អ្នកលក់ដើមផ្កាអង្គាសីល​​នៅក្រុង​បាត់ដំបង​ឆ្នាំនេះ ព្រួយបារម្ភខ្លាចផ្ការីកមិន​ទាន់ថ្ងៃចូលឆ្នាំចិន

បុរសវ័យចំណាស់ម្នាក់ដែលមានស្រុកកំណើតនៅខេត្តពោធិ៍សាត់ កំពុងមានការព្រួយបារម្ភក្រែងដើមផ្កាអង្គាសីល ចេញផ្កា​មិនទាន់ថ្ងៃចូលឆ្នាំចិន ដោយសារតែរាល់ឆ្នាំគឺចូលឆ្នាំចិននៅខែកុម្ភៈ ដោយឡែកនៅឆ្នាំនេះគឺចូលឆ្នាំនៅចុងខែមករាទៅវិញ​។

កំពុងអង្គុយទទួលទានបាយជាមួយប្រពន្ធនិងកូនៗ ខាងក្រោយដើមផ្កាអង្គាសីលនាដងស្ទឹងសង្កែត្រើយខាងកើត ក្រុង​បាត់ដំបង លោក សែន វិសាល បានរៀបរាប់ថា មែកផ្កាទាំងនេះគឺលោក​បាននាំគ្នាឡើងទៅកាប់នៅជួរភ្នំក្រវាញក្នុងខេត្តពោធិ៍សាត់ ដោយដើមផ្កាអង្គាសីលធំៗណាស់ ហើយលោកបាន​កាត់យកតែមេឃតូចៗមកលក់តែប៉ុណ្ណោះ ដើម្បីទុកឲ្យដើមលូតលាស់សារជាថ្មីទៅឆ្នាំក្រោយ។

ការដឹកចេញមកកាន់ខេត្តបាត់ដំបងគឺត្រូវសហការគ្នាជួលរថយន្តធំៗក្នុងមួយដឹកពី ៦០ ម៉ឺនទៅ ៧០ ម៉ឺន ទើបមកដល់ក្រុងបាត់ដំបង។ នេះបើ​តាមលោក សែន វិសាល។

រាល់ឆ្នាំគឺចូលឆ្នាំចិននៅក្នុងអំឡុងសប្តាហ៍ទី ២ នៃខែកុម្ភៈ ប៉ុន្តែសម្រាប់ឆ្នាំនេះគឺចូលឆ្នាំនៅថ្ងៃទី ២៨ ខែមករាទៅវិញ ដូច្នេះលោកក៏មានការព្រួយបារម្ភខ្លាចផ្កាអង្គាសីល​រីកមិនទាន់ថ្ងៃចូលឆ្នាំ បើដូច្នោះមែនគឺមែកផ្កាទាំងអស់នឹងត្រូវ​បោះ​ចោលជាមិនខាន។

លោក សែន វិសាល បាន​​អះអាង​ថា មែកផ្កាទាំងនេះគឺត្រូវយកចិត្តទុកដាក់ បាញ់ទឹកថែទាំយ៉ាងខ្លាំងជាទីបំផុត ដើម្បីឲ្យផ្ការីកទាន់ថ្ងៃចូលឆ្នាំប្រពៃណីចិន។

ជាចុងក្រោយលោកគិតថា បច្ចុប្បន្ននៅតាមផ្ទះនីមួយៗគឺសម្បូរដាំដើមអង្គាសីលពណ៌លឿងពណ៌ក្រហមដែលនាំចូលពីប្រទេសជិតខាង ប៉ុន្តែទោះជាយ៉ាងនេះក្តី ក៏លោករស់នៅខេត្តពោធិ៍សាត់គឺជាទម្លាប់ទៅហើយ ក្នុងការកាប់មែកផ្កាអង្គាសីល​យកមកលក់តាមខេត្ត ទោះបីជាបានកម្រៃតិចតួចត្រឡប់ទៅផ្ទះវិញក៏ដោយ៕

អត្ថបទ : សោ និយមរ័ត្ន