ព័ត៌មានជាតិ

ក្រសួងការងារ ប្រកាសពីតម្រូវការកម្លាំងពលកម្មក្នុងស្រុកជិត ៨ ម៉ឺនកន្លែង នៅទូទាំងប្រទេស បម្រើលើវិស័យធំៗ ៣

បានផុស

១ ខែ មុន

នៅ

ថ្ងៃចន្ទ ២៧ មករា ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសថា គិតត្រឹថ្ងៃទី ២៤ ខែមករា ឆ្នាំ ២០២៥ កម្ពុជា មានតម្រូវការកម្លាំងពលកម្មក្នុងស្រុកចំនួន ៧៨ ៥១៦ កន្លែង នៅទូទាំងប្រទេស សម្រាប់បម្រើទៅលើវិស័យធំៗ ៣ រួមមាន វិស័យឧស្សាហកម្ម សេវាកម្ម និងកសិកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួងការងារ បានឱ្យដឹងថា កម្លាំងពលកម្មចំនួន ៧៨ ៥១៦ កន្លែង ក្នុងនោះ វិស័យឧស្សាហកម្មមានតម្រូវការចំនួន ៦៦ ៨៧២ កន្លែង វិស័យសេវាកម្មមានចំនួន ៧ ៩៦១ កន្លែង និងវិស័យកសិកម្មមានចំនួន ៧ ៦៨៣ កន្លែង។

ក្នុងនោះ នៅរាជធានីភ្នំពេញមាន ២៣ ២១៧ កន្លែង ក្នុងនោះ ផ្នែកឧស្សាហកម្ម ១៩ ៣៤១ កន្លែង និងផ្នែកសេវាកម្ម ៣ ៨៧៦ កន្លែង។ ខេត្តកំពង់ឆ្នាំងមានតម្រូវការផ្នែកឧស្សាហកម្ម ១៥ ០១៩ កន្លែង។ ក្នុងនោះ ផ្នែកឧស្សាហកម្ម ១៥ ០០០ កន្លែង និងផ្នែកសេវាកម្ម ៣១៩ កន្លែង។ ខេត្តស្វាយរៀងមានចំនួន ១០ ៨៦៣ កន្លែង ក្នុងនោះ វិស័យឧស្សាហកម្មមាន ១០ ០០៥ កន្លែង និងសេវាកម្ម ៨៥៨ កន្លែង។ ខេត្តកណ្តាលមានតម្រូវការកម្លាំងពលកម្ម ៦ ៨៨៣ កន្លែង ក្នុងនោះ ផ្នែកឧស្សាហកម្ម ៦ ៨៣៧ កន្លែង និងផ្នែកសេវាកម្ម ៤៦ កន្លែង។

ចំណែកខេត្តកំពង់ស្ពឺមានតម្រូវការកម្លាំងពលកម្មផ្នែកឧស្សាហកម្ម ៤ ៦៥៤ កន្លែង។ ខេត្តរតនគីរីមានតម្រូវការផ្នែកកសិកម្មចំនួន ៤ ៤៥៧ កន្លែង។ ខេត្តតាកែវមាន ៤ ២៦៤ កន្លែង ក្នុងនោះ វិស័យឧស្សាហកម្ម ៤ ២៣៥ កន្លែង និង សេវាកម្ម ១២៩ កន្លែង។ ខេត្តក្រចេះមានតម្រូវការកម្លាំងពលកម្ម ៣ ០០៣ កន្លែង ក្នុងនោះ ផ្នែកសេវាកម្ម ៣ កន្លែង និងកសិកម្ម ៣ ០០០ កន្លែង។

ខេត្តកំពង់ចាមមានតម្រូវការកម្លាំងពលកម្មចំនួន ១ ១៦២ កន្លែង ក្នុងនោះផ្នែកឧស្សាហកម្ម ១ ០៥១ កន្លែង និងសេវាកម្ម ១១១ កន្លែង។ ខេត្តពោធិ៍សាត់មានតម្រូវការកម្លាំង ១ ១៤០ កន្លែង ក្នុងនោះ ផ្នែកឧស្សាហកម្ម ១ ០០៩ កន្លែង និងសេវាកម្ម ១៣១ កន្លែង និងខេត្តផ្សេងៗ មាន ៣ ៨៥៤ កន្លែង ក្នុងនោះ ឧស្សាហកម្មមាន ៧៤០ កន្លែង សេវាកម្ម ២ ៨៨៨ កន្លែង និងកសិកម្ម ២២៦ កន្លែង។

ក្រសួងការងារ បានបន្តទៀតថា កម្លាំងពលកម្មជិត ៨ ម៉ឺនកន្លែង នឹងត្រូវបែងចែកទៅតាមប្រភេទមុខរបរចំនួន ១០ រួមមាន អ្នកបញ្ជាម៉ាស៊ីនដេរ កម្មករចម្ការដំណាំ កម្មករក្នុងផលិតកម្ម កម្មករខ្ចប់វេចដោយដៃ យន្តការី និងអ្នកដំឡើងអគ្គិសនី វិជ្ជាជីវៈខាងការផ្សព្វផ្សាយ និងទីផ្សារ មន្ត្រីឥណទាន និងកម្ចីប្រាក់ អ្នកបញ្ជាម៉ាស៊ីនធ្វើស្បែកជើង កម្មករដំណាំចម្រុះ និងចិញ្ចឹមបសុសត្វ អ្នកឯកទេសត្រួតពិនិត្យ និងដំណើរការផលិត និងមុខរបរផ្សេងៗ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវដល់ប្រជាពលរដ្ឋខ្មែរទាំងអស់ ស្វែងរកឱកាសការងារធ្វើនៅក្នុងស្រុក ជៀសវាងទៅធ្វើការដោយខុសច្បាប់នៅក្រៅប្រទេសតាមរយៈមេខ្យល់នាំឱ្យបាត់បង់អត្ថប្រយោជន៍ ឬ មានការរំលោភបំពានផ្លូវច្បាប់ ពិសេសប្រឈមនឹងការចាប់ខ្លួនពីសំណាក់អាជ្ញាធរបរទេសទៀតផង។

លោកបានបន្តថា ការស្វែងរកការងារធ្វើនៅក្នុងស្រុកពុំមានការលំបាកនោះទេ ពីព្រោះឱកាសការងារក្នុងស្រុកត្រូវបានប្រកាសជារៀងរាល់សប្ដាហ៍តាមរយៈទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ ទាំងនៅលើបណ្ដាញសង្គម និងតាមរោងចក្រ សហគ្រាស ក៏ដូចជានៅតាមមូលដ្ឋានរបស់ប្រជាពលរដ្ឋដោយផ្ទាល់តែម្តង ដែលការងារទាំងនោះទទួលបានអត្ថប្រយោជន៍ច្រើនដូចទៅនឹងបណ្តាប្រទេសជិតខាងផងដែរដូចជា ទទួលបានប្រាក់ឈ្នួលសមរម្យបើធៀបជាមួយបណ្តាប្រទេសជិតខាងមួយចំនួននាពេលបច្ចុប្បន្ន ,កន្លែងការងារនៅក្បែរផ្ទះ និងការចំណាយទាប ដែលអាចឱ្យប្រជាពលរដ្ឋអាចសន្សំសំចៃបានច្រើន៕

អត្ថបទ ៖ សំអឿន