ចូលឆ្នាំចិន៖ សម្ដេចធិបតីប្រាប់សមត្ថកិច្ចឱ្យបន្តរឹតបន្ដឹងការពិនិត្យជាតិស្រវឹងលើអ្នកបើកបរ

អញ្ជើញបិទសន្និបាតការងារប្រចាំឆ្នាំរបស់ក្រសួងសាធារណការ និងដឹកជញ្ជូន នារសៀលថ្ងៃទី២៣ ខែមករា​ ឆ្នាំ២០២៥ សម្ដេចធិបតី នាយករដ្ឋមន្ត្រី បញ្ជាឱ្យអាជ្ញាធរ និងកម្លាំងសមត្ថកិច្ចគ្រប់រាជធានី-ខេត្ត បន្តត្រួតពិនិត្យគ្រឿងស្រវឹងលើអ្នកបើកបរ ពិសេសក្នុងឱកាសបុណ្យចូលឆ្នាំប្រពៃណីចិន ខាងមុខនេះ។

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំដល់ក្រសួងសាធារណការ និងដឹកជញ្ជូន បន្តពង្រឹងកិច្ចសហការជាមួយក្រសួងមហាផ្ទៃ ជាពិសេសជាមួយអគ្គស្នងការដ្ឋាននគរបាលជាតិ ក្នុងការលើកកម្ពស់សុវត្ថិភាពចរាចរណ៍ផ្លូវគោក និងពង្រឹងការអនុវត្តច្បាប់ស្ដីពីចរាចរណ៍ផ្លូវគោកឱ្យបានម៉ឺងម៉ាត់។ ការណែនាំនេះ គឺបន្ទាបពីសម្ដេចបានសង្កេតឃើញថា ក្នុងរយៈពេលចុងក្រោយនេះ គ្រោះថ្នាក់ចរាចរណ៍បង្កឡើងដោយអ្នកបើកបរក្នុងស្ថានភាពស្រវឹង បន្តកើតឡើងជាញឹកញាប់។

សម្ដេចធិបតី មានប្រសាសន៍ដូច្នេះថា៖ «បានក្រាបបន្តិច ប៉ុន្តែប៉ុន្មានថ្ងៃនេះ ចាប់ផ្ដើមងើបឡើងវិញ ដូច្នេះសូមត្រួតពិនិត្យមើលជាតិ ស្រវឹងឡើងវិញ ហើយជាពិសេសក្នុងពេលប៉ុន្មានថ្ងៃចូលឆ្នាំចិន ដែលគេថា ចូលឆ្នាំចិន ស្រវឹងខ្មែរ ពិសេសក្នុងការប្រើប្រាស់ពេលយប់»។

ភ្ជាប់គ្នានេះ សម្ដេចនាយករដ្ឋមន្ត្រី ក៏បានលើកទឹកចិត្តឱ្យបន្តជំរុញប្រើប្រាស់កម្មវិធីដកពិន្ទុប័ណ្ណបើកបរ និងផាកពិន័យបទល្មើសចរាចរណ៍ផ្លូវគោគលើទូរសព្ទដៃ ដែលជាបច្ចេកវិទ្យាបានដាក់ឱ្យអនុវត្តកន្លងមករបស់ក្រសួងសាធារណការ ដើម្បីបង្កើនការចូលរួមគោរពច្បាប់ចរាចរណ៍​ និងឈានទៅដល់ការកាត់បន្ថយអត្រាគ្រោះថ្នាក់ចរាចរណ៍នៅកម្រិតអតិបរមា៕

អត្ថបទ៖ ធឿន វ៉ាន់សុង