ព័ត៌មានជាតិ

ក្រសួងការងារ តម្រូវឱ្យកម្មកររាយការណ៍ ករណីថៅកែគិតប្រាក់ឈ្នួល ឬ ប្រាក់បំណាច់អតីតភាពការងារ មិនត្រូវតាមច្បាប់

បានផុស

៣ សប្តាហ៍ មុន

នៅ

ថ្ងៃអាទិត្យ ១៩ មករា ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានណែនាំដល់កម្មករ-និយោជិតទាំងអស់ ត្រូវរាយការណ៍មកអធិការកិច្ចការងារក្នុងករណីសង្ស័យថា ការគណនាប្រាក់ឈ្នួល ប្រាក់បំណាច់អតីតភាពការងារ ឬ ប្រាក់អត្ថប្រយោជន៍ ផ្សេងៗ អនុវត្តមិនបានត្រឹមត្រូវតាមច្បាប់ និងមិនត្រូវយកជម្រើសតវ៉ាបិទផ្លូវដែលនាំឱ្យប៉ះពាល់ដល់សណ្ដាប់ធ្នាប់សាធារណៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្ដីជូនដំណឹងរបស់ក្រសួងការងារចុះថ្ងៃទី ១៨ មករា បានណែនាំ និងក្រើនរំលឹកដល់ម្ចាស់ ឬ នាយកសហគ្រាស គ្រឹះស្ថានផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូប ត្រូវអនុវត្តប្រាក់ឈ្នួលអប្បបរមាសម្រាប់ឆ្នាំ ២០២៥ ចាប់ពីថ្ងៃទី ១ ខែមករា ឆ្នាំ ២០២៥ តទៅ ដោយត្រូវទូទាត់ចំនួន ២ ដង ក្នុង ១ ខែ។

ទន្ទឹមនឹងនេះ ម្ចាស់ ឬ នាយកសហគ្រាស គ្រឹះស្ថាន ត្រូវទូទាត់ប្រាក់បំណាច់អតីតភាពការងារចំនួន ២ ដង ក្នុង ១ ឆ្នាំ និង/ឬប្រាក់អត្ថប្រយោជន៍ផ្សេងៗ ជូនកម្មករ-និយោជិត ឱ្យបានត្រឹមត្រូវ ស្របតាមច្បាប់ និងលិខិតបទដ្ឋានគតិយុត្តិជាធរមាន។ ក្នុងករណីមានការខកខានទូទាត់ ឬ គណនាដោយមិនបានត្រឹមត្រូវ ដែលនាំឱ្យមានវិវាទការងារកើតឡើង អធិការការងារ នឹងចាត់វិធានការផាកពិន័យសហគ្រាស គ្រឹះស្ថាននោះ យ៉ាងតឹងរ៉ឹងតាមច្បាប់ជាធរមាន។

ក្រសួងការងារ បានបន្តថា «ក្នុងករណីសង្ស័យថា ការគណនាប្រាក់ឈ្នួល ប្រាក់បំណាច់អតីតភាពការងារ និង/ឬប្រាក់អត្ថប្រយោជន៍ ផ្សេងៗ អនុវត្តមិនបានត្រឹមត្រូវតាមច្បាប់ សូមបងប្អូនកម្មករនិយោជិត ឬ សហជីព ដែលជាតំណាងរបស់បងប្អូនកម្មករ-និយោជិត ជូនដំណឹងមកអធិការការងារ តាមរយៈប្រព័ន្ធទាន់ហេតុការណ៍លេខ ១២៩៧ ឬ ១២៨៦ ដើម្បីចាត់វិធានការតាមច្បាប់ជាធរមាន ចៀសវាងការយកជម្រើសតវ៉ាតាមរយៈការបិទផ្លូវសាធារណៈ ដែលនាំឱ្យប៉ះពាល់ដល់សណ្តាប់ធ្នាប់សាធារណៈ និងអាចឈានដល់ការប្រព្រឹត្តល្មើសច្បាប់ជាយថាហេតុ»។

ក្រសួងការងារ សង្ឃឹមយ៉ាងមុតមាំថា ម្ចាស់ ឬ នាយកសហគ្រាស គ្រឹះស្ថាន និង កម្មករ-និយោជិតទាំងអស់ ចូលរួមអនុវត្តតាមខ្លឹមសារសេចក្ដីណែនាំនេះប្រកបដោយប្រសិទ្ធភាព។

គួរបញ្ជាក់ថា ប្រាក់ឈ្នួលអប្បបរមាកម្មករ-និយោជិតផ្នែកវាយនភណ្ឌ កាត់ដេរ ផលិតស្បែកជើង និងផលិតផលធ្វើដំណើរ និងកាបូបសម្រាប់ឆ្នាំ ២០២៥ នេះ ទទួលបាន ២០៨ ដុល្លារ កើនឡើង ៤ ដុល្លារ បើធៀបទៅនឹងប្រាក់ឈ្នួលអប្បបរមាឆ្នាំ ២០២៤ ដោយមិនគិតពីអត្ថប្រយោជន៍ផ្សេងៗ និងប.ស.ស ឡើយ៕

អត្ថបទ ៖ សំអឿន