ព័ត៌មានជាតិ

មន្ត្រីជាន់ខ្ពស់ ប.ស.ស ណែនាំអធិការកិច្ច ត្រូវអនុវត្តកាតព្វកិច្ចដោយភាពម៉ឺងម៉ាត់ ពេលចុះតាមសហគ្រាស

បានផុស

១ ខែ មុន

នៅ

ថ្ងៃសុក្រ ២៤ មករា ២០២៥

ដោយ

មន្ត្រីជាន់ខ្ពស់ នៃបេឡាជាតិសន្តិសុខសង្គម(ប.ស.ស) បានធ្វើការណែនាំដល់មន្ត្រីអធិការកិច្ចសន្តិសុខសង្គម និងថ្នាក់ដឹកនាំគ្រប់សាខា ប.ស.ស. ទូទាំងប្រទេស ពេលចុះអធិការកិច្ចនៅតាមសហគ្រាស គ្រឹះស្ថាន ទូទាំងប្រទេស ត្រូវអនុវត្តកាតព្វកិច្ចប្រកបដោយភាពម៉ឺងម៉ាត់ និងការទទួលខុសត្រូវខ្ពស់ ដើម្បីធានាឱ្យបាននូវផ្តល់អត្ថប្រយោជន៍របបសន្តិសុខសង្គមជូនដល់កម្មករ-និយោជិតគ្រប់រូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំណែនាំ និងតម្រង់ទិសជូនដល់មន្ត្រីអធិការកិច្ចសន្តិសុខសង្គម អំពីគោលការណ៍ នៃការចុះអធិការកិច្ចនៅតាមសហគ្រាស គ្រឹះស្ថាន ទូទាំងប្រទេស កាលពីថ្ងៃទី ២៣ មករា លោក គឹម កែវរស្មី អគ្គនាយករង តំណាងលោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស បានឱ្យដឹងថា កិច្ចប្រជុំណែនាំ និងតម្រង់ទិសនេះ ដើម្បីឱ្យមន្ដ្រីអធិការកិច្ចសន្ដិសុខសង្គម និងប្រធានសាខា ប.ស.ស. ខេត្ត-ខណ្ឌ ទូទាំងប្រទេស បានយល់ដឹងអំពីគោលការណ៍ នៃការចុះអធិការកិច្ចនៅតាមសហគ្រាស គ្រឹះស្ថាន ដើម្បីពង្រឹងការអនុវត្តច្បាប់ស្ដីពីរបបសន្តិសុខសង្គម និងលិខិតបទដ្ឋានគតិយុត្តិពាក់ព័ន្ធ ដែលនឹងត្រូវអនុវត្តចាប់ពីថ្ងៃទី ១ ខែកុម្ភៈ ឆ្នាំ ២០២៥ ខាងមុខនេះតទៅ។

លោកអគ្គនាយករង ប.ស.ស បានបញ្ជាក់ថា គោលបំណង នៃការចុះអធិការកិច្ចនេះ ដើម្បីពង្រឹងការត្រួតពិនិត្យ និងជំរុញការអនុវត្តច្បាប់ឱ្យបានម៉ឺងម៉ាត់នូវវិធានការលើការចុះបញ្ជីសហគ្រាស គ្រឹះស្ថានថ្មី ការរាយការណ៍ចំនួនកម្មករ-និយោជិត ការបង់ភាគទាន និងការប្រកាសប្រាក់ឈ្នួលឱ្យបានត្រឹមត្រូវ ដែលទាមទារឱ្យមន្ដ្រីអធិការកិច្ចសន្ដិសុខសង្គម និងថ្នាក់ដឹកនាំគ្រប់សាខា ប.ស.ស. ខេត្ត-ខណ្ឌ ទាំងអស់ ត្រូវបង្កើនការយកចិត្តទុកដាក់ខ្ពស់ក្នុងការអនុវត្តភារកិច្ច សំដៅដល់ការធានាឱ្យបាននូវផ្តល់អត្ថប្រយោជន៍របបសន្តិសុខសង្គមជូនដល់កម្មករ-និយោជិតគ្រប់រូប ជាពិសេសធានាឱ្យបាននូវនិរន្តរភាពនៃមូលនិធិសន្តិសុខសង្គម។

លោកអគ្គនាយករង បានបន្តថា ករណី សហគ្រាស គ្រឹះស្ថាន មិនអនុវត្តកាតព្វកិច្ចបង់ភាគទានតាមកាលកំណត់ ឬ ប្រកាសប្រាក់ឈ្នួលជាប់ភាគទានមិនត្រឹមត្រូវ ឬ មិនអនុវត្តកាតព្វកិច្ចរាយការណ៍អំពីចំនួនកម្មករ-និយោជិតឱ្យបានត្រឹមត្រូវ ឬ ការដកយកភាគទានមិនអនុលោមតាមបទប្បញ្ញត្តិ នៃច្បាប់ស្ដីពីរបបសន្តិសុខសង្គម នោះ ប.ស.ស. នឹងត្រូវចាត់វិធានការតាមផ្លូវច្បាប់ជាធរមាន។

យ៉ាងណាក៏ដោយ លោកអគ្គនាយករង ប.ស.ស សង្ឃឹមយ៉ាងមុតមាំថា មន្ត្រីអធិការកិច្ចសន្តិសុខសង្គម និងថ្នាក់ដឹកនាំគ្រប់ សាខា ប.ស.ស ទូទាំងប្រទេស នឹងអនុវត្តកាតព្វកិច្ចនេះប្រកបដោយភាពម៉ឺងម៉ាត់ និងការទទួលខុសត្រូវខ្ពស់៕

អត្ថបទ ៖ សំអឿន