ព័ត៌មានជាតិ

ថៃ ប្ដេជ្ញាជួយលើកកម្ពស់ការប្រើបញ្ញាសិប្បនិម្មិត និងជំនាញបច្ចេកវិទ្យាព័ត៌មាន និងសារគមនាគមន៍ដល់សិស្ស និងគ្រូ នៅកម្ពុជា

បានផុស

៣ ម៉ោង មុន

នៅ

ថ្ងៃសុក្រ ២៤ មករា ២០២៥

ដោយ

មូលនិធិពានរង្វាន់សម្តេចចៅហ្វាមហាចក្រី នៃប្រទេសថៃ បានប្ដេជ្ញាជួយលើកកម្ពស់ការប្រើបញ្ញាសិប្បនិម្មិត និងជំនាញបច្ចេកវិទ្យាព័ត៌មាន និងសារគមនាគមន៍ដល់សិស្ស និងគ្រូ នៅកម្ពុជា តាមរយៈគម្រោងតភ្ជាប់សាលាសកល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងតភ្ជាប់សាលាសកល ជាគម្រោងមួយដែលរៀបចំឡើងដោយមូលនិធិពានរង្វាន់សម្តេចចៅហ្វាមហាចក្រី ដោយមានការគាំទ្រពីសំណាក់ក្រសួងអប់រំ យុវជន និងកីឡា នៃប្រទេសកម្ពុជា និងក្រសួងអប់រំ នៃប្រទេសម៉ាឡេស៊ី ក្នុងគោលបំណងជំរុញកិច្ចសហប្រតិបត្តិការលើផ្នែកវប្បធម៌ និងលើកកម្ពស់ជំនាញសតវត្សទី ២១ រវាងសិស្ស និងគ្រូបង្រៀន មកពីប្រទេសកម្ពុជា និងប្រទេសម៉ាឡេស៊ី ក៏ដូចជាជំរុញការយល់ដឹងលើភាពចម្រុះ នៃវប្បធម៌ និងភាពជាពលរដ្ឋសកល។

គម្រោងនេះ ត្រូវបានរៀបចំឡើងក្នុងរយៈពេល ៤ ខែ ចាប់ផ្ដើមពីខែមិថុនា ដល់ខែកញ្ញា ឆ្នាំ ២០២៤ ក្រោមមូលបទ ការបង្កើនការផ្លាស់ប្ដូរវប្បធម៌ជាមួយកម្មវិធីបញ្ញាសិប្បនិម្មិត និងមានការចូលរួមពីសាលារៀនចំនួន ១៦ គ្រូបង្រៀនចំនួន ៤៨ រូប និងសិស្សានុសិស្សចំនួន ៣២០ រូប មកពីប្រទេសទាំងពីរ។ សម្រាប់ឆ្នាំ ២០២៥ មូលនិធិពានរង្វាន់សម្តេចចៅហ្វាមហាចក្រី គ្រោងនឹងពង្រីកវិសាលភាព នៃគម្រោងនេះ ដោយមានការចូលរួមពីសំណាក់គ្រូបង្រៀន និងសិស្សានុសិស្ស មកពីប្រទេសកម្ពុជា និងប្រទេសថៃ។ នៅប្រទេសកម្ពុជា គម្រោងនេះ បានជ្រើសរើសយកសាលារៀនចំនួន ៦ រួមមាន វិទ្យាល័យ ហ៊ុន សែន រលាប្អៀរ អនុវិទ្យាល័យព្រះធាតុ សាលាបឋមសិក្សា គំរូក្រុង វិទ្យាល័យសុខអានសំរោង វិទ្យាល័យ ហ៊ុន សែន ១ មិថុនា និងវិទ្យាល័យអង្គជុំ។

នៅក្នុងជំនួបជាមួយមូលនិធិពានរង្វាន់សម្តេចចៅហ្វាមហាចក្រី កាលពីរសៀលថ្ងៃទី ២៣ មករា លោកបណ្ឌិត ហុង គឹមជាង អនុរដ្ឋលេខាធិការ នៃក្រសួងអប់រំ យុវជន និងកីឡា បានកោតសរសើរលើគម្រោងតភ្ជាប់សាលាសកល របស់មូលនិធិពានរង្វាន់សម្តេចចៅហ្វាមហាចក្រី ក្នុងការលើកកម្ពស់ការប្រើប្រាស់បញ្ញាសិប្បនិម្មិត (AI) និងជំនាញបច្ចេកវិទ្យាព័ត៌មាន និងសារគមនាគមន៍ (ICT) ដើម្បីជំរុញការរៀន និងបង្រៀន ដែលគំនិតផ្ដួចផ្ដើមនេះ ស្របគ្នាទៅនឹងកិច្ចខិតខំប្រឹងប្រែងរបស់ក្រសួងអប់រំ យុវជន និងកីឡា ក្នុងការដាក់បញ្ចូលការប្រើប្រាស់បញ្ញាសិប្បនិម្មិតក្នុងកម្មវិធីសិក្សា ដើម្បីលើកកម្ពស់ការប្រើប្រាស់ឌីជីថលនៅក្នុងការអប់រំ៕

អត្ថបទ ៖ សំអឿន