ព័ត៌មានអន្ដរជាតិ

ក្រុមស្រឡាញ់ភេទដូចគ្នារាប់រយគូនៅថៃ កំពុងចាំចុះសំបុត្រអាពាហ៌ពិពាហ៌ ក្រោយច្បាប់ថ្មីអនុម័ត

បានផុស

២ ម៉ោង មុន

នៅ

ថ្ងៃព្រហស្បតិ៍ ២៣ មករា ២០២៥

ដោយ

Chheang

ថៃ បានក្លាយជាប្រទេសដំបូងគេនៅអាស៊ីអាគ្នេយ៍ និងទីបីនៅអាស៊ី បន្ទាប់ពីតៃវ៉ាន់ និងនេប៉ាល់ ដែលអាពាហ៍ពិពាហ៍ភេទដូចគ្នាទទួលបានភាពស្របច្បាប់ជាផ្លូវការ។ ច្បាប់សមភាពអាពាហ៍ពិពាហ៍ ដែលផ្តល់សិទ្ធិស្របច្បាប់ដល់គូស្វាមីភរិយាស្រឡាញ់ភេទដូចគ្នា (LGBTQ+) បានចូលជាធរមាននៅថ្ងៃព្រហស្បតិ៍ទី២៣ខែមករាឆ្នាំ២០២៥នេះ ខណៈកំពុងមានគូស្នេហ៍ភេទដូចគ្នារាប់រយគូចាំចុះសំបុត្រអាពាហ៌ពិពាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គូស្វាមីភរិយាប្រហែល ៣០០គូ ត្រូវបានគេរំពឹងថានឹងចុះឈ្មោះអាពាហ៍ពិពាហ៍របស់ពួកគេនៅឯការប្រារព្ធពិធីពេញមួយថ្ងៃនៅក្នុងផ្សារទំនើបមួយកន្លែងនៅកណ្តាលទីក្រុងបាងកក ដោយមានមនុស្សជាច្រើនផ្សេងទៀតរំពឹងថានឹងបញ្ចប់ការចុះឈ្មោះរបស់ពួកគេនៅការិយាល័យខណ្ឌទូទាំងប្រទេស។ ក្នុងចំណោមគូស្នេហ៍ដំបូងដែលរៀបការ មានតារាសម្ដែង Apiwat “Porsch” Apiwatsayree និង Sappanyoo “Arm” Panatkool ដែលបានចាប់ដៃគូនៅសាលាសង្កាត់ Phra Nakorn ដោយបង្ហាញការត្រេកអរចំពោះការទទួលស្គាល់ផ្លូវច្បាប់នៃស្នេហារបស់ពួកគេ។

ច្បាប់ថ្មីនេះ បានកែប្រែមាត្រាលេខ១៤៤៨ ដោយឈប់ប្រើពាក្យនៅក្នុងអាពាហ៌ពិពាហ៌ថា «បុរស និងស្ត្រី» និងជំនួសមកវិញនូវពាក្យថា «បុគ្គល» និង «ដៃគូអាពាហ៍ពិពាហ៍» ដែលផ្តល់សិទ្ធិពេញលេញផ្នែកច្បាប់ ហិរញ្ញវត្ថុ និងវេជ្ជសាស្ត្រដល់គូស្នេហ៍ភេទដូចគ្នា។ នេះរាប់បញ្ចូលទាំងសិទ្ធិស្មើគ្នានៅក្នុងផ្នែកផ្សេងៗទៀតដូចជា ទ្រព្យសម្បត្តិរួម កាតព្វកិច្ចពន្ធ មរតក និងអត្ថប្រយោជន៍អ្នករស់រានមានជីវិត។

ជាមួយនឹងភាពស្របច្បាប់នៃអាពាហ៍ពិពាហ៍ភេទដូចគ្នា ថៃបានចូលរួមជាមួយប្រទេសជាង៣០ នៅទូទាំងពិភពលោក ដែលបានអនុម័តច្បាប់ស្រដៀងគ្នានេះ ខណៈជាងពាក់កណ្តាលនៃប្រទេសទាំងនោះស្ថិតនៅក្នុងទ្វីបអឺរ៉ុប៕

ដោយ៖ ឈាង

Related Topics:ប្រទេសថៃ