ព័ត៌មានជាតិ

ផែកំពង់កណ្តាលកណ្តាលក្រុងកំពត ជាទីតាំងបោះដុំនិងចែកចាយគ្រឿងសមុទ្រដ៏ធំបំផុតនៅខេត្តកំពត

បានផុស

២ ខែ មុន

នៅ

ថ្ងៃសុក្រ ២៤ មករា ២០២៥

ដោយ

ផែកំពង់កណ្តាលតាមបណ្តោយផ្លូវមាត់ព្រែកកំពត ជាទីតាំងបោះដុំនិងចែកចាយលក់គ្រឿងសមុទ្រដ៏ធំប្រចាំខេត្តកំពត។

តាំងពីយប់ស្រាងៗ ទូករបស់ប្រជានេសាទដែលបានចេញទៅនេសាទនៅសមុទ្រ បានចាប់ផ្តើមវិលចូលផែវិញ ដោយនាំមកជាមួយគ្រឿងសមុទ្រស្រស់ៗទើបនេសាទបាន ដើម្បីបោះចែកចាយលក់ដល់ពលរដ្ឋនិងអាជីវករយកទៅបោះលក់បន្តតាមទីផ្សារមានដូចជាមឹក ក្តាម បង្គា ត្រី និងអាហារសមុទ្រផ្សេងទៀត។

ខណៈដែលក្រុមការងារកម្ពុជាថ្មីចុះទៅធ្វើសេចក្តីរាយការណ៍នៅម៉ោងជាង ៨ ព្រឹកកាលពីម្សិលមិញនេះ សភាពនៅផែហាក់មានភាពស្ងប់ស្ងាត់។ ប៉ុន្តែបើតាមក្រុមអាជីវករបានអះអាងប្រាប់ថា សភាពអ៊ូអរគឺមានចាប់ពីម៉ោង ៣ ភ្លឺ រហូតដល់ព្រឹកព្រលឹម ខណៈដែលពលរដ្ឋមកពីគ្រប់ទិសទីបានមករង់ចាំទិញគ្រឿងសមុទ្រស្រស់ៗពីអ្នកនេសាទដែលទើបលើកចុះពីទូកថ្មីៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផែកំពង់កណ្តាលពីមុនមានទីតាំងនៅក្បែរស្ពានចាស់ ក្រោយមកអាជ្ញាធរខេត្តបានប្តូរទៅទីតាំងថ្មីនៅតាមបណ្តោយផ្លូវព្រែកកំពតហួសសាលាខេត្តកំពតបន្តិច។ បើតាមក្រុមអាជីវករដែលកម្ពុជាថ្មីបានសាកសួរ មិនថាពលរដ្ឋក្នុងខេត្ត រួមទាំងភ្ញៀវទេសចរដែលមកលេងខេត្តកំពត តែងតែចូលរករកទិញគ្រឿងសមុទ្រស្រស់ៗនៅផែចុះទូកនេះ ខណៈតម្លៃគ្រឿងសមុទ្លក់នៅទីនេះធូរថ្លៃជាងតាមទីផ្សារ៕