បុរសម្នាក់ ដុតផាវលេងមិនប្រយ័ត្ន ផ្ទុះបែកប្រអប់ដៃម្ខាង នៅខេត្តមណ្ឌលគិរី

ក្នុងរដូវពិធីចូលឆ្នាំប្រពៃណីចិន វៀតណាម អាជ្ញាធរបានជូនដំណឹងក៏ដូចជាអំពាវនាវទៅដល់ប្រជាពលរដ្ឋមេត្តាកុំដុតផាវ លេងកម្សាន្តនៅពេលឱកាសពិធីបុណ្យចូលឆ្នាំចិននេះ។ ប៉ុន្តែបើទោះបីអាជ្ញាធរហាមឃាត់យ៉ាងណា នៅតែមានអ្នកលួចដុតលេងនៅតាមតំបន់ផ្សេងផ្សេងមួយចំនួន។

បើតាមប្រភពព័ត៌មាន បានឱ្យដឹងថា មានបុរសម្នាក់បានយកផាវគ្រាប់បែកដុតលេងកម្សានមិនប្រយ័ត្នផ្ទុះបែកប្រអប់ដៃស្តាំម្ខាងរងរបួសធ្ងន់ត្រូវបានបញ្ជូនទៅសង្រ្គោះនៅឯរាជធានីភ្នំពេញ។ ហេតុការណ៍នេះបានកើតឡើង នៅថ្ងៃទី២៦ ខែមករា ឆ្នាំ២០២៥ ត្រង់ចំណុចផ្ទះជនរងគ្រោះដែលបើកមណ្ឌលកម្សានKTVផ្ទាល់។

ប្រភពដដែល បានញ្ជាក់ថា ជនរងគ្រោះមានឈ្មោះ ជា ចាន់ ភេទប្រុស អាយុ ៤០ឆ្នាំ មានមុខរបរបើកមណ្ឌលកម្សាន្តKTV មានទីលំនៅស្ថិតក្នុងភូមិពូទុង ឃុំចុងផ្លាស់ ស្រុកកែវសីមា ខេត្តមណ្ឌលគិរី។ បច្ចុប្បន្នជនរងគ្រោះកំពុងសម្រាកព្យាបាលនៅឯមន្ទីពេទ្យ រាជធានីភ្នំពេញ៕

អត្ថបទ៖ រៀម សុខហេង