ប្រធានបទ​ជំរុញ​​ឲ្យ​កសិករដាំដុះ​​​ពូជស្រូវ​​ក្នុង​ស្រុក​នៅ​តែ​ក្តៅ​ អ្នក​គាំទ្រ​លើកហេតុផល​ការពារ​ផ្សេងៗ​គ្នា​

ក្រោយ​ពី​តម្លៃ​ស្រូវ​ពូជ​អូអឹម​បាន​ធ្លាក់​ថ្លៃ​យ៉ាង​គំហុក ហើយ​មន្រ្តី​ជំនាញ​កសិកម្ម​បាន​ជំរុញ​ឲ្យ​កសិករ​ងាក​មក​ដាំដុះ​និង​ប្រើប្រាស់​ពូជ​​ស្រូវ​ក្នុង​ស្រុក ក៏​មាន​ការ​​បញ្ចេញ​មតិ​យល់​ឃើញ​ផ្សេងៗ​ពី​អ្នក​ប្រើប្រាស់​បណ្តាញ​សង្គម ជុំវិញ​វិធានការ​ជំរុញ​ឲ្យ​កសិករ​ប្រើប្រាស់​ពូជ​ស្រូវ​ក្នុង​ស្រុក​ ដើម្បីធានា​បាន​ស្ថេរភាពថ្លៃ។

នៅ​លើ​គណនី​ហ្វេសបុក​របស់​លោក ឃឹម ហ្វីណង់ មន្រ្តី​អ្នកនាំពាក្យ​ក្រសួង​កសិកម្ម បាន​លើក​ឡើងថា «​បច្ចុប្បន្ននេះ សហគមន៍​កសិកម្មទំនើប​ស្រូវ​សែន​ក្រអូប​ទទួល​បានការ​ធានា​ថ្លៃទុក​ជាមុន ១៣៥០ រៀល។ រួមគ្នា​ជា​សហគមន៍​ផលិតពូជស្រូវខ្មែរតាមកិច្ចសន្យាគឺ​ជាជម្រើស​សុវត្ថិភាព អាច​ការពារ​បងប្អូនកសិក​រយើង​ពីហានិភ័យទីផ្សារ!»។

ពាក់ព័ន្ធ​ការ​ជំរុញ​ឲ្យកសិករ​ងាក​មក​ប្រើប្រាស់​ពូជ​ស្រូវ​ក្នុង​ស្រុក និង​ចូលរួម​​បង្កើត​សហគមន៍​កសិកម្ម​ទំនើប ក៏​មាន​ប្រិយមិត្ត​​ជា​ច្រើន​ បានចូលមក​ខមមិន​យ៉ាង​ផុលផុសលើគណនី​ហ្វេសបុក​​របស់​លោក ឃឹម ហ្វីណង់ ដែល​អ្នក​ខ្លះ​ជា​កសិករ​​ដែល​ប្រឡូក​ក្នុង​ការ​ងារ​ដាំដុះ​ដំណាំ​ស្រូវ​ រូម​ទាំង​ពលរដ្ឋ​ទូទៅ​មួយ​ចំនួន​ទៀត​ដែល​យល់​ដឹង​ពី​វិស័យ​កសិកម្ម​និង​បាន​ចូលរួម​ផ្តល់​មតិយោបល់​ផ្សេងៗ។

