ព័ត៌មានជាតិ

ស្ពានអាកាសភ្លោះ ភ្ជាប់ទៅព្រលានអន្តរជាតិតេជោ សម្រេចបាន ៤៥% គ្រោងដាក់ឲ្យប្រើប្រាស់នៅអំឡុងខែមិថុនាឆ្នាំ ២០២៥

បានផុស

១ year មុន

នៅ

ថ្ងៃចន្ទ ២៧ មករា ២០២៥

ដោយ

មន្រ្តីក្រសួងសាធារណការនិងដឹកជញ្ជូនបានឲ្យដឹងថា គិតត្រឹមថ្ងៃទី២៥ ខែមករា ឆ្នាំ២០២៥ វឌ្ឍនភាពនៃដំណើរការសាងសង់ស្ពានអាកាសភ្លោះ “សម្តេចមហាបវរធិបតី” សម្រេចបានប្រមាណ ៤៥% ខណៈការសាងសង់ស្ពានទី១ (មហាវិថីសម្តេច ហ៊ុន សែន ទៅព្រលានតេជោ) គ្រោងបញ្ចប់នៅមុនខែមេសា ឆ្នាំ២០២៥ និងបញ្ចប់គម្រោងទាំងមូលនៅខែមិថុនា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ពានអាកាសភ្លោះ សាងសង់ឡើងជាប្រភេទស្ពានបេតុងអាមេ (ធ្នឹមរាងអក្សរ I) ដែលមានបណ្ដោយស្ពានសរុប ៦២២ ម៉ែត្រ, បណ្ដោយតួស្ពាន ២៨១ម៉ែត្រ, ផ្លូវតភ្ជាប់ក្បាលស្ពានទៅមកខាងមហាវិថីសម្តេចតេជោ ហ៊ុន សែន ប្រវែង ១៨០ ម៉ែត្រ រួមទាំងផ្លូវតភ្ជាប់ក្បាលស្ពានទៅមកខាងព្រលានយន្តហោះអន្តរជាតិតេជោ ១៦១ ម៉ែត្រ។

ស្ពានអាកាសភ្លោះ “សម្តេចមហាបវរធិបតី” ស្ថិតនៅតាមបណ្ដោយមហាវិថីសម្ដេចតេជោ ហ៊ុន សែន ប្រសព្វផ្លូវជាតិលេខ ២ ព្រំប្រទល់រវាង រាជធានីភ្នំពេញ និងខេត្តកណ្តាល បានបើកការដា្ឋនកាលពីថ្ងៃទី១៧ ខែ មិថុនា ឆ្នាំ ២០២៤ ក្រោមអធិបតីភាពសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

ថ្លែងក្នុងពិធីបើកការដ្ឋានសាងសង់ស្ពានអាកាសភ្លោះ សម្តេចបហាបវរធិបតី លោក ឃួង ស្រេង អភិបាលរាជធានីភ្នំពេញបានគូសបញ្ជាក់ថា ការសាងសង់ស្ពានអាកាសភ្លោះនេះ ដើម្បីឆ្លើយតបទៅនឹងស្ថានភាពចរាចរណ៍ ដែលនឹងមានសភាពកាន់តែមមាញឹក នៅពេលដែលព្រលានយន្តហោះអន្តរជាតិតេជោស្ថិតក្នុងខេត្តកណ្តាល ដាក់ឱ្យដំណើរការនៅឆ្នាំ២០២៥។

លោក ឃួង ស្រេង បានលើកឡើងថា មហាវិថីសម្តេចតេជោ ហ៊ុន សែន ត្រូវបានសង់តភ្ជាប់ទៅដល់ព្រលានយន្តហោះថ្មី ដូច្នេះច្បាស់ណាស់នៅពេលព្រលានយន្តហោះដាក់ឱ្យដំណើរការ ចរាចរណ៍កាន់តែមមាញឹកហើយនៅចំណុចឆ្លងកាត់ផ្លូវជាតិលេខ ២ អាចនឹងប្រឈមការកកស្ទះ ប្រសិនបើមិនមានស្ពានអាកាសភ្លោះសម្រាប់ឆ្លងកាត់លើផ្លូវជាតិលេខ ២ ទេនោះ។

ស្ពានអាកាសភ្លោះនេះ គឺជាស្ពានអាកាសទី១ ដែលត្រូវបានបើកការដ្ឋានស្ថាបនាក្នុងអាណត្តិរាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់សម្តេចធិបតី ហ៊ុន ម៉ាណែត ជានាយករដ្ឋមន្ត្រី។ អនុវត្តការសាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) គ្រោងប្រើរយៈពេល សាងសង់ចំនួន១២ខែ និងត្រូវចំណាយថវិកាចំនួន ១៦,២០០,៥០០ដុល្លារ ដែលជាកញ្ចប់ថវិកាបានមកពីការបង្វែរកញ្ចប់ថវិកាពីគម្រោងសាងសង់ស្ពានអាកាស គង់ សំអុល និងមូលនិធិអភិវឌ្ឍកោះនរា។ ស្ពាននេះនឹងក្លាយជាស្ពានអាកាស ទី៩ ក្រោមកិច្ចសហប្រតិបត្តិការរវាងរដ្ឋបាលរាជធានីភ្នំពេញ និងវិស័យឯកជន។

បច្ចុប្បន្នក្នុងរាជធានីភ្នំពេញ មានស្ពានអាកាសចំនួន ៧ ដែលបានសាងសង់រួចរាល់ និងកំពុងប្រើប្រាស់ រួមមាន៖ ស្ពានអាកាសក្បាលថ្នល់ ស្ពានអាកាស៧មករា ស្ពានអាកាសស្ទឹងមានជ័យ ស្ពានអាកាស៥មករា ស្ពានអាកាសផ្សារដីហ៊ុយ ស្ពានអាកាសរង្វង់មូលចោមចៅ និងស្ពានអាកាសឫស្សីកែវ ស្ថិតលើផ្លូវជាតិលេខ៥។

ក្រៅពីស្ពានអាកាសភ្លោះ “សម្តេចមហាបវរធិបតី” ដែលកំពុងសាងសង់ នៅរាជធានីភ្នំពេញក៏នៅមានស្ពានអាកាសមួយទៀតកំពុងសាងសង់នោះ គឺស្ពានអាកាស «មរតកតេជោ» ស្ថិតនៅចំណុចប្រសព្វរវាងមហាវិថីសម្តេចតេជោ ហ៊ុន សែន ជាមួយមហាវិថីព្រះមុនីវង្ស និងវិថីកងយោធពលខេមរភូមិន្ទហៅផ្លូវ ២៧១៕

Related Topics:ស្ពានអាកាសភ្លោះ