ព័ត៌មានជាតិ

គ្រូពេទ្យព្យាបាល មិនត្រូវបើកថ្នាំជូនសមាជិក ប.ស.ស ដោយមិនទាន់ពិគ្រោះ និងពិនិត្យព្យាបាលជំងឺឡើយ

បានផុស

១ ខែ មុន

នៅ

ថ្ងៃសុក្រ ២៤ មករា ២០២៥

ដោយ

បេឡាជាតិសន្តិសុខសង្គម(ប.ស.ស) បានអះអាងថា គ្រូពេទ្យព្យាបាល មិនត្រូវបើកថ្នាំជូនសមាជិក ប.ស.ស ដោយមិនទាន់បានពិគ្រោះ និងពិនិត្យព្យាបាលជំងឺឡើយ ព្រោះអាចបង្កឱ្យប៉ះពាល់ដល់សុខភាពធ្ងន់ធ្ងរ ឬបណ្តាលឱ្យបាត់បង់ជីវិតផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម ប.ស.ស. ដើម្បីទទួលបានសេវាព្យាបាល និងផ្តល់ការព្យាបាលត្រឹមត្រូវ សមាជិក ប.ស.ស ត្រូវទទួលបានការពិនិត្យព្យាបាលត្រឹមត្រូវមុនពេលចេញវេជ្ជបញ្ជា និងបើកថ្នាំ។ សមាជិក ប.ស.ស.ទាំងអស់ មិនត្រូវទទួលទានថ្នាំដោយមិនទាន់បានពិគ្រោះជាមួយគ្រូពេទ្យនោះឡើយ។ ត្រូវហ៊ានសាកសួរគ្រូពេទ្យពេលគ្រូពេទ្យបើកថ្នាំដោយមិនទាន់បានពិគ្រោះជំងឺ ឬ ពិនិត្យជំងឺត្រឹមត្រូវ។

ប.ស.ស. បានបន្តថា ចំពោះគ្រូពេទ្យព្យាបាលវិញ ត្រូវព្យាបាលជូនសមាជិក ប.ស.ស ស្របតាមក្រមសីលធម៌វិជ្ជាជីវៈរបស់គ្រូពេទ្យដែលបានដាក់ចេញដោយក្រសួងសុខាភិបាល ដោយមិនត្រូវបើកថ្នាំជូនសមាជិក ប.ស.ស ដោយមិនទាន់បានពិគ្រោះ និងពិនិត្យព្យាបាលជំងឺឡើយ ព្រោះអាចបង្កឱ្យប៉ះពាល់ដល់សុខភាពអ្នកប្រើប្រាស់រួមមានប៉ះពាល់សុខភាពរាងកាយធ្ងន់ធ្ងរ ជំងឺស៊ាំទៅនឹងថ្នាំពេទ្យពិបាកព្យាបាល ឬវិវត្តទៅជាជំងឺអ្វីមួយផ្សេងទៀត អាចរងប្រតិកម្មថ្នាំពេទ្យ ហើយករណីធ្ងន់ធ្ងរអាចបណ្តាលឱ្យបាត់បង់ជីវិត។

ប.ស.ស បានលើកឡើងទៀតថា សមាជិក ប.ស.ស និងគ្រូពេទ្យព្យាបាលទាំងឡាយណាដែលបានសមគំនិតគ្នាដោយចេតនាក្នុងគោលបំណងកេងចំណេញផលប្រយោជន៍ពី ប.ស.ស នោះ ប.ស.ស នឹងកសាងសំណុំរឿងបញ្ជូនទៅកាន់តុលាការ ដើម្បីទទួលខុសត្រូវចំពោះមុខច្បាប់ជាធរមាន។ ក្រៅពីនេះ ប.ស.ស នឹងមិនអនុញ្ញាតឱ្យបន្តប្រើប្រាស់សេវា ប.ស.ស បន្តទៀតឡើយ និងត្រូវសងត្រឡប់មកវិញទឹកប្រាក់ដែលបានកេងចំណេញនៅតាមការខាតបង់របស់មូលនិធិសន្តិសុខសង្គម។ ចំណែកមូលដ្ឋានសុខាភិបាលជាដៃគូ នឹងត្រូវផ្តាច់កិច្ចព្រមព្រៀងជាមួយ ប.ស.ស ដោយមិនអនុញ្ញាតឱ្យបន្តផ្តល់សេវាជូនសមាជិក ប.ស.ស. ទៀតឡើយ និងត្រូវសងត្រឡប់មកវិញទឹកប្រាក់ដែលបានកេងចំណេញនៅតាមការខាតបង់របស់មូលនិធិសន្តិសុខសង្គម៕

អត្ថបទ ៖ សំអឿន