជាណាចក្រកម្ពុជា សូមព្រះអង្គតាមជួយបីបាចថែរក្សា ប្រទានពរជ័យសិរីសួស្តីជ័យមង្គលគ្រប់ប្រការជូនសម្តេចក្រឡាហោម និងលោកជំទាវ ព្រមទាំងក្រុមគ្រួសារ សូមបានប្រកបដោយពុទ្ធពរទាំង៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

បន្ថែមពីលើការជូនពរដូច្នេះ សម្តេចធិបតី នាយករដ្ឋមន្រ្តី ក៏បានអបអរសាទរ និងស្ងប់ស្ងែងចំពោះវីរៈភាពរបស់សម្តេចក្រឡាហោម ដែលតែងតែបានខិតខំបំពេញបេសកកម្មជាតិដ៏ថ្លៃថ្លា ប្រកបដោយភាពស្មោះត្រង់ និងការទទួលខុសត្រូវខ្ពស់ ដើម្បីបម្រើឧត្តមប្រយោជន៍ជាតិ មាតុភូមិ និងប្រជាជន សំដៅអភិវឌ្ឍប្រទេសជាតិឱ្យមានការរីកចម្រើនជឿនលឿន ក៏ដូចជាបន្តលើកស្ទួយកិត្យានុភាពជាតិនៅលើឆាកអន្តរជាតិ។

សូមជម្រានជូនថា សម្តេចក្រឡាហោម ស ខេង គឺជាអតីតឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។ បន្ទាប់ពីឈ្នះការបោះឆ្នោតជាថ្មីនៅក្នុងអាណត្តិទី៧នេះ សម្តេចតេជោ ហ៊ុន សែ​ន សម្តេចក្រឡាហោម ស ខេង ព្រមទាំងថ្នាក់ដឹកនាំផ្សេងទៀត ក៏បានប្រគល់តួនាទីដឹក​នាំរាជរដ្ឋាភិបាលថ្មីទៅឱ្យយុវជនបន្តវេនរបស់គណបក្សប្រជាជនកម្ពុជា ដើម្បីដឹកនាំប្រទេសបន្តដែលការផ្ទេរអំណាចនេះ ធ្វើឡើងត្រឹមត្រូវតាមនីតីវិធីច្បាប់ និងគោលការណ៍ប្រជាធិបតេយ្យ។ សម្តេចតេជោ ហ៊ុន សែន ធ្លាប់បានគូសបញ្ជាក់ថា នេះ គឺជាការផ្ទេរអំណាចដោយសន្តិវិធី ដោយសម្តេច និងថ្នាក់ដឹកនាំកំពូលជាតិដទៃទៀត សុខចិត្តចាកចេញពីអំណាច ដើម្បីទុកឱ្យយុវជនជំនាន់ក្រោយបញ្ចេញសមត្ថភាពដឹកនាំប្រទេសបន្តអភិវឌ្ឍ កាន់តែរីកចម្រើន៕