ព័ត៌មានជាតិ

ប.ស.ស ណែនាំម្ចាស់សហគ្រាសគ្រឹះស្ថាន ប្ដឹងអធិការកិច្ចសន្តិសុខសង្គម ករណីរកឃើញមានភាពមិនប្រក្រតី

បានផុស

១ ខែ មុន

នៅ

ថ្ងៃចន្ទ ២៧ មករា ២០២៥

ដោយ

បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្តុះបណ្តាលវិជ្ជាជីវៈ បានណែនាំម្ចាស់សហគ្រាស គ្រឹះស្ថាន ឬ អ្នកតំណាងទាំងអស់ ប្តឹងមន្ដ្រីអធិការកិច្ចសន្ដិសុខសង្គម ក្នុងករណីរកឃើញថា មានភាពមិនប្រក្រតីណាមួយពេលដែលចុះទៅអធិការកិច្ច ចាប់ពីថ្ងៃទី ១ ខែកុម្ភៈ ឆ្នាំ ២០២៥ ខាងមុខនេះតទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បេឡាជាតិសន្តិសុខសង្គម បានបន្តថា ម្ចាស់សហគ្រាស គ្រឹះស្ថាន អាចធ្វើការប្តឹងអធិការកិច្ចសន្តិសុខសង្គមតាមរយៈលេខ ១២៨៦ ឬ ១២៩៧ ឬ ប្តឹងទៅប្រអប់អនាមិករបស់ក្រសួងការងារ និងបណ្ដុះបណ្ដាលវិជ្ជាជីវៈ។

ដើម្បីពង្រឹងប្រសិទ្ធភាព នៃការអនុវត្តច្បាប់ស្ដីពីរបបសន្តិសុខសង្គម និងលិខិតបទដ្ឋានគតិយុត្តិពាក់ព័ន្ធ បេឡាជាតិសន្តិសុខសង្គម (ប.ស.ស) នៃក្រសួងការងារ និងបណ្តុះបណ្តាលវិជ្ជាជីវៈ នឹងចាប់ផ្ដើមយុទ្ធនាការចុះអធិការកិច្ចនៅតាមសហគ្រាស គ្រឹះស្ថានទូទាំងប្រទេស ចាប់ពីថ្ងៃទី ១ ខែកុម្ភៈ ឆ្នាំ ២០២៥ នេះតទៅ ក្នុងគោលដៅពង្រីកវិសាលភាព នៃការគ្របដណ្ដប់សមាជិក ប.ស.ស ឱ្យកាន់តែទូលំទូលាយ សំដៅធានាឱ្យបាននូវសុខុមាលភាព និងអត្ថប្រយោជន៍ នៃរបបសន្តិសុខសង្គមដល់កម្មករ-និយោជិតគ្រប់រូប ជាពិសេសធានាឱ្យបាននូវនិរន្តរភាពមូលនិធិសន្តិសុខសង្គម។

បេឡាជាតិសន្តិសុខសង្គម បានស្នើឱ្យម្ចាស់សហគ្រាស គ្រឹះស្ថាន ឬ អ្នកតំណាងទាំងអស់ ចូលរួមសហការ និងត្រូវអនុវត្តតាមច្បាប់ស្ដីពីរបបសន្តិសុខសង្គម និងលិខិតបទដ្ឋានគតិយុត្តិពាក់ព័ន្ធ ប្រកបដោយស្មារតីទទួលខុសត្រូវខ្ពស់។

លោក គឹម កែវរស្មី អគ្គនាយករងបេឡាជាតិសន្តិសុខសង្គម បានធ្វើការណែនាំដល់មន្ត្រីអធិការកិច្ចសន្តិសុខសង្គម និងថ្នាក់ដឹកនាំគ្រប់ សាខា ប.ស.ស ទូទាំងប្រទេស ពេលចុះអធិការកិច្ចនៅតាមសហគ្រាស គ្រឹះស្ថានទូទាំងប្រទេស ត្រូវអនុវត្តកាតព្វកិច្ចប្រកបដោយភាពម៉ឺងម៉ាត់ និងការទទួលខុសត្រូវខ្ពស់ ដើម្បីធានាឱ្យបាននូវការផ្តល់អត្ថប្រយោជន៍របបសន្តិសុខសង្គមជូនដល់កម្មករ-និយោជិតគ្រប់រូប។

ទន្ទឹមនឹងនេះ ត្រូវត្រួតពិនិត្យ និងជំរុញការអនុវត្តច្បាប់ឱ្យបានម៉ឺងម៉ាត់នូវវិធានការលើការចុះបញ្ជីសហគ្រាស គ្រឹះស្ថានថ្មី ការរាយការណ៍ចំនួនកម្មករ-និយោជិត ការបង់ភាគទាន និងការប្រកាសប្រាក់ឈ្នួលឱ្យបានត្រឹមត្រូវ ដែលទាមទារឱ្យមន្ត្រីអធិការកិច្ចសន្តិសុខសង្គម និងថ្នាក់ដឹកនាំគ្រប់សាខា ប.ស.ស ខេត្ត-ខណ្ឌ ទាំងអស់ ត្រូវបង្កើនការយកចិត្តទុកដាក់ខ្ពស់ក្នុងការអនុវត្តភារកិច្ច សំដៅដល់ការធានាឱ្យបាននូវផ្តល់អត្ថប្រយោជន៍របបសន្តិសុខសង្គមជូនដល់កម្មករ-និយោជិតគ្រប់រូប ជាពិសេសធានាឱ្យបាននូវនិរន្តរភាព នៃមូលនិធិសន្តិសុខសង្គម។

លោកអគ្គនាយករង បានបន្តថា ក្នុងករណី សហគ្រាស គ្រឹះស្ថាន មិនអនុវត្តកាតព្វកិច្ចបង់ភាគទានតាមកាលកំណត់ ឬ ប្រកាសប្រាក់ឈ្នួលជាប់ភាគទានមិនត្រឹមត្រូវ ឬ មិនអនុវត្តកាតព្វកិច្ចរាយការណ៍អំពីចំនួនកម្មករ-និយោជិតឱ្យបានត្រឹមត្រូវ ឬ ការដកយកភាគទានមិនអនុលោមតាមបទប្បញ្ញត្តិ នៃច្បាប់ ស្ដីពីរបបសន្តិសុខសង្គម នោះ ប.ស.ស នឹងត្រូវចាត់វិធានការតាមផ្លូវច្បាប់ជាធរមាន៕

អត្ថបទ ៖ សំអឿន