អ្នកប្រើប្រាស់​បណ្តាញ​សង្គម​ម្នាក់​ឈ្មោះ Seng Kosal បាន​ចូល​មក​ខមិន​​ថា ការធ្វើស្រូវ OM មាន​រយៈ​ពេលខ្លី ១​ ឆ្នាំ​អាច​ធ្វើ​បាន​ច្រើន​ដង បើធៀបទៅ​និងស្រូវស្រាល។ ការជ្រើសរើសធ្វើស្រូវ OM ក៏​ជា​ជម្រើស​ក្នុងការ​បង្កើន​ប្រាក់​ចំណូល​ប្រចាំថ្ងៃរបស់កសិករដែរ។ ស្រូវសែនក្រអូប រយៈ​ពេល​យូរ​ជាង ទិន្នផល​តិច ចំណាយ​ច្រើន (ឧទាហរណ៍​ថ្លៃ​ច្រូត ស្រូវ OM ដើម​ខ្លី តម្លៃថោក​ជាង​ជិត ៣០០០ រៀល/10m^2) និង ទឹកបញ្ចូលស្រែ។ល។ បច្ចុប្បន្នស្រូវរយៈពេលយូរ គេធ្វើសម្រាប់ទុកហូប និង ស្រូវ OM ធ្វើសម្រាប់​លក់​យក​ប្រាក់​ចំណេញ។ ចឹងគួរលោករដ្ធមន្រី្ត​ជួយរកទីផ្សារ​​ឲ្យ​ប្រជាពលរដ្ធផង។

អ្នក​ខមិន​ម្នាក់​ទៀត​​ឈ្មោះ Som Sophearith ក៏​បាន​ចូលរួមមតិ​​ថា ខ្ញុំមិនមែនជាកសិករទេ តែខ្ញុំមានយោបល់​តិចតួច។ តាមរយៈ​ពត៍មាននៅលើ Poster នេះ គឺពិបាកនឹងអោយប្រជាកសិករងាកមកដាំស្រូវក្រអូបណាស់ ព្រោះក្រោយ​ពេលប្រមូលផលហើយ ពួកគាត់ទទួលបានកម្រៃតិចជាង OM បើគិតក្នុង1ខែ។ ឧទាហរណ៍

1- ស្រូវក្រអូប 1ha បានផល 4 តោន ក្នុងរយៈពេល 4 ខែ។ បើ 1 គីឡូ​លក់បាន 1300៛ គឺ 4 តោន= 5 200 000៛ ឬស្មើនឹង 1 300 000៛ ក្នុង1ខែ។

2-ស្រូវ OM. 1ha បានផល 5 តោន ក្នុងរយៈពេល 3 ខែ។ បើ 1 គីឡូលក់បាន 800៛ (តម្លៃក្នុង​ពេល​ធ្លាក់​ថ្លៃ). គឺ 5​តោន= 4 000 000៛ ឬស្មើនឹង 1 333 000៛ ក្នុង 1 ខែ។ ដូច្នេះ OM នៅតែបានកម្រៃច្រើនជាង ហើយ​ណា​មួយ OM មិនមែនគ្មានទីផ្សារទេ គ្រាន់តែតម្លៃវាចុះថោក។

តាមយោបល់ខ្ញុំ ក្រសួងគួរតែណែនាំប្រជាកសិករ​កាត់បន្ថយថ្លៃដើមវិញដូចជា ជី តម្លៃ​ភ្ជួរ​ឬច្រូត​ជា​ដើម និងស្វែងរកទីផ្សារស្រូវ OM បន្ថែមក្រៅពីវៀតណាម ឬក៏បោះទុនកែច្នៃផ្គត់ផ្គង់ក្នុងស្រុកវិញ។ ខ្ញុំជឿថាបងប្អូន ខ្មែរគាត់មានជាតិនិយមច្បាស់​ជាគាំទ្រ។

អ្នកប្រើងប្រាស់​បណ្តាញ​សង្គម​ម្នាក់ទៀត​ឈ្មោះ ប៊ុន ធឿន ក៏​បាន​ចូល​ខមិន​ថា តាមមើល​ដឹងភាគ​ច្រើន​ស្រូវយើងច្រើន​ទៅ​លក់ទៅវៀតណាម។ វា​ពិបាកអញ្ចឹង យើងពឹងដង្ហើមគេដូចគេថាអញ្ចឹង។ ខ្មោច​ហែរ​ដល់​បច្ឆា​ហើយ​ត្រូវ​តែដុត​អញ្ចឹង​គេថាតម្លៃប៉ុន្មាន​ ក៏​យើងត្រូវ​តែលក់។ តិច​ទៀ​តព្រែកជីក។ ជីក​ហើយ​អាចនឹងគ្រាន់បើទៅ។

