សាស្រ្តាចារ្យជប៉ុន៖ វិស័យសុខាភិបាលកម្ពុជាមានការរីកចម្រើនគួរឱ្យភ្ញាក់ផ្អើលធៀបនឹងមុនពេលរាតត្បាតជំងឺកូវីដ-១៩”

លោកស្រីសាស្រ្តាចារ្យ Yamamoto Eiko ទទួលបន្ទុកកម្មវិធី Young Leaders’ Program (YLP) នៃសាកលវិទ្យាល័យណាហ្គោយ៉ា នៃប្រទេសជប៉ុន បានលើកឡើងថា វិស័យសុខាភិបាលកម្ពុជាមានការរីកចម្រើនគួរឱ្យភ្ញាក់ផ្អើលបើធៀបនឹងមុនពេលរាតត្បាតជំងឺកូវីដ-១៩”។

លោកស្រីសាស្ត្រាចារ្យបានលើកឡើងបែបនេះកាលពីថ្ងៃទី២២មករា ឆ្នាំ២០២៥ នៅក្នុងជំនួបពិភាក្សាជាមួយលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាលនៅទីស្តីការក្រសួង។ លោកស្រីសាស្រ្តាចារ្យ បានបន្តថា «លើកនេះខ្ញុំបានទៅទស្សនាមន្ទីពេទ្យចំនួនពីរ ខ្ញុំមានក្តីរំភើបជាពន់ពេកដោយខ្ញុំកត់សំគាល់ថា វិស័យសុខាភិបាលកម្ពុជាមានការរីកចម្រើនគួរឱ្យភ្ញាក់ផ្អើល បើប្រៀបធៀបទៅនឹងមុនពេលរីករាតត្បាតនៃជំងឺកូវីដ-១៩ ជាអនេក»។

លោករដ្ឋមន្ត្រីបានមានប្រសាសន៍ថា វឌ្ឍនភាពវិស័យសុខាភិបាលដោយសារមានកិច្ចខិតខំប្រឹងប្រែង និងគាំទ្ររបស់រាជរដ្ឋាភិបាលក្រោមការដឹកនាំដ៏ឈ្លាសវៃ ប៉ិនប្រសប់ ប្រកបដោយគតិ បណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា​ និងមន្ត្រីសុខាភិបាលគ្រប់លំដាប់ថ្នាក់។ លោកស្រីសាស្ត្រាចារ្យបានបញ្ជាក់ថាគោលបំណងនៃជំនួបនេះ គឺដើម្បីជម្រាបជូនលោករដ្ឋមន្ត្រី អំពីលទ្ធផលនៃកម្មវិធី Young Leaders’ Program
តាំងពីបង្កើតមកមានរយៈពេល ២២ឆ្នាំហើយ បានបណ្តុះបណ្តាលនិស្សិតកម្ពុជា ដែលជាមន្ត្រីរាជការ ចំនួន ២៥រូប ក្នុងនោះវិស័យសុខាភិបាលមានចំនួនច្រើនជាងគេ និងស្នើសុំអនុសាសន៍ណែនាំលើការងារនេះជាបន្ត។

លោករដ្ឋមន្ត្រី បានថ្លែងអំណរគុណ លោកស្រីសាស្រ្តាចារ្យ និងសាកលវិទ្យាល័យដែលបានជួយគាំទ្រ និងបណ្តុះបណ្តាលមន្ត្រីកម្ពុជាជាពិសេសមន្ត្រីក្រសួងសុខាភិបាល និងបានលើកជាសំណូមពរសម្រាប់កម្មវិធីនាពេលអនាគត
សូមពិចារណាក្នុងការបង្កើនចំនួននិស្សិតដែលត្រូវបណ្តុះបណ្តាលជាពិសេសវគ្គបណ្តុះបណ្តាលបណ្ឌិត (PHD)
ដើម្បីពង្រាយមន្ត្រីដែលបានសិក្សាផ្នែកសុខភាពសាធារណៈព្រមទាំងបានទទួលវប្បធម៌ ដ៏ល្អរបស់ជនជាតិជប៉ុន
ទៅកាន់មន្ទីរពេទ្យទូទាំងប្រទេសកម្ពុជា។

ជាមួយគ្នានេះដែរលោករដ្ឋមន្រ្តីបានស្នើបង្កើនកិច្ចសហប្រតិបត្តិក្នុងការបណ្តុះបណ្តាលនិស្សិតជាពិសេសវគ្គបណ្តុះបណ្តាលថ្នាក់បណ្ឌិត (PHD) នៅសាកលវិទ្យាល័យណាហ្គោយ៉ាប្រទេសជប៉ុន។ លោកស្រីសាស្រ្តាចារ្យ បានថ្លែងអំណរគុណ លោករដ្ឋមន្ត្រីដែលបានលើកទឹកចិត្តសាកលវិទ្យាល័យ និងកោតសរសើរវប្បធម៌របស់ជប៉ុនដោយលោកស្រីសាស្រ្តាចារ្យ ក៏បានប្តេជ្ញាពង្រឹង និងពង្រីកកិច្ចសហប្រតិបត្តិការ បន្ថែមតាមរយៈកម្មវិធី Young Leaders’
Program តាមអនុសាសន៍ដ៏ខ្ពង់ខ្ពស់របស់ លោករដ្ឋមន្ត្រី៕

អត្ថបទ៖ សំអឿន