ធនាគារពិភពលោកប្តេជ្ញាពង្រឹងកិច្ចសហប្រតិបត្តិការបន្ថែមដើម្បីលើកកម្ពស់សុខុមាលភាពពលរដ្ឋកម្ពុជាកាន់តែប្រសើរ

លោកស្រី Tania Meyer នាយកគ្រប់គ្រងនៃធនាគារពិភពលោកប្រចាំព្រះរាជាណាចក្រកម្ពុជា បានបញ្ជាក់ជំហរយ៉ាងម៉ឹងម៉ាត់ថា «ខ្ញុំ និងសហការីនៃធនាគារពិភពលោក សូមប្តេជ្ញាចិត្ត ពង្រឹងកិច្ចសហប្រតិបត្តិការដើម្បីលើកកម្ពស់សុខុមាលភាពរបស់ប្រជាជនកម្ពុជា ស្របតាមគោលដៅរបស់ក្រសួងសុខាភិបាល និងយុទ្ធសាស្ត្ររបស់រាជរដ្ឋាភិបាលកម្ពុជា»។

ការប្តេជ្ញានេះបានធ្វើឡើងកាលពីថ្ងៃទី១៥ មករា ឆ្នាំ២០២៥ ក្នុងឱកាសដែលលោកស្រីបានទទួលជួបពិភាក្សាការងារជាមួយលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលនៅទីស្តីការក្រសួង។

នៅក្នុងឱកាសនោះ លោកស្រី Tania Meyer បានថ្លែងអបអរសាទរលោករដ្ឋមន្ត្រីដែលបានដឹកនាំក្រសួងសុខាភិបាលប្រកបដោយទស្សនៈវិស័យវែងឆ្ងាយដែលនាំឱ្យវិស័យសុខាភិបាលបានទទួលនូវសមិទ្ធផលជាច្រើនគួរជាទីមោទនៈ ក្នុងរយៈពេលជាង១ឆ្នាំ កន្លងមក។ ទន្ទឹមនឹងនេះ លោកស្រី បានជម្រាបជូនលោករដ្ឋមន្រ្តី អំពីលទ្ធផលការងារជាមួយក្រសួងសុខាភិបាល និងបញ្ហាប្រឈមដែលកំពុងកើតមានក្នុងការអនុវត្តគម្រោងនានា នាពេលបច្ចុប្បន្ន និងអនាគត។

លោករដ្ឋមន្រ្តីសុខាភិបាល បានថ្លែងអំណរគុណដល់ ធនាគារពិភពលោកដែលបានសហការចូលរួមចំណែកគាំទ្រក្រសួងសុខាភិបាលក្នុងការងារលើកកម្ពស់សុខភាពប្រជាជនកម្ពុជា តាមរយៈកិច្ចសហប្រតិបត្តិការអនុវត្តលើគម្រោងសុខាភិបាលនានា។

លោករដ្ឋមន្រ្តី បានសង្កត់ធ្ងន់ថា «សមិទ្ធិផលទាំងឡាយក្នុងវិស័យសុខាភិបាល គឺជាការខិតខំប្រឹងប្រែងរបស់រាជរដ្ឋាភិបាល ក្រោមការដឹកនាំដ៏ឈ្លាសវៃ និងប៉ិនប្រសប់ប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា «នឹងមិនអាចកាត់ផ្តាច់បានពីការចូលរួមចំណែកគាំទ្រពីសំណាក់ដៃគូអភិវឌ្ឍន៍ទាំងឡាយបានទេ ក្នុងនោះធនាគារពិភពលោក គឺជាដៃគូសំខាន់មួយ»។

ជាមួយគ្នានេះ លោករដ្ឋមន្រ្តី បានផ្តល់អនុសាសន៍លើបញ្ហាប្រឈមក៏ដូចជាដំណោះស្រាយបញ្ហា និងអាទិភាពសំខាន់ៗរបស់ក្រសួងសុខាភិបាលដើម្បីអភិវឌ្ឍវិស័យសុខាភិបាលរបស់កម្ពុជាផងដែរ៕

អត្ថបទ៖ សំអឿន