រដ្ឋមន្ត្រីបរិស្ថាន៖ គុណភាពខ្យល់នៅកម្ពុជាល្អ មិនប៉ះពាល់សុខភាព ខណៈប្រទេសជិតខាងមានជាតិពុលខ្លាំង

រដ្ឋមន្ត្រីក្រសួងបរិស្ថាន លោក អ៊ាង សុផល្លែត អះអាងថា គុណភាពខ្យល់នៅកម្ពុជាល្អប្រសើរ មិនប៉ះពាល់ដល់សុខភាពមនុស្សឡើយ ខណៈប្រទេសជិតខាងកំពុងជួបបញ្ហាខ្យល់ពុលធ្ងន់ធ្ងរខ្លាំង។ រដ្ឋមន្ត្រីក្រសួងបរិស្ថាន ថ្លែងបែបនេះ នៅក្នុងកម្មវិធីប្រកាសខេត្តកំពង់ឆ្នាំង ជាខេត្តដែលគ្មានសំរាម និងសំណល់ប្លាស្ទិកនៅតាមទីសាធារណៈ នាព្រឹកថ្ងៃទី២២ ខែមករា ឆ្នាំ២០២៥។

រដ្ឋមន្ត្រីក្រសួង​បរិស្ថាន ថ្លែងបែបនេះ៖« ខ្ញុំសូមបញ្ជាក់ជូនថាថ្ងៃនេះ (ទី២២ ខែមករា) គុណភាពខ្យល់នៅកម្ពុជាល្អប្រសើរ។ មានន័យថា ដកដង្ហើមទៅអត់ពុលទេ ដោយឡែកប្រទេសមួយ​ចំនួននៅជុំវិញយើង គាត់កំពុងតែរងជាតិពុលយ៉ាងខ្លាំង»។

រដ្ឋមន្ត្រីបរិស្ថានរូបនេះ វាយតម្លៃថា មូលហេតុដែលគុណភាពខ្យល់នៅប្រទេសជិតខាងមានជាតិពុល បណ្ដាលឱ្យប៉ះពាល់ដល់សុខភាព គឺព្រោះតែបញ្ហាភ្លើងឆេះព្រៃផង និងបណ្ដាលមកពីការប្រើប្រាស់យានយន្ត និងរោងចក្រប្រើប្រាស់ប្រេងកាតផង។

ស្ថិតក្នុងស្ថានភាពខ្យល់កម្ពុជាមានភាពល្អប្រសើរ មិនប៉ះពាល់ផ្លូវដង្ហើមរបស់ពលរដ្ឋ រដ្ឋមន្ត្រីក្រសួងបរិស្ថាន អ៊ាង សុផល្លែត បានអំពាវនាវឱ្យពលរដ្ឋកម្ពុជា ចូលរួមថែរក្សាគុណភាពខ្យល់នៅកម្ពុជាឱ្យបានល្អបន្តទៀត ដោយមិនត្រូវធ្វើសកម្មភាពណាមួយបណ្ដាលឱ្យប៉ះពាល់គុណភាពខ្យល់ ដូចជា កុំដុតប្លាស្ទិក ព្រោះការដុតប្លាស្ទិកបណ្ដាលឱ្យប៉ះពាល់បរិស្ថាន គុណភាពខ្យល់ ប៉ះពាល់សុខភាព។ លោកបន្ថែមថា ការដុតសំរាម ក៏អាចរាលដាលនាំឱ្យមានបញ្ហាភ្លើងឆេះព្រៃ ដែលហេតុនាំឱ្យមានបញ្ហាខ្យល់ពុលខ្លាំង។

លោក អ៊ាង សុផល្លែត ក៏បានអះអាងថា ក្រសួងបរិស្ថាន បាននិងកំពុងចាត់វិធានការលើរោងចក្រដែលដុតកម្ទេចក្រណាត់ប៉ះពាល់ដល់បរិស្ថាន និងគុណភាពខ្យល់ និងសុខភាពពលរដ្ឋ។

តាមការចេញផ្សាយរបស់ បញ្ហាខ្យល់ពុលនៅថៃ កាន់តែអាក្រក់ទៅៗហើយ ដល់ថ្នាក់រដ្ឋមន្ត្រីសុខាភិបាល អំពាវនាវឲ្យប្រជាជនធ្វើការពីផ្ទះ ហើយទីក្រុងបាងកក ត្រូវបង្ខំចិត្តបិទសាលារៀនមួយចំនួនទៀតផង។ តាមការចុះផ្សាយរបស់ Bangkok Post កាលពីថ្ងៃអង្គារទី២១ខែមករាឆ្នាំ២០២៥, រដ្ឋមន្ត្រីសុខាភិបាលថៃលោក Somsak Thepsutin បានជំរុញឲ្យប្រជាជនធ្វើការពីផ្ទះចាប់ពីសប្តាហ៍ក្រោយទៅ ព្រោះថាបច្ចុប្បន្ន គុណភាពខ្យល់ បានឈានដល់កម្រិតគ្រោះថ្នាក់សឹងតែគ្រប់ខេត្តទៅហើយ៕