អតីតរាជទូត​ផុតអាណត្តិ២រូប ត្រូវតែងតាំងជាអនុរដ្ឋលេខាធិការ និងអគ្គនាយក

អតីតឯកអគ្គរាជទូតកម្ពុជាដែលផុតអាណត្តិចំនួន២រូប ត្រូវបានតែងតាំងមុខតំណែងជាអនុរដ្ឋលេខាធិការ និងជាអគ្គនាយក នៅក្រសួងការបរទេស។ មន្ត្រីការទូតជាន់ខ្ពស់ទាំង២រូបនេះ គឺលោក នង សាកល និងលោក ថៃ ជុន។

យោងតាមព្រះរាជក្រឹត្យរបស់ព្រះករុណា ព្រះបាទ សម្ដេចព្រះបរមនាថ នរោត្តម​​ សីហមុនី ព្រះមហាក្សត្រនៃកម្ពុជា គឺបានត្រាស់បង្គាប់តែងតាំងមុខតំណែងលោក នង សាកល ជាអនុរដ្ឋលេខាធិការក្រសួងការបរទេស​ និងលោក ថៃ ជុន ជាអគ្គនាយកនៃអគ្គនាយកដ្ឋានសហប្រតិបត្តិការអន្តរជាតិ។

ជាការកត់សម្គាល់ លោក នង សាកល ជាអតីតឯកអគ្គរាជទូតកម្ពុជាប្រចាំប្រទេសបែលហ្ស៊ិក អូទ្រីស ហូឡង់ លុចសំបួ និងអមសហភាពអឺរ៉ុប ដែលមាននិវេសនដ្ឋាននៅទីក្រុងព្រុចសែល ប្រទេសបែលហ្ស៊ិក ហើយត្រូវជំនួសវិញដោយលោកស្រី គឹមសួគ៌ សុវណ្ណារី អគ្គនាយករងនៃអគ្គនាយកដ្ឋានអឺរ៉ុប អាមេរិក និងអាហ្វ្រិក-មជ្ឈិមបូព៌ា ជាឯកអគ្គរាជទូត។

រីឯ លោក ថៃ ជុន ជាអតីតឯកអគ្គរាជទូតកម្ពុជាប្រចាំប្រទេសប៊ុលហ្គារី រ៉ូម៉ានី ក្រិក និងស៊ីប ដែលមាននិវេសនដ្ឋានៅទីក្រុងសូហ្វីយ៉ា។ ការមកកាន់តំណែងជាអគ្គនាយកនៃអគ្គនាយកដ្ឋានសហប្រតិបត្តិការអន្តរជាតិ នៃក្រសួងការបរទេស គឺជំនួសតំណែងលោក ចេង ម៉ានិត ដែលត្រូវចេញទៅបំពេញបេសកកម្មជាឯកអគ្គរាជទូតកម្ពុជាប្រចាំមីយ៉ាន់ម៉ាវិញ។

ដោយឡែក មន្ត្រីជាន់ខ្ពស់ក្រសួងព័ត៌មានម្នាក់ មានតំណែងជារដ្ឋលេខាធិការ នោះគឺលោក ជា ច័ន្ទបរិបូរណ៍ នឹងត្រូវទៅជំនួសកន្លែងរបស់លោក ថៃ ជុន ជាឯកអគ្គរាជទូតប្រចាំប្រទេសប៊ុលហ្គារី រ៉ូម៉ានី ក្រិក និងស៊ីប៕

ដោយ៖ ធឿន វ៉ាន់សុង