អ្នក​ខមមិន​ម្នាក់​ទៀត​ឈ្មោះ ហ៊ឹម សុរស បាន​ចូល​រួម​មតិ​ដែរ​ថា កសិករដូចខ្ញុំ​ទើបយល់ច្បាស់ ពីមុន​មក​រឿងស្រូវ​គឺយើងធ្វើ​តែពូជក្នុងស្រុកទេ តែដោយសារ​ទីផ្សារក្នុងស្រុកយើងទិន្នផលលើសកំរិត​មិន​ទទួល​ទិញ ទើប​កសិករដូចខ្ញុំប្ដូរទៅដាំពូជគេ​ ព្រោះតែ​គេទទួលទិញ បើ​គ្រប់កសិករ​ប្ដូរទៅ​ដាំពូជ​ក្នុង​ស្រុ​កវិញ នោះ​រឿងរ៉ាវ ២០ ឆ្នាំមុនកើតឡើងដដែល គឺគ្មានទីផ្សារ​ទិញ​នោះ​ឯង។ បើ​រដ្ឋាភិបាល​ហ៊ាន​ធានា​ចុះ​កិច្ចសន្យា សម្រាប់​កសិករ​និងទទួលទិញនោះ គ្មាន​អ្វីត្រូវ​ខ្លាច​នឹងធ្វើឡើងវិញ​ឡើយ។

ដោយ​ឡែក​អ្នក​ខមិន​ដែល​មាន​គណនី​ហ្វេសបុក​ឈ្មោះ Nung Re ក៏​បាន​ចូលរួម​មតិ​ដែរ​ថា ហេតុអ្វី​បានជា​មិន​មាន​ការ​ផ្សព្វផ្សាយ​​ណែនាំ​ទៅតាម​តំបន់​ភូមិឃុំនីមួយៗ​ឲ្យបាន​ជ្រួតជ្រាប​ដល់​កសិករ​គ្រប់​ខ្នង​ផ្ទះ​តែ​ម្ដង​ទៅ។ មន្ត្រីកសិកម្ម​ឃុំ មន្ទីរកសិកម្មជា​សេនាធិការរបស់ក្រសួង​កសិកម្ម ហេតុអ្វីមិនដឹកនាំ​ចងក្រង​កសិករ​ទៅ​តាម​តំបន់ភូមិឃុំនីមួយៗ​ឲ្យបានគ្រប់ៗ​ឃុំទៅ? ហេតុអ្វីបានជា​មាន​ការយឺតយ៉ាវ​ ក្នុងការ​ចងក្រងទៅជា​សហគមន៍ម្ល៉េះ? បើក្នុង​នាម​ខ្ញុំ​ជាកសិករ​អស់​រយៈ​ពេល ១០ ឆ្នាំ កន្លង​មក​ហើយ ពុំ​ដែល​ទទួល​បានទទួល​នៅ​ការ​ផ្សព្វ​ផ្សាយ​គោលនយោបាយ​កសិកម្ម ឬក៏ការផ្សព្វផ្សាយ​ធានា​តម្លៃ​អន្តរាគមន៍​ទិន្នផល​កសិកម្ម​អំពី​រដ្ឋាភិបាល​ណាមួយ​នៅឡើយ​ទេ​ ចេះតែ​ផលិត​ទៅតាម​អ្វី​ដែល​មាន​ឈ្មួញ​កណ្ដាល​ទិញ​កន្លង​មក​តែ​ប៉ុណ្ណោះ។

ជាមួយ​ខមិន​យ៉ាង​ច្រើននេះ លោក ឃឹម ហ្វីណង់​ក៏​បាន​ចូលឆ្លើយតប​ខមិន​មួយ​ចំនួន​ជុំវិញ​រឿង​នេះ។

ឆ្លើយត​បខមិន​របស់​ពលរដ្ឋ​ម្នាក់​ឈ្មោះ Vy Ravuth ថា នៅពេលដែលប្រជាពលរដ្ឋ​ធ្វើបានច្រើន នោះ​តម្លៃនឹង​ចុះថោកម្ដងទៀត។ លោក ឃឹម ហ្វីណង់ បាន​ឆ្លើយតប​ថា គិតបែបនេះក៏ម្យ៉ាង តែបើ​សិន​ជា​យើង​នាំគ្នាគិតបែបនេះ​គ្រប់គ្នា យើង​គ្មាន​ថ្ងៃដោះស្រាយ​បញ្ហាអ្វី​បានឡើយ។ ពិត​ណាស់ គ្មាន​អ្វី​ឋិតឋេរ​ឡើយ ហើយ​ថ្លៃតែង​កំណត់​ដោយ​តុល្យភាព​នៃ​ទំហំផ្គត់ផ្គង់ និងតម្រូវការនោះឯង តែ​មាន​ពេលខ្លះក៏វាពាក់​ព័ន្ធនឹងយុទ្ធសាស្ត្រដែរ។ តួយ៉ាង ការផលិតពូជរបស់គេ​វាប្រាកដ​ជា​អាស្រ័យលើ​ទីផ្សារ​គេ​ហើយ បើប្រើពូជ​យើង ទើប​យើងងាយគ្រប់គ្រង​បាន ជាពិសេស​លើកិច្ចការ​អន្តរាគមន៍​។

អ្នក​ខមិន​ម្នាក់ទៀត​ឈ្មោះ Chhouy Borath បាន​សួរ​ថា តើអាចមានចរន្តផ្សព្វផ្សាយ​ឱ្យដល់ភូមិឃុំផ្ទាល់​បានទេ? ខ្ញុំ​បាទ​រំពឹង​ទុកថា ប្រសិនមានការពន្យល់​ពីអត្ថប្រយោជន៍នៃ​ការចងក្រងសហគមន៍កសិកម្ម ឱ្យ​ពួក​គាត់​បាន​យល់ និង​មានអ្នកបង្ហាញផ្លូវ និង​ធានាលើតម្លៃទៀតនោះ ប្រាកដ​ណាស់​ពួកគាត់​នឹង​ចូលរួម​។

លោក​ឃឹម ហ្វីណង់ បាន​ឆ្លើយតប​ថា យើងកំពុងព្យាយាមធ្វើកិច្ចការនេះហើយ ជាពិសេស​តាម​រយៈ​មន្ត្រីឃុំ​របស់យើង។

អ្នក​ខមិន​មួយ​រូប​ទៀត​បាន​ចែក​រំលែក​បទពិសោធន៍​ថា ៤ ឆ្នាំមុនកសិករខាងខ្ញុំ​ធ្វើសែន​ក្រអូបបាន​ច្រើនណាស់ តែ​ពេលលក់​​មិន​មាន​ឈ្មួញ​មក​ទិញ បើទិញ​ក្នុងតម្លៃថោកដែរ។ ឆ្នាំបន្ទាប់​មាន​ក្រុមហ៊ុន​មកធ្វើកិច្ចសន្យា​តម្លៃស្រូវសែនក្រអូប តែ​ដល់​​ពេលស្រូវទុំបាត់ដំណឹង​ទាក់ទងមិនបាន កសិករ​រៀងចាល់។ ពួកគាត់​និយាយ​ថា​ មិនខ្លាច​នឹងធ្វើតែខ្លាច​នឹងលក់ បើដូចដែរ​អ្វីដែល​ឯកឧត្តម​បាន​និយាយ​មែន កសិករ​ខាងខ្ញុំរីករាយ​នឹង​សហការណ៍ ព្រោះពួកគាត់​ចង់បានភាពច្បាស់លាស់​។

លោក ឃឹម ហ្វីណង់ បាន​ឆ្លើយតប​ថា បាទ​អ្វីៗទាមទារភាព​ច្បាស់លាស់ អញ្ចឹងហើយ​បានជា​តម្រូវ​ឱ្យ​ផលិត​ក្រោមឆ័ត្រ​នៃ​សហគមន៍កសិកម្មទំនើប មិនមែន​ធ្វើរៀងៗខ្លួន ឬរបៀប​សហគមន៍​ចាស់​ទេ៕