ព័ត៌មានជាតិ

សិក្ខាកាម ស្នើភាគីពាក់ព័ន្ធ បន្តរៀបចំវគ្គបណ្ដុះបណ្ដាលដល់តន្ត្រីករវង់ភ្លេងពិណពាទ្យ នៅកំពង់ឆ្នាំង ដើម្បីរក្សាទម្រង់បទភ្លេងអត្តសញ្ញាណជាតិ

បានផុស

២ ខែ មុន

នៅ

ថ្ងៃអាទិត្យ ១៩ មករា ២០២៥

ដោយ

សិក្ខាកាម ស្នើ ភាគីពាក់ព័ន្ធ បន្តរៀបចំជាវគ្គបណ្ដុះបណ្ដាលឲ្យញឹកញាប់ ដើម្បីតន្ត្រីករ នៃវង់ភ្លេងពិណពាទ្យ នៅខេត្តកំពង់ឆ្នាំង បានសិក្សាឈ្វេងយល់កាន់តែច្បាស់ ដើម្បីរួមចំណែករក្សាទម្រង់បទភ្លេងអត្តសញ្ញាណជាតិ និងជួយលើកស្ទួយកម្រិតជីវភាព តាមរយៈជំនាញដូនតាមួយប្រភេទនេះផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើសុំនេះ ក្នុងឱកាស លោកបណ្ឌិត ហ៊ឺ វីរៈ អ្នកតំណាងរាស្ត្រមណ្ឌលខេត្តកំពង់ឆ្នាំង បានអញ្ជើញជាអធិបតីភាពក្នុងកម្មវិធីសិក្ខាសាលាវង់ភ្លេងពិណពាទ្យ ក្រោមប្រធានបទ «តួនាទីរបស់វង់ភ្លេងពិណពាទ្យ» ដែលរៀបចំឡើងដោយមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង រួមសហការជាមួយរដ្ឋបាលស្រុកកំពង់ត្រឡាច និងនាយកដ្ឋានសិល្បៈទស្សនីយភាព នៃក្រសួងវប្បធម៌ និងវិចិត្រសិល្បៈ ជាលើកដំបូង នៅស្រុកកំពង់ត្រឡាច ខេត្តកំពង់ឆ្នាំង កាលពីថ្ងៃទី ១៨ ខែមករា ឆ្នាំ ២០២៥ ម្សិលមិញ។

សិក្ខាសាលារយៈពេល ១ ថ្ងៃ ពេញនេះ សិក្ខាកាមភាគច្រើន នៅមិនទាន់យល់ពីបទភ្លេងពិណពាទ្យ ដូចជា បទភ្លេងហោមរោងធំ ចំនួន ៣៣ បទ , បទភ្លេងហោមរោងតូច ១២ បទ និងទម្រង់លេងដោយកាន់ឧបករណ៍ឌុប(អាចមកពីកាត់បន្ថយមនុស្សតម្រូវតាមអ្នកជួល ឬក៏អាចខ្វះមនុស្ស) នាំឲ្យប្រឈមដល់ការបាត់បង់តួនាទីរបស់ឧបករណ៍ស្គរសំភោរ ព្រមទាំងការពុំបានស្វែងយល់ពីទម្រង់ភ្លេងមួយនេះ ដែលជាទម្រង់ភ្លេងបែបសក្ការ ធ្វើឲ្យ តន្ត្រីករ នៃវង់ភ្លេងពិណពាទ្យភាគច្រើន បែរទៅជាប្រគំបទសម័យទំនើប បាត់បង់តម្លៃភាពអស្ចារ្យ នៃទម្រង់ភ្លេងមានប្រភពចេញមកពីព្រះបរមរាជវាំង។

ជាមួយនេះ ក្រោយពីទទួលបានវិញ្ញាបនបត្របញ្ជក់ពីការចូលរួម សិក្ខាកាម ក៏បានលើកជាសំណូមពរឲ្យភាគីដែលពាក់ព័ន្ធ បន្តរៀបចំជាវគ្គបណ្ដុះបណ្ដាលឲ្យបានញឹកញាប់ ដើម្បីឲ្យតន្ត្រីករ នៃវង់ភ្លេងពិណពាទ្យនៅទូទាំងខេត្តកំពង់ឆ្នាំង បានសិក្សាឈ្វេងយល់កាន់តែច្បាស់ ដោយរួមចំណែករក្សាបាននូវទម្រង់បទភ្លេងអត្តសញ្ញាណជាតិ និងជួយលើកស្ទួយកម្រិតជីវភាពតាមរយៈជំនាញដូនតាមួយប្រភេទនេះផង។

គួរជម្រាបថា សិក្ខាសាលាខាងលើនេះ មានគោលបំណងថែរក្សា លើកស្ទួយ និងផ្សព្វផ្សាយ ក៏ដូចជាតម្រង់ទិសដល់សិល្បករចាប់យកអាជីពជាតន្ត្រីករវង់ភ្លេងពិណពាទ្យ ក្នុងស្រុកកំពង់ត្រឡាច ខេត្តកំពង់ឆ្នាំង យល់ដឹងកាន់តែច្បាស់អំពីការសម្ដែងភ្លេងពិណពាទ្យឲ្យបានត្រឹមត្រូវ តាមទំនៀមទម្លាប់ និងក្បួនច្បាប់ពីបុរាណរបស់ខ្មែរ។

សិក្ខាសាលានេះ មានសិក្ខាកាមជា តន្ត្រីករ ចាស់ ក្មេង ចូលរួមចំនួន ៦ វង់ មកពីស្រុកកំពង់ត្រឡាច ចំនួន ៥ វង់ និងស្រុកសាមគ្គីមានជ័យ ចំនួន ១ វង់ ដែលមានគ្នាសរុបប្រមាណ ៦០ នាក់៕