ប៉ាឡេស្ទីននឹងបញ្ជូនមន្ត្រីមកដកបទពិសោធន៍ដំណើរការកសាងសន្តិភាពនៅកម្ពុជា

គណប្រតិភូប៉ាឡេស្ទីននឹងធ្វើដំណើរមកប្រទេសកម្ពុជានៅចុងខែកុម្ភៈ ឆ្នាំ២០២៥ ដើម្បីដកបទពិសោធន៍អំពីការកសាងសន្តិភាព ការអភិវឌ្ឍប្រទេស និងដំណើរការនៃតំបន់សេដ្ឋកិច្ចពិសេសនៅកម្ពុជា។

ដំណឹងពីការធ្វើដំណើររបស់ប្រតិភូប៉ាឡេស្ទីនមកកម្ពុជាត្រូវបានឲ្យដឹងក្នុងជំនួបរវាងរដ្ឋលេខាធិការ នៃក្រសួងការបរទេសលោក មាស គឹមហេង និងអនុប្រធានបេសកកម្ម លោក Kensuke NAGASE នៃស្ថានទូតជប៉ុនប្រចាំកម្ពុជា នៅទីស្តីការក្រសួងការបរទេសនៅថ្ងៃទី២៤ ខែមករា ឆ្នាំ២០២៥។ 

ក្នុងកិច្ចពិភាក្សាភាគីទាំងពីរបានផ្តោតសំខាន់លើក្របខណ្ឌនៃសន្និសីទស្តីពីកិច្ចសហប្រតិបត្តិការក្នុងចំណោមប្រទេសអាស៊ីខាងកើតដើម្បីការអភិវឌ្ឍប៉ាឡេស្ទីន (CEAPAD)។ 

លោករដ្ឋលេខាធិការ មាស គឹមហេង បានថ្លែងអំណរគុណចំពោះរដ្ឋាភិបាលជប៉ុន ដែលបានអញ្ជើញកម្ពុជាឱ្យចូលជាសមាជិក CEAPAD  និងបានជម្រាបជូនអំពីការត្រៀមខ្លួនរបស់កម្ពុជាក្នុងការចែករំលែកបទពិសោធន៍ដល់គណៈប្រតិភូប៉ាឡេស្ទីន អំពីការកសាងសន្តិភាព ការថែរក្សាសន្តិភាព ការកសាង និងការស្តារប្រទេសឡើងវិញបន្ទាប់ពីសង្គ្រាមជិត៣ទសវត្សរ៍កន្លងមក។

បន្ទាប់ពីសម្រេចនូវបទឈប់បាញ់កាលពីសប្ដាហ៍មុនជាមួយអ៉ីស្រាអ៊ែល និងបើកផ្លូវឲ្យមានការដោះដូរចំណាប់ខ្មាំងជាមួយអ្នកទោសបន្ថែមទៀតនៅក្រោមកិច្ចព្រមព្រៀងមួយដែលមានបំណងបញ្ចប់សង្គ្រាមជាង ១៥ ខែកន្លងមកនេះ។ ជនជាតិ​ប៉ាឡេស្ទីន​ដដែលភៀសខ្លួនបាន​ចាប់ផ្ដើម​ធ្វើ​ដំណើរ​ឆ្ពោះ​ទៅកាន់​ផ្ទះសំបែងខ្លួនវិញហើយ។

សង្គ្រាមអ៉ីស្រាអ៊ែល ប៉ាឡេស្ទីន បានបំផ្លិចបំផ្លាញតំបន់ហ្កាហ្សានិងធ្វើឲ្យពលរដ្ឋតំបន់នេះស្ទើរតែទាំងអស់ភៀសខ្លួនពីផ្ទះសម្បែង។

យោងតាមការចុះផ្សាយរបស់ Ajazeera ប្រជាជនប៉ាឡេស្ទីន ៤៦ ៧០៧ នាក់ត្រូវបានសម្លាប់ ក្នុងរយៈពេល១៥ខែនៃសង្គ្រាមនេះ៕ 

អត្ថបទដោយ ហ៊ុន សិរីវឌ្ឍន៍