ប៉ូឡូញ បង្ហាញបំណងចង់បង្កើតរោងចក្រកែច្នៃចំណីអាហារនៅកម្ពុជា ដើម្បីផ្គត់ផ្គង់ទីផ្សារក្នុងតំបន់

ក្នុង​ឱកាស​ចូល​ជួប​សំដែង​ការគួរសម និងពិភាក្សាការងារ​ជា​មួយ​លោក ស៊ុន ចាន់​ចាន់ថុល អនុប្រធាន​ទី​១ ក្រុម​ប្រឹក្សា អភិវឌ្ឍន៍​កម្ពុជា​ នា​ថ្ងៃ​ទី​២៧ ខែ​មករា នេះ លោក CÉSAR LIPKA នាយកប្រតិបត្តិក្រុមហ៊ុន LipCo Foods របស់ប្រទេសប៉ូឡូញ បាន​បង្ហាញ​ផែន​ការ​ចង់​បង្កើតរោងចក្រកែច្នៃចំណីអាហារ​នៅ​ក្នុង​ប្រទេស​កម្ពុជា ដើម្បី​ផ្គត់ផ្គង់​ទីផ្សារ​ក្នុងតំបន់។

​

ក្នុងឱកាស​នោះ លោក ស៊ុន ចាន់ថុល ​បានលើកឡើង​អំពីការយកចិត្ត​ទុកដាក់ខ្ពស់របស់រាជរដ្ឋាភិបាល​កម្ពុជាចំពោះវិស័យឯកជន ដែលបានចាត់ទុកវិស័យនេះជាម៉ាស៊ីនដ៏សំខាន់ក្នុងការជំរុញកំណើនសេដ្ឋកិច្ចជាតិ។ ជាក់ស្ដែង ប្រមុខរាជរដ្ឋាភិបាលតែងតែ​អនុញ្ញាតឱ្យមានការរៀបចំវេទិការាជរដ្ឋាភិបាល-ផ្នែកឯកជន ដើម្បីបើកឱកាសឱ្យ​វិនិយោគិនឯកជន បានលើកឡើងពីបញ្ហានានា និងឈាន​ទៅដល់ការដោះ​ស្រាយផ្ទាល់នៅក្នុងវេទិកានេះតែម្តង។

បន្ថែម​ពី​នេះ នៅរៀងរាល់ ៦ខែម្ដង ក្រុមប្រឹក្សាអភិវឌ្ឍន៍កម្ពុជា តែងតែរៀបចំកិច្ចប្រជុំពិភាក្សាលើ​បញ្ហាកង្វល់ផ្សេងៗជាមួយ​សមាគមធុរកិច្ចជប៉ុន សភាពាណិជ្ជកម្មអាម៉េរិក សភាពាណិជ្ជកម្មអ៉ឺរ៉ុប សមាគមធុរកិច្ចកូរ៉េ ដើម្បីស្វែងរកដំណោះស្រាយផងដែរ។

​ជាការឆ្លើយតប លោក CÉSAR LIPKA  បាន​បង្ហាញ​ការ​ចាប់អារម្មណ៍​ជាខ្លាំងលើការអភិវឌ្ឍន៍​យ៉ាងឆាប់រហ័ស​របស់​ប្រទេសកម្ពុជា និងបានលើកឡើងអំពីបទពិសោធន៍ជោគជ័យរបស់ក្រុមហ៊ុនខ្លួន ក្នុងផលិតកម្មកែច្នៃ​ចំណីអាហារ​ដើម្បីផ្គត់ផ្គង់នៅក្នុងទីផ្សារអឺរ៉ុប ដោយ​បានបញ្ជាក់អំពីភូមិសាស្រ្តប្រទេសប៉ូឡូញ ដែលសម្បូរទៅ​ដោយភោគផល​ធម្មជាតិ និង​ផលិតផល​កសិកម្មទ្រង់ទ្រាយធំ ដូចជា ការចិញ្ចឹមជ្រូកយកសាច់ និង​ការដាំដំណាំផ្លែប៉ោម​ជាដើម។

ទន្ទឹមនឹងនេះ គណៈប្រតិភូក្រុមហ៊ុន ក៏បាន​បង្ហាញពីផែន​ការរបស់ខ្លួន ក្នុងការបង្កើតរោងចក្រ​កែច្នៃចំណី​អាហារនៅក្នុង​ប្រទេស​កម្ពុជា ដើម្បី​ផ្គត់ផ្គង់ទីផ្សារនៅក្នុងតំបន់។

ដោយ​មើល​ឃើញពីការយក​ចិត្ត​ទុកដាក់ខ្ពស់របស់ រាជរដ្ឋាភិបាលកម្ពុជា លើ​ការធ្វើពាណិជ្ជកម្ម និងការវិនិយោគពីវិស័យឯកជន ក៏ដូច​ជា​សក្តានុពល​នានារបស់កម្ពុជា លោក​ CÉSAR LIPKA ក៏​បាន​បង្ហាញ​សុទិដ្ឋិនិយមកាន់តែខ្ពស់​ក្នុងការពន្លឿន​ផែនការវិនិយោគរបស់​ខ្លួននៅក្នុង​ប្រទេសកម្ពុជា សំដៅធ្វើឱ្យលេចចេញជារូបរាងកាន់តែឆាប់រហ័សផងដែរ